PAGBASA GIKAN SA MGA BUHAT SA MGA APOSTOLES
Acts 4:32-37
Ang pundok sa mga magtutuo usa ra sa hunahuna ug kasingkasing. Ug wala kanilay miingon nga siya ray tag-iya sa iyang kabtangan, kondili nag-ambitay silang tanan sa tanang mga butang nga ilang gihuptan. Uban sa dakong gahum, ang mga apostoles nagsaksi sa pagkabanhaw sa Ginoong Jesus, ug ang Dios nagpanalangin pag-ayo kanilang tanan. Walay usa kanila nga nakulangan. Kadtong may mga uma o mga balay nagbaligya niini, ug ang halin gitugyan nila sa mga apostoles; gibahinbahin kini sa mga apostoles sa tagsatagsa kanila sumala sa ilang gikinahanglan. Ug mao nga si Jose, usa ka Levita nga taga-Cipre, nga ginganlan sa mga apostoles ug Bernabe (nga sa ato pa, "Ang Magdadasig"), mibaligya sa iyang uma ug ang halin niini iyang gitugyan sa mga apostoles.
ANG PULONG SA GINOO.
SALAMAT SA DIOS.
SALMO RESPONSORYO
Ps. 93:1, 1-2, 5
R. Ang Ginoo hari; gibistihan siya sa kahalangdon. / R. Aleluya.
Ang Ginoo hari, gibistihan siya sa kasanag; gibistihan ang Ginoo ug gibaksan sa gahum. (R)
Ug gibuhat niya nga malig-on ang kalibutan; nga dili gayod matarog. Ang imong trono nagabarog nga malig-on sukad pa sa karaan; sukad sa kahangturan mao na ikaw, O Ginoo. (R)
Ang imong mga balaod takus gayod nga kasaligan; ang kabalaan angay sa imong balay, O Ginoo, sa tanang mga adlaw. (R)
BERSO SA DILI PA ANG EBANGHELYO
Jn. 3:14-15
Aleluya! Ingon nga giisa ni Moises didto sa kamingawan ang bitin nga tumbaga nga gibutang og tukon, ang Anak sa Tawo kinahanglan nga iisa usab, aron ang tanan nga motuo kaniya makabaton og kinabuhing walay katapusan." Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 3:7-15
Si Jesus miingon kang Nicodemo, "Ayaw ikahibulong nga ako nag-ingon kanimo nga kinahanglan magpakatawo kamo pag-usab. Ang hangin mohuros bisan asa kini buot mopadulong; madungog mo ang paghuros niini, apan wala ka mahibalo diin kini gikan o asa kini padulong. Ingon usab niini ang tanan nga matawo pinaagi sa Espiritu." "Unsaon man pagkahimo niini?" nangutana si Nicodemo. Si Jesus mitubag, "Wala ka ba mahibalo niini nga inila ka man unta nga magtutudlo sa Israel? Sultihan ko ikaw: gisulti namo ang among nahibaloan ug nagmatuod kami sa among nakita, apan wala ninyo dawata ang among mensahe. Kon dili ka motuo sa akong gisulti kanimo mahitungod sa mga butang niining kalibutana, unsaon mo man pagtuo kon sultihan ko ikaw mahitungod sa mga butang sa langit? Ug wala pay nakasaka sa langit gawas niadtong nanaog gikan sa langit ang Anak sa Tawo. Ingon nga giisa ni Moises didto sa kamingawan ang bitin nga tumbaga nga gibutang og tukon, ang Anak sa Tawo kinahanglan nga iisa usab, aron ang tanan nga motuo kaniya makabaton og kinabuhing walay katapusan."
ANG EBANGHELYO SA GINOO.
DAYGON IKAW, O KRISTO.
