PAGBASA GIKAN SA MGA BUHAT SA MGA APOSTOLES
Acts 5:27-33
Unya gidala nila ang mga apostoles ngadto sa Labaw'ng Hukmanan, ug gisukit-sukit sila sa Pangulong Pari. Miingon siya, "Dili ba gidid-an man kamo namo pagpanudlo sa ngalan niining tawhana? Apan tan-awa kining inyong gibuhat! Gisangyaw ninyo ang inyong pagtulon-an sa tibuok Jerusalem, ug buot ninyo ipaila nga kami ang nakaingon sa iyang kamatayon!" Si Pedro ug ang ubang mga apostoles mitubag, "Kinahanglan sundon namo ang Dios, ug dili ang mga tawo. Ang Dios sa atong mga katigulangan nagbanhaw kang Jesus human ninyo siya patya pinaagi sa paglansang kaniya sa krus. Ug gibayaw siya sa Dios ngadto sa iyang tuo, ingon nga Pangulo ug Manluluwas, aron paghatag sa katawhan sa Israel og higayon sa paghinulsol ug sa ingon mapasaylo ang ilang mga sala. Saksi kami niining mga butanga ingon man ang Espiritu Santo nga mao ang gasa sa Dios niadtong nagmasinugtanon kaniya." Sa pagkadungog niini sa mga sakop sa Labaw'ng Hukmanan, nasuko sila pag-ayo ug buot nilang ipapatay ang mga apostoles.
ANG PULONG SA GINOO.
SALAMAT SA DIOS.
SALMO RESPONSORYO
Ps. 34:2, 9, 17-18, 19-20
R. Ang Ginoo nagpatalinghog sa singgit sa kabus. / R. Aleluya.
Dayegon ko ang Ginoo sa tanang mga panahon; ang iyang pagdayeg, maania kanunay sa akong ba-ba. Tagamtama ug tan-awa unsa ka maayo ang Ginoo; bulahan ang tawo nga nagadangop kaniya. (R)
Gisudyaan sa Ginoo ang mga nagbuhat og dautan; aron mapapas ang ilang handumanan diha sa yuta. Sa pagsangpit sa mga matarong, ang Ginoo namati kanila, ug sa tanan nilang mga kagul-anan giluwas niya sila. (R)
Ang Ginoo haduol sa nagahinulsol; ug sila nga naguol sa espiritu iyang giluwas. Daghan ang mga kasakit sa matarong nga tawo, apan kanilang tanan giluwas sila sa Ginoo. (R)
BERSO SA DILI PA ANG EBANGHELYO
Jn. 20:29
Aleluya! Mituo ka ba Tomas, tungod kay nakakita ka kanako? Bulahan kadtong mituo bisan wala makakita kanako! Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 3:31-36
Si Jesus miingon kang Nicodemo, "Siya nga gikan sa itaas labaw sa tanan; siya nga gikan sa yuta, yutan-on, ug magsulti siya mahitungod sa mga butang yutan-on. Siya nga gikan sa langit labaw sa tanan. Nagmatuod siya sa iyang nakita ug nadungog, apan walay mituo sa iyang gisulti. Ang motuo sa iyang mensahe nagmatuod nga matinud-anon ang Dios. Kay ang sinugo sa Dios nagsulti sa mga Pulong sa Dios, ug sa walay sukod ang Dios naghatag kaniya sa iyang Espiritu. Ang Amahan nahigugma sa iyang Anak ug gitugyan sa Amahan ang tanan ngadto kaniya. Ang motuo sa anak may kinabuhing dayon, apan ang dili motuo sa Anak dili makabaton sa kinabuhing dayon; hinunoa, kaligutgotan siya sa Dios hangtud sa kahangturan.
ANG EBANGHELYO SA GINOO.
DAYGON IKAW, O KRISTO.
