⚪ [S] Miyerkoles sa Oktaba sa Pasko sa Pagkabanhaw

PAGBASA GIKAN SA MGA BUHAT SA MGA APOSTOLES

Acts. 3:1-10

Usa niana ka adlaw, si Pedro ug si Juan miadto sa Templo sa alas tres sa hapon, ang takna sa pag-ampo. Sa ganghaan nga ginganlag Matahum nga Ganghaan, may usa ka tawo nga bakol sukad sa iyang pagkahimugso. Kada adlaw gihatod siya ngadto sa Templo aron magpakilimos. Sa pagkakita niya kang Pedro ug kang Juan nga nanulod sa Templo, nagpalimos siya kanila. Mitutok sila kaniya ug unya miingon si Pedro, "Tan-awa kami!" Busa mitan-aw ang bakol kanila ug nagpaabot nga hatagan siya'g limos. Ug si Pedro miingon, "Wala akoy kuwarta, apan hatagan ko ikaw niining ania kanako: sa ngalan ni JesuCristo nga Nazaretnon, lakaw!" Unya gigunitan ni Pedro ang tuong kamut sa bakol ug gitabangan siya pagpatindog. Dihadiha nalig-on ang tiil ug buolbuol sa bakol; milukso siya, mibarug ug milakaw. Unya mikuyog siya kanila ngadto sa Templo, nga naglakaw ug nagluksolukso ug nagdayeg sa Dios. Ang mga tawo nakakita kaniya nga naglakaw ug nagdayeg sa Dios, ug dihang nailhan nila nga siya mao diay ang makililimos nga naglingkuran didto sa ganghaan sa Templo nga ginganlag Matahum nga Ganghaan, natingala pag-ayo silang tanan sa nahitabo kaniya.

SALMO RESPONSORYO

Ps. 105:1-2, 3-4, 6-7, 8-9

R. Ang yuta puno sa kaayo sa Ginoo. / R. Aleluya.

Pasalamati ang Ginoo, sangpita ang iyang ngalan, isangyaw sa kanasuran ang iyang mga binuhatan. Awiti siya, awiti ang iyang pagdayeg, isangyaw ang tanan niyang katingalahang mga buhat. (R)

Himayaa ang iyang balaang ngalan; pagsadya kamo, O mga kasingkasing nga nangita sa Ginoo. Paabota ang Ginoo diha sa gahum; paningkamuti ang pag-alagad kaniya sa kanunay. (R)

Kamong mga kaliwat ni Abraham, iyang mga sulugoon, mga anak ni Jacob, iyang mga pinili. Siya, ang Ginoo, mao ang atong Dios; sa tibuok yuta nagahari ang iyang panghukom. (R)

Mahinumdom siya sa kahangturan sa iyang kasabutan nga iyang gipalungtad sa usa ka libo ka mga kaliwatan. Nga iyang gihimo tali kang Abraham ug pinaagi sa iyang panumpa kang Isaac. (R)

BERSO SA DILI PA ANG EBANGHELYO

Ps. 118:24

Aleluya! Mao kini ang adlaw nga gihimo sa Ginoo; magsadya kita ug magmaya. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 24:13-35

Sa maong adlaw, duha kanila naglakaw paingon sa usa ka balangay nga ginganla'g Emmaus, mga napulog-usa ka kilometro gikan sa Jerusalem, ug nagsultihanay sila mahitungod sa tanang mga butang nga nahitabo. Samtang nagsultihanay sila, miduol si Jesus ug mikuyog kanila; nakita nila siya, apan wala sila makaila kaniya. Unya miingon si Jesus kanila, "Unsa bay inyong gipanagsultihan samtang naglakaw kamo?" Mihunong sila nga subo og panagway. Ug ang usa kanila nga ginganlag Cleopas, nangutana kaniya, "Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?" "Unsang mga hitaboa?" nangutana siya. "Ang nahitabo kang Jesus nga Nazaretnon," mitubag sila. "Usa siya ka propeta, ug giila sa Dios ug sa tanang mga tawo nga gamhanan sa pulong ug sa buhat. Ang mga kadagkoan sa mga pari ug ang mga punoan mitugyan kaniya aron silotan siya sa kamatayon, ug gilansang nila siya sa krus. Naglaum unta kami nga kadto siya mao ang moluwas sa Israel! Labot pa niini, ikatulong adlaw na karon sukad kini nahitabo. Ug pipila sa mga babaye nga among mga kauban nakapakurat kanamo; nangadlawon sila pag-adto sa lubnganan, apan wala nila hikaplagi didto ang iyang lawas. Ug namalik sila ug nanugilon nga nakakita kuno sila'g panan-awon diin may mga anghel nga misulti kanila nga buhi siya. Ug pipila sa among mga kauban nangadto sa Iubnganan, ug nakaplagan nila kini sumala gayod sa gisugilon sa mga babaye, apan wala sila makakita kaniya." Unya miingon si Jesus kanila, "Pagkabuang gayod ninyo! Pagkadugay ninyong motuo sa tanang gisulti sa mga propeta! Dili ba kinahanglan man nga mag-antus ang Mesiyas niining mga butanga ug unya mosulod sa iyang himaya?" Ug gipasabot ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtud sa mga sinulat sa tanang propeta. Niadtong tungora duol na sila sa balangay nga ilang adtoan, ug nagpasabot si Jesus nga daw mopadayon lang siya sa unahan; apan gihawiran nila siya ug giingnan, "Anhi lang ta mamahulay kay hapit na magabii." Busa midayon siya ug nagpabilin uban kanila. Sa ila nang pagpanihapon, mikuha siya sa pan ug gipanalanginan niya kini; unya gipikaspikas niya ug gihatag kanila. Dihadiha nabuka ang ilang mga mata ug nakaila sila kaniya, apan nahanaw siya. Nag-ingnanay sila, "Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?" Ug nanindog sila dayon ug namalik sa Jerusalem, diin hikaplagan nila ang napulog-usa ka tinun-an ug ang uban pa nga nagkatigum, ug nag-ingon, "Tinuod gayod nga nabanhaw ang Ginoo! Si Simon nakakita kaniya!" Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan.