⚪ Biyernes sa Ikaduhang Semana sa Pasko sa Pagkabanhaw

PAGBASA GIKAN SA MGA BUHAT SA MGA APOSTOLES

Acts 5:34-42

Apan usa kanila, si Gamaliel nga usa ka Pariseo ug magtutudlo sa Balaod nga gitamod pag-ayo sa tanang mga tawo, mitindog ug misugo nga pagulaon unag makadiyot ang mga apostoles. Unya miingon siya sa Labawng Hukmanan, "Mga taga-Israel, pagbantay kamo sa inyong pagabuhaton niining mga tawhana. Kaniadto dihay ginganlag Teudas nga nagpakadakong tawo, ug may mga upat ka gatos ka tawo nga misunod kaniya. Apan gipatay siya ug nagkatibulaag ang tanan niyang mga sumusunod, ug nahanaw ang iyang kalihokan. Sa panahon usab sa pagsenso, si Judas nga taga-Galilea nakadani og mga tawo, apan gipatay siya ug nagkatibulaag ang tanan niyang mga sumusunod. Busa niining kasoha karon, ayaw ninyo sila hilabti. Pasagdi sila, kay kon kining ilang laraw ug buhat iya lamang sa tawo, mahanaw gayod kini; apan kon iya kini sa Dios, dili gayod kamo makabuntog kanila. Mahitabo pa hinoon nga kamo nakig-away sa Dios." Ang Labawng Hukmanan misunod sa tambag ni Gamaliel. Busa ilang gipasulod sa lawak ang mga apostoles ug gipalatos, ug gibaoran sa dili na gayod pagsulti sa ngalan ni Jesus; ug gibuhian sila. Unya nanggula ang mga apostoles, malipayon nga ang Dios nag-isip kanilang takus sa pag-antos sa kaulawan tungod sa ngalan ni Jesus. Ug matag adlaw didto sa templo ug sa mga puloy-anan nagpadayon sila pagtudlo ug pagwali sa Maayong Balita mahitungod kang Jesus nga Mesiyas.

SALMO RESPONSORYO

Ps. 27:1, 4, 13-14 / R. Aleluya.

R. Usa ka butang ang akong gipangita: ang pagpuyo diha sa balay sa Ginoo.

Ang Ginoo maoy akong kahayag ug akong kaluwasan, kinsa may akong kalisangan? Ang Ginoo maoy dalangpanan sa akong kinabuhi; kinsa pa may akong kahadlokan? (R)

Usa ka butang ang akong gipangayo sa Ginoo; kini mao ang akong gipangita: Ang pagpuyo diha sa balay sa Ginoo sa tanang mga adlaw sa akong kinabuhi. (R)

Gituohan ko nga makakita ako sa kaayo sa Ginoo diha sa yuta sa mga buhi. Paabota sa walay kahadlok ang Ginoo; pagmalig-on sa kasingkasing, ug paabota ang Ginoo. (R)

BERSO SA DILI PA ANG EBANGHELYO

Mt. 4:4b

Aleluya! Dili mabuhi ang tawo sa pan lamang, kondili sa matag pulong usab nga isulti sa Dios. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 6:1-15

Human niini mibalik si Jesus pagtabok sa lanaw sa Galilea (o sa Lanaw sa Tiberias). Misunod kaniya ang daghan kaayong tawo, kay nakita man nila ang mga milagro sa iyang pag-ayo sa mga masakiton. Mitungas si Jesus sa usa ka bungtod ug milingkod didto uban sa iyang mga tinun-an. Niadtong higayona duol na ang Pangilin sa Pagsaylo. Unya mitan-aw si Jesus sa iyang palibot ug sa pagkakita niya sa daghang mga tawo nga nagpaingon kaniya, miingon siya kang Felipe, "Asa man kita makapalit og igong pagkaon alang niining mga tawo?" (Gisulti niya kini aron pagsulay kang Felipe, apan ang tinuod mao nga nahibalo na siya kon unsay iyang buhaton.) Si Felipe mitubag, "Bisag mopalit kitag pan nga bilig duha sa gatos ka denario dili paigo nga ipakaon niining mga tawhana." Usa sa iyang mga tinun-an nga si Andres, igsuon ni Simon Pedro, miingon kang Jesus, "Aniay batang lalaki dinhi nga may lima ka pan nga sebada ug duha ka isda. Apan mag-unsa man kini alang niining tanang tawo?" Si Jesus miingon kanila, "Palingkura ang mga tawo." (May daghang balili niadtong dapita.) Busa nanglingkod ang mga tawo nga may gidaghanon nga mga lima ka libo. Unya gikuha ni Jesus ang pan, gipasalamatan niya ang Dios, ug giapod-apod niya kini ngadto sa mga tawo. Mao usab kini ang iyang gibuhat sa isda, ug silang tanan nakakaon kutob sa ilang gusto. Sa nangabusog na silang tanan, miingon siya sa iyang mga tinun-an, "Hiposa ninyo ang mga salin aron walay mausik." Busa gihiposan nila ang tanan, ug ang mga salin sa lima ka pan nga sebada nga gikaon sa mga tawo nakapunog napulog-duha ka bukag. Sa pagkakita sa mga tawo sa milagro nga nabuhat ni Jesus, miingon sila, "Sa walay duhaduha siya gayod ang Propeta nga moanhi sa kalibutan." Nakamatikod si Jesus nga moduol sila kaniya ug kuhaon siya aron pugson nga mahimong ilang hari; busa mibalik siya nga nag-inusara ngadto sa kabungtoran.