⚪ [S] Huwebes sa Oktaba sa Pasko sa Pagkabanhaw

PAGBASA GIKAN SA MGA BUHAT SA MGA APOSTOLES

Acts 3:11-26

Samtang nagkupot kang Pedro ug kang Juan ang bakol nga naayo. ang tanang mga tawo natingala ug nanagan ngadto kanila sa dapit nga ginganlag Portico ni Salomon. Sa pagkakita ni Pedro sa mga tawo, miingon siya kanila, "Mga taga-Israel, nganong nahibulong man kamo niini ug inyo man kaming gitutokan? Naghunahuna ba kamo nga gumikan sa among kaugalingong gahum o sa among pagkadiosnon nakapalakaw kami niining tawhana? Ang Dios ni Abraham, ni Isaac, ug ni Jacob, ang Dios sa atong mga katigulangan, nagpasidungog sa iyang Sulugoon nga si Jesus. Apan inyo siyang gitugyan sa kagamhanan, ug sa atubangan ni Pilato inyo siyang gisalikway bisan kon si Pilato nakahukom nga buhian siya. Siya ang Balaan ug ang Matarong, apan wala ninyo siya dawata ug inyo hinuong gihangyo si Pilato nga maoy iyang buhian ang usa ka mamumuno. Ug gipatay ninyo ang Tinubdan sa Kinabuhi, apan gibanhaw siya sa Dios ug kamo mga saksi niini. Ug ang gahum sa ngalan ni Jesus nga among gituohan maoy nakaayo niining tawhana nga inyong nakita ug nailhan. Ang pagtuo kang Jesus maoy nakaayo kaniya sumala sa inyong nakita. "Ug karon, mga kaigsuonan, nahibalo ako nga wala kamo masayod sa gibuhat ninyo ug sa inyong mga pangulo batok kang Jesus. Dugay na kaayong gipahibalo sa Dios pinaagi sa tanan niyang mga propeta nga kinahanglan mag-antus ang Mesiyas; ug gituman kini sa Dios niining paagiha. Dugay na kaayong gipahibalo sa Dios pinaagi sa tanan niyang mga propeta nga kinahanglan mag-antus ang Mesiyas; ug gituman kini sa Dios niining paagiha. aron moabot kaninyo ang panahon sa espirituhanong kusog gikan sa Ginoo, ug unya ipadala niya si Jesus, ang Mesiyas nga iya nang gipili alang kaninyo. Kinahanglan magpabilin siya sa Iangit hangtud moabot ang panahon nga bag-ohon ang tanang mga butang, sumala sa gipahibalo sa Dios pinaagi sa iyang balaang mga propeta sa karaang panahon. Kay si Moises miingon, 'Ang Ginoo nga inyong Dios magpadala kaninyo og propeta nga inyong kaliwat ingon nga siya nagpadala kanako. Kinahanglan tumanon ninyo ang tanan nga iyang isulti kaninyo. Ang dili motuman sa isulti sa maong propeta hinginlan gikan sa katawhan sa Dios ug puohon. 'Ug ang mga propeta sukad kang Samuel naghisgot usab mahitungod niining mga adlawa. Ang mga saad sa Dios pinaagi sa iyang mga propeta alang man kaninyo, ug kamo nakaambit sa kasabutan nga gihimo sa Dios uban sa inyong mga katigulangan. Ingon sa gisulti niya kang Abraham, 'Pinaagi sa imong kaliwat panalanginan ko ang tanang katawhan sa yuta.' Busa gipili sa Dios ang iyang Sulugoon ug gipadala pag-una nganha kaninyo aron pagpanalangin kaninyo pinaagi sa pagpabiya ninyo sa inyong dautang mga buhat."

SALMO RESPONSORYO

Ps. 8:2, 5, 6-7, 8-9

R. O Ginoo, akong Dios, pagkatingalahan sa imong ngalan diha sa tibuok kalibutan. / R. Aleluya.

O Ginoo, among Ginoo, pagkamahimayaon sa imong ngalan sa tibuok nga kalibutan. Unsa ba ang tawo nga nanumbaling ka man kaniya, o ang anak sa tawo nga nag-alima ka man kaniya? (R)

Gihimo mo siya nga ubos lamang og diyutay sa mga anghel, ug gipurongpurongan mo siya sa himaya ug kadungganan. Gipamando mo siya sa mga buhat sa imong mga kamut, gibutang mo ang tanan ubos sa iyang tiilan. (R)

Ang tanang mga karnero ug kabakahan, ang mga hayop sa kaumahan. Ang mga langgam sa kahanginan, ang mga isda sa kadagatan, ug bisan unsa nga nagalangoy sa kalawran. (R)

BERSO SA DILI PA ANG EBANGHELYO

Ps. 118:24

Aleluya! Mao kini ang adlaw nga gihimo sa Ginoo; magsadya kita ug magmaya. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 24:35-48

Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan. Samtang nagsugilon pa sila niini, sa kalit mibarog ang Ginoo sa taliwala nila ug miingon, "Ang kalinaw mag-uban kaninyo." Nakurat sila ug nalisang, ug naghunahuna nga nakakita silag Espiritu. Apan miingon siya kanila, "Nganong nabalaka man kamo? Nganong nagduhaduha kamo? Tan-awa ninyo ang akong mga kamut ug mga tiil; ako gayod kini! Hikapa ako ug makita ninyo kay ang Espiritu walay unod ug mga bukog ingon sa nakita ninyo nga ania kanako." Gisulti niya kini ug iyang gipakita kanila ang iyang mga kamut ug mga tiil. Apan wala gihapon sila makatuo; hilabihan ang ilang kalipay ug kahibulong; busa gipangutana sila ni Jesus, "Duna ba kamoy makaon dinhi?" Ug gihatagan nila siya'g usa ka buok sinugbang isda, ug gidawat kini ni Jesus ug gikaon sa ilang atubangan. Unya miingon siya kanila, "Kining mga butanga mao gayod ang akong gisulti kaninyo samtang ako uban pa kaninyo; kinahanglan matuman ang tanan nga nahisulat mahitungod kanako sa Balaod ni Moises ug sa mga sinulat sa mga propeta ingon man sa mga Salmo." Unya gipasabot niya sila sa Kasulatan, ug miingon siya kanila, "Kini mao ang nahisulat: nga ang Mesiyas kinahanglan mag-antus ug unya mabanhaw sa ikatulong adlaw, ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasod, sugod sa Jerusalem. Kamo mga saksi niining mga butanga."