PAGBASA GIKAN SA MGA BUHAT SA MGA APOSTOLES
Acts 5:17-26
Unya ang Pangulong Pari ug ang tanan niyang mga kauban nga mga sakop sa pundok sa mga Saduseo nasina pag-ayo sa mga apostoles; busa mihukom sila sa pagsumpo kanila. Ilang gidakop ang mga apostoles ug gibalhog sa karsel. Apan niadtong gabhiona usa ka anghel sa Ginoo miabli sa mga ganghaan sa karsel ug gipagula ang mga apostoles, ug giingnan, "Pangadto kamo sa Templo ug sultihi ang mga tawo mahitungod niining bag-ong kinabuhi." Gituman kini sa mga apostoles, ug sa pagkakaadlawon misulod sila sa Templo ug nanudlo. Gipatawag sa Pangulong Pari ug sa iyang mga kauban ang tanang mga kadagkoan sa mga Judio aron manambong sa tigom sa Labawng Hukmanan; unya ilang gipakuha ang mga apostoles gikan sa karsel aron paatubangon kanila. Apan sa pag-adto sa mga polis, wala na didto sa karsel ang mga apostoles. Busa namalik sila ngadto sa Labawng Hukmanan ug mitaho, "Sa pag-abot namo sa karsel, among nakita nga maayo kining pagkasira ug ang tanang guwardiya nagbantay diha sa mga ganghaan; apan sa among pag-abli sa ganghaan wala na didtoy binilanggo." Sa pagkadungog niini sa kapitan sa mga guwardiya sa Templo ingon man sa kadagkoan sa mga pari, nangalibog sila kon unsa ang nahitabo sa mga apostoles. Unya may tawo nga misulod ug miingon kanila "Ang mga tawo nga inyong gibilanggo atua sa Templo nanudlo sa mga tawo." Busa miadto sa Templo ang kapitan sa mga guwardiya uban sa iyang mga sakop ug gidakop nila ang mga apostoles. Wala sila mogamit og kusog, kay nahadlok man sila nga batu-on sa mga tawo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 34:2-3, 4-5, 6-7, 8-9
R. Namati ang Ginoo sa pangaliya sa kabus. / R. Aleluya.
Daygon ko ang Ginoo sa tanang mga panahon; ang iyang pagdayeg maania kanunay sa akong baba. Pahimayaa ang akong kalag diha sa Ginoo; ang mapaubsanon mamati kanako ug malipay. (R)
Himayaa ang Ginoo uban kanako mag-ambahan kita aron pagbayaw sa iyang ngalan. Gipangita ko ang Ginoo, ug gitubag ako niya, ug giluwas ako niya sa tanan kong gikahadlokan. (R)
Paglaum kamo kaniya aron mosanag kamo sa kasadya, ug ang inyong mga nawong dili manlipaghong sa kaulaw. Sa pagsangpit sa nasakit nga tawo, namati ang Ginoo, ug giluwas siya sa tanan niyang kagul-anan. (R)
Ang mga anghel sa Ginoo nagalibot kanila nga mahadlokon kaniya, ug nagapalingkawas kanila. Tagamtama ug tan-awa unsa kamaayo ang Ginoo; bulahan ang tawo nga nagadangop kaniya. (R)
BERSO SA DILI PA ANG EBANGHELYO
Jn. 3:16
Aleluya! Kay gihigugma pag-ayo sa Dios ang kalibutan ug tungod niini gihatag niya ang iyang bugtong Anak, aron nga ang tanan nga motuo kaniya dili mamatay, kondili makabaton hinuon sa kinabuhing dayon. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 3:16-21
Si Jesus miingon kang Nicodemo, "Kay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak, aron ang tanan nga motuo kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini." "Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa Bugtong Anak sa Dios. Ug kini mao ang silot: ang kahayag mianhi sa kalibutan, apan gipalabi sa mga tawo ang kangitngit kay sa kahayag, kay dautan man ang ilang binuhatan. Ug ang tanan nga nagbuhat og dautan dili gusto sa kahayag ug dili moduol niini, kay dili siya buot nga mabutyag ang iyang dautang binuhatan. Apan ang magbuhat sumala sa kamatuoran moduol sa kahayag aron makita nga nagmatinumanon siya sa Dios."
ANG EBANGHELYO SA GINOO.
DAYGON IKAW, O KRISTO.
