PAGBASA GIKAN SA MGA BUHAT SA MGA APOSTOLES
Acts 4:23-31
Sa dihang gibuhian na sila, si Pedro ug si Juan namalik sa ilang mga kauban ug ilang gisugilon kanila ang gisulti sa mga kadagkoan sa mga pari ug sa mga kadagkoan sa lungsod. Sa pagkadungog nila niini, naghiusa silang tanan pag-ampo sa Dios. Miingon sila, "Ginoo, ikaw ang nagbuhat sa langit, sa yuta, sa dagat, ug sa tanan nga anaa kanila! Pinaagi sa Espiritu Santo misulti ka sa among amahan nga si David nga imong sulugoon, sa iyang pag-ingon, 'Nganong nasuko man ang dili Judio? Ug nganong naglaraw man ang katawhan og mga butang nga walay kapuslanan? Nangandam ang mga hari sa yuta, ug ang mga pangulo nagtigom batok sa Ginoo ug sa iyang Mesiyas.' Kay sa pagkatinuod, niining maong siyudad, si Herodes ug si Poncio Pilato nakighiusa sa mga dili Judio ug sa mga taga-Israel batok kang Jesus, ang balaan mong Sulugoon nga imong gihimong Mesiyas. Apan pinaagi niini ila hinuong gibuhat ang tanan nga imo nang gilaraw nga mahitabo pinaagi sa imong gahum ug pagbuot. Ug karon, Ginoo, tan-awa kining mga panghulga nga ilang gibuhat, ug kaming imong mga sulugoon hatagi'g kaisog pagsulti sa imong mensahe. Ituy-od ang imong kamut aron sa pag-ayo, ug itugot nga mahimo unta ang mga butang katingalahan ug mga milagro pinaagi sa ngalan sa balaan mong Sulugoon nga si Jesus." Human sila mag-ampo, nauyog ang dapit nga ilang gitigoman. Ug silang tanan napuno sa Espiritu Santo ug nagwali sa mensahe sa Dios sa walay kukahadlok.
ANG PULONG SA GINOO.
SALAMAT SA DIOS.
SALMO RESPONSORYO
Ps. 2:1-3, 4-6, 7-8
R. Bulahan ang tanan nga nagasalig sa Ginoo. / R. Aleluya.
Nganong napungot man ang mga nasod ug ang katawhan misulti og binuang? Ang mga hari sa kalibutan mialsa, ug ang mga kadagkoan nagkasabot batok sa Ginoo ug batok sa iyang gidihogan: "Lugti-on ta ang ilang mga talikala ug isalikway ta ang ilang mga gapos halayo kanato." (R)
Siya nga naglingkod sa trono sa langit nagakatawa; ang Ginoo nangyam-id kanila. Unya diha sa kapungot misulti siya kanila; nalisang sila kaniya diha sa iyang kalagot: "Nagbutang ako sa akong hari didto sa Sion, ang akong balaang bukid." Isangyaw ko ang kasugoan sa Ginoo. (R)
Ang Ginoo miingon kanato, "Ikaw ang akong anak; karong adlawa gianak ko ikaw. Pangayo kanako ug akong ihatag kanimo ang mga nasod nga kabilin ug ang kinatumyan sa yuta nga imong katigayonan. Mandoan mo sila sa bunal nga puthaw; imo silang buk-on ingog kolon nga yuta." (R)
BERSO SA DILI PA ANG EBANGHELYO
Col. 3:1
Aleluya! Sanglit gibanhaw naman kamo uban ni Cristo, tinguhaa ang mga butang nga atoa sa langit diin naglingkod si Cristo sa iyang trono sa tuo sa Dios. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 3:1-8
May usa ka pangulo sa mga Judio nga ginganlag Nicodemo, nga usa ka sakop sa pundok sa mga Pariseo. Usa ka gabii niana miadto siya kang Jesus ug miingon kaniya, "Rabi, nasayod kami nga ikaw usa ka Magtutudlo nga pinadala sa Dios. Walay makahimo sa mga milagro nga imong gipamuhat gawas kon ang Dios mag-uban kaniya." Si Jesus mitubag, "Sultihan ko ikaw: walay makakita sa Gingharian sa Dios gawas kon siya matawo pag-usab." "Unsaon man pagkatawo pag-usab sa usa ka tawo nga gulang na?" nangutana si Nicodemo. "Dili niya mahimo ang pagsulod sa tiyan sa iyang inahan aron magpakatawo pag-usab." Si Jesus mitubag, "Sultihan ko ikaw: walay makasulod sa Gingharian sa Dios gawas kon matawo siya pinaagi sa tubig ug sa Espiritu. Ang gianak sa tawo, tawo usab; ug ang gianak sa Espiritu, espiritu usab. Ayaw ikahibulong nga ako nag-ingon kanimo nga kinahanglan magpakatawo kamo pag-usab. Ang hangin mohuros bisan asa kini buot mopadulong; madungog mo ang paghuros niini, apan wala ka mahibalo diin kini gikan o asa kini padulong. Ingnon usab niini ang tanan nga matawo pinaagi sa Espiritu."
ANG EBANGHELYO SA GINOO.
DAYGON IKAW, O KRISTO.
