PAGBASA GIKAN SA MGA BUHAT SA MGA APOSTOLES
Acts 6:1-7
Wala madugay, samtang nag-anam og kadaghan ang mga tinun-an, nagkabingkil ang mga lumad nga Judio ug ang mga Judio nga Griego og pinulongan. Ang mga Judio nga Griego og pinulungan miingon nga ang ilang mga biyuda wala kahatagi sa ilang bahin sa matag adlaw nga pag-apod-apod sa salapi. Busa gitigom sa napulog duha ka apostoles ang tanang tinun-an ug giingnan, "Dili maayo nga palabihon namo ang pag-atiman sa mga butang nga may labot sa salapi kay sa pagwali sa pulong sa Dios. Busa, mga igsuon, pagpili kamog pito ka tawo diha kaninyo nga puno sa Espiritu Santo ug sa kaalam, ug amo silang tugyanan niining buluhatona. Niining paagiha makagamit kami sa tibuok namong panahon sa pag-ampo ug sa pagwali." Ang tibuok pundok nahimuot sa sugyot sa mga apostoles; busa gipili nila si Esteban, nga puno sa pagtuo ug sa Espiritu Santo, ug si Felipe, si Procoro, si Nicanor, si Timon, si Parmenas, ug si Nicolas, taga-Antioquia. Unya gidala sila ngadto sa mga apostoles, ug ang mga apostoles nag-ampo ug nagpandong kanila sa ilang mga kamut. Busa mipadayon pagkaylap ang pulong sa Dios. Ang mga tinun-an didto sa Jerusalem nag-anam og kadaghan ug daghan kaayong mga pari nga nanuo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 33:1-2, 4-5, 18-19
R. Ginoo, ipaabot ang imong kaluoy diri kanamo. / R. Aleluya.
Lukso kamo sa kalipay, kamong mga matarong, diha sa Ginoo; ang pagdayeg angay sa matarong, Pasalamati ang Ginoo diha sa alpa; uban sa lira nga may napulo ka koldas awita ang iyang kadayeganan. (R)
Matarong ug ang tanan niyang mga buhat kasaligan. Nahigugma siya sa husto ug matarong; sa kaayo sa Ginoo puno ang yuta. (R)
Tan-awa, ang mga mata sa Ginoo gasud-ong kanilang mahadlokon kaniya, kanila nga naglaum sa iyang kaayo. Aron luwason sila niya sa kamatayon ug ampingan sila bisan pa sa gutom. (R)
BERSO SA DILI PA ANG EBANGHELYO
Aleluya! Si Kristo nga karon nabanhaw dili na gayod mamatay pag-usab; ang kamatayon wala nay gahum batok kaniya. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6:16-21
Sa pagkasawomsom na, nangadto sa lanaw ang iyang mga tinun-an ug nanakay og sakayan, unya nanabok balik sa Capernaum. Apan nagabii na lamang wala gihapon mahiapas kanila si Jesus. Niadtong higayona nagbalod pag-ayo tungod sa kusog nga hangin. Ang mga tinun-an nakagaod naglima o unom ka kilometro sa dihang nakita nila si Jesus nga naglakaw sa tubig ug nagkaduol sa sakayan, ug nangalisang sila. Si Jesus miingon kanila, "Ayaw kamo kahadlok, kay ako kini!" Nalipay sila nga mipasakay kaniya ug dihadiha ang sakayan midunggo sa dapit nga ilang gipadulngan.
ANG EBANGHELYO SA GINOO.
DAYGON IKAW, O KRISTO.
