PAGBASA GIKAN SA MGA BUHAT SA MGA APOSTOLES
Acts 4:13-21
Ang mga sakop sa Labawng Hukmanan natingala sa gipakitang kaisog ni Pedro ug ni Juan, ug sa pagkasayod nga sila mga tawo diay nga wala makaeskuyla. Ug nasayran nila nga sila mga kauban diay ni Jesus kaniadto. Apan wala silay ikasulti, kay nakita man gayod nila ang tawo nga naayo nga nagtindog didto uban ni Pedro ug ni Juan. Busa ang mga apostoles gipagula nila sa lawak sa Labawng Hukmanan ug nag-ingnanay sila, "Unsa may atong buhaton niining mga tawhana? Ang tanang nagpuyo sa Jerusalem nasayod nga kining talagsaong milagro nahimo nila ug dili kita makalimod niini. Apan aron dili masangyaw pag-ayo kining hitaboa ngadto sa katawhan, did-an nato sila pagsulti sa ngalan ni Jesus kang bisan kinsa." Busa gipatawag nila pag-usab ang duha ka apostoles ug giingnan nga dili gayod sila magsulti o magtudlo sa ngalan ni Jesus. Apan si Pedro ug si Juan mitubag kanila, "Hukmi ninyo: hain may matarong sa atubangan sa Dios, ang pagsunod ba sa inyong sugo o sa sugo sa Dios? Kay dili kami makapugong pagsulti sa amo gayong nakita ug nadungog." Tungod niini, gipinahan sila pag-ayo sa Labawng Hukmanan ug unya gibuhian. Wala silay kapasikaran pagsilot kanila, kay ang katawhan nagdayeg man sa Dios gumikan sa nahitabo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 118:1, 14-15, 16-18, 19-21
R. Daygon ko ikaw, O Ginoo, kay imo man akong gipatalinghogan. / R. Aleluya.
Pasalamati ninyo ang Ginoo, kay siya maayo kay ang iyang kaluoy nagalungtad hangtod sa kahangturan. Ang akong kusog ug akong kaisog mao ang Ginoo, ug siya nahimong akong manluluwas. Ang masadya nga singgit sa kadaugan anaa sa mga tolda sa matarong. (R)
Ang tuong kamut sa Ginoo gibayaw; "Ang tuong kamut sa Ginoo mibakyaw uban sa gahum." Dili ako mamatay, kondili mabuhi, ug isangyaw ko ang mga buhat sa Ginoo. Bisan tinuod gisilotan ako sa Ginoo, apan giluwas ako niya sa kamatayon. (R)
Ablihi kanako ang mga ganghaan sa katarong; mosulod ako kanila ug pasalamatan ko ang Ginoo. Iyaha sa Ginoo kining ganghaana; ang matarong mosulod niini. Pasalamatan ko ikaw, kay gipatalinghugan mo man ako ug nahimo kang akong manluluwas. (R)
BERSO SA DILI PA ANG EBANGHELYO
Ps. 118:24
Aleluya! Mao kini ang adlaw nga gihimo sa Ginoo; magsadya kita ug magmaya. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 16:9-15
Human mabanhaw si Jesus sayo sa unang adlaw sa semana, mipakita siya pag-una kang Maria Magdalena ang babaye nga gihinloan niya og pito ka yawa. Ug milakaw si Maria ug gipahibalo niya ang iyang mga kauban nga nagsubo ug naghilak. Sa pagkadungog nila nga si Jesus nabuhi, ug nga si Maria nakakita kaniya, wala sila motuo. Human niini, mipakita si Jesus sa laing paagi ngadto sa duha kanila samtang naglakaw sila padulong sa gawas sa siyudad. Namalik sila ug nanugilon sa uban, apan wala sila tuohi. Sa katapusan, mipakita si Jesus sa napulog-usa ka tinun-an samtang nangaon sila. Gisaway niya sila tungod sa ilang pagkakulang sa pagtuo, ug tungod sa pagkagahi sa ilang ulo, kay wala man sila motuo niadtong nakakita kaniya nga nabanhaw. Miingon siya kanila, "Panglakaw kamo sa tibuok kalibutan ug isangyaw kining Maayong Balita ngadto sa tanang tawo."
ANG EBANGHELYO SA GINOO.
DAYGON IKAW, O KRISTO.
