⚪ [S] Biyernes sa Oktaba sa Pasko sa Pagkabanhaw

PAGBASA GIKAN SA MGA BUHAT SA MGA APOSTOLES

Acts 4:1-12

Si Pedro ug si Juan nagsulti pa sa katawhan sa dihang giduol sila sa mga pari, ug sa pangulo sa mga guwardiya sa Templo, ug sa mga Saduseo. Naglagot sila kay ang duha ka apostoles nanudlo man sa mga tawo nga nabanhaw si Jesus, ug nagmatuod kini nga ang mga patay pagabanhawon. Busa ilang gidakop sila ug gibilanggo hangtod pagkasunod adlaw, sanglit gabii na man kadto. Apan daghan niadtong nakabati sa mensahe nanuo, ug ang gidaghanon sa mga tawo miabot og mga lima ka libo. Sa pagsunod adlaw, ang mga pangulo ug ang mga kadagkoan sa mga Judio, ug ang mga magtutudlo sa Balaod nagtigom sa Jerusalem. Nakigkita sila sa Pangulong Pari nga si Anas, ingon man kang Caifas, ug kang Juan, ug kang Alejandro, ug sa ubang mga sakop sa banay sa Pangulong Pari. Ilang gipaatubang kanila ang mga apostoles ug gipangutana, "Giunsa man ninyo kini pagbuhat? Unsa bang gahuma ang anaa kaninyo, ug kinsa mang ngalan ang gigamit ninyo?" Si Pedro nga napuno sa Espiritu Santo mitubag kanila, "Mga pangulo sa katawhan ug mga kadagkoan sa Templo: kon kami gisukit-sukit karon mahitungod sa maayong buhat nga nahimo alang sa bakol, ug sa unsang paagiha siya naayo, nan angay masayod kamong tanan ug ang tanang katawhan sa Israel, nga kining tawhana nga nagtindog dinhi sa inyong atubangan naayo sa hingpit pinaagi sa gahum sa ngalan ni JesuCristo nga Nazaretnon—kadtong inyong gilansang sa krus ug unya gibanhaw sa Dios. Si Jesus mao ang gihisgutan sa kasulatan nga nag-ingon, 'Ang bato nga gisalikway ninyong mga magtutukod og balay Nahimo hinoon nga labing importanting bato.' Ang kaluwasan makaplagan lamang diha kaniya, kay wala nay laing ngalan sa tibuok kalibutan nga gihatag sa Dios ngadto sa katawhan nga makaluwas kanato."

SALMO RESPONSORYO

Ps. 118:1-2, 4, 22-24, 25-27

R. Ang bato nga gisalikway sa mga magtutukod nahimong ulohang bato sa kanto. / R. Aleluya.

Pasalamati ninyo ang Ginoo, kay siya maayo, kay ang iyang kaluoy nagalungtad hangtod sa kahangturan. Paingna ang balay ni Israel, "Ang iyang kaluoy nagalungtad hangtod sa kahangturan." Paingna sila nga mahadlokon sa Ginoo, "Ang iyang kaluoy nagalungtad hangtod sa kahangturan." (R)

Ang bato nga gisalikway sa mga magtutukod nahimong ulohang bato sa kanto. Sa Ginoo nahimo kini: katingalahan kini atubangan sa atong mga mata. Mao kini ang adlaw nga gibuhat sa Ginoo; maglipay kita ug magsadya niini. (R)

O Ginoo, itugot kanamo ang kaluwasan, O Ginoo, itugot kanamo ang kauswagan. Daygon siya nga nagaanhi sa ngalan sa Ginoo; daygon ikaw namo gikan sa balay sa Ginoo. Ang Ginoong Dios, gihatagan kita niya sa kahayag. (R)

BERSO SA DILI PA ANG EBANGHELYO

Ps. 118:24

Aleluya! Mao kini ang adlaw nga gihimo sa Ginoo; magsadya kita ug magmaya. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 21:1-14

Human niini, nagpakita na usab si Jesus sa iyang mga tinun-an didto sa Lanaw sa Tiberias. Ang iyang pagpakita ingon niini: nagkatigom sila si Simon Pedro, si Tomas (nga ginganlag Kaluha), si Natanael (nga taga-Cana sa Galilea), ang mga anak ni Sebedeo, ug ang duha ka laing tinun-an. Miingon si Simon Pedro, "Managat ako." Sila miingon, "Mouban kami." Busa nanlakaw sila ug nanakay sa sakayan apan wala gayod silay nakuha tibuok gabii. Sa pagsubang na sa adlaw, nagbarog si Jesus didto sa lapyahan, apan wala makaila ang mga tinun-an nga si Jesus diay kadto. Unya miingon siya kanila, "Mga higala, nakakuha ba kamo?" Sila mitubag, "Wala gayud." Siya miingon kanila, "Itaktak ang inyong pukot dapit sa tuo sa sakayan ug makakuha kamo." Busa gitaktak nila ang ilang pukot ug wala na sila makadaog pagbira niini, kay daghan man kaayo ang ilang nakuha. Ang tinun-an nga gimahal ni Jesus miingon kang Pedro, "Ang Ginoo kana!" Sa pagkadungog ni Simon Pedro nga ang Ginoo diay kadto, gitapis niya ang iyang sapaw, kay naghubo man siya, ug miambak sa tubig. Ang ubang mga tinun-an nangadto sa lapyahan sakay sa sakayan, nagbira sa pukot nga puno sa isda. Dili sila layo kaayo sa lapyahan—mga kasiyaman ka metros lamang. Sa pagkawas na nila, nakita nila didto ang usa ka tapok sa binagang uling nga may isda nga gisugba ug may pan usab. Unya miingon si Jesus kanila, "Pagdala kamo diri og pipila ka buok sa isda nga inyong nakuha." Busa misakay si Simon Pedro ug gibira niya sa lapyahan ang pukot nga napuno sa mga dagkong isda; usa ka gatos ug kalim-an ug tulo ka buok ang tanan. Apan bisan pa sa kadaghan sa ilang nakuha, wala gayod magisi ang pukot. Unya miingon si Jesus kanila. "Dali ngari ug pangaon kamo." Walay usa sa mga tinun-an nga nangahas pagpangutana kaniya kon kinsa siya, kay nakaila man sila nga siya mao ang Ginoo. Busa miduol si Jesus ug gikuha niya ang pan ug gihatag kanila; gihatag usab niya ang isda. Ikatulo kining pagpakita ni Jesus ngadto sa mga tinun-an human siya mabanhaw.