PAGBASA GIKAN SA BASAHON NI PROPETA ISAIAS
Is. 6:1-3, 6, 8-9
Ania kanako ang espiritu sa akong Ginoong Dios kay gipili ug gipadala man ako niya aron pagsangyaw og maayong balita ngadto sa mga kabus; gipadala niya ako aron paglipay sa mga masulob-on ug pagpagawas sa mga binilanggo ug mga binihag. Gipadala niya ako aron pagmantala nga miabot na ang panahon nga luwason sa Ginoo ang iyang katawhan ug panimaslan ang ilang kaaway. Gipadala niya ako aron paghupay niadtong nagsubo, ug naghatag kalipay inay kagul-anan niadtong nagbangotan sa Sion, awit sa pagdayeg inay kasubo, aron molipang sila sama sa kakahoyan, nga gitanom sa Ginoo alang sa iyang kadungganan. Kamo tawagon nga mga pari sa Ginoo, nganlan kamo sa mga tawo nga alagad sa Dios; magkaon kamo sa kadato sa kanasuran, ug magpahimus sa ilang bahandi. Ang Ginoo miingon, "Gusto ko ang hustisya; gikasilagan ko ang pagpahimulos ug ang pagpanlupig; gantihan ko ang akong katawhan sa angay gayod kanila, ug maghimo akog kasabutan nga dayon uban kanila. Mahimong bantugan ang ilang kaliwatan sa tibuok kalibutan, ug ang tanan nga makakita kanila moila nga sila katawhan nga gipanalanginan sa Ginoo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 88:21-22, 25, 27
R. Sa kanunay awitan ko ang kaayo sa Ginoo.
Hikaplagan ko si David akong sulogoon; sa akong balaan nga lana gidihogan ko siya, aron ang akong kamot sa kanunay maanaa uban kaniya, ug ang akong bukton maghimo kaniyang makusganon. (R)
Ang akong kamatinud-anon ug akong kaluoy magauban kaniya; ug pinaagi sa akong ngalan mabayaw ang iyang gahom. "Moingon siya kanako, 'Ikaw ang akong amahan, akong Dios, ang bato, ang akong manunubos.'" (R)
PAGBASA GIKAN SA BASAHON SA GIPADAYAG
Rev. 1:5-8
Ug gikan kang Jesukristo, ang kasaligang saksi, ang unang gibanhaw, nga mao usab ang nagmando sa mga hari sa kalibutan. Gihigugma kita niya ug pinaagi sa iyang kamatayon giluwag kita niya sa atong mga sala, ug gihimong usa ka gingharian sa mga pari aron mag-alagad sa iyang Dios ug Amahan. Iya ni Jesukristo ang dungog ug gahom sa walay katapusan! Amen. Moanha siya uban sa mga panganod, ug makita gayod siya sa tanan lakip sa naglansang kaniya. Maghilak sa kaguol ang tanang katawhan sa yuta tungod kaniya. Tinuod gayod kini! Amen. "Ako ang Alpa ug Omega", nag-ingon ang Ginoong Dios nga labing gamhanan, ang Dios karon, kaniadto, ug ang moanha.
ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO
Is. 61:1 (Lk. 4:18)
Aleluya! Ang Espiritu sa Ginoo ania kanako. Gidihugan ako niya aron pagsangyaw sa maayong balita ngadto sa mga kabos. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 4:16-21
Unya miadto si Jesus sa Nazaret diin didto siya magdako, ug ingon sa naandan, miadto siya sa sinagoga sa adlaw nga igpapahulay. Mitindog siya aron pagbasa sa kasulatan, ug gitunulan siya sa basahon nga sinulat ni propeta Isaias. Gibukhad niya ang linukot nga basahon ug maoy iyang gibasa ang dapit diin nasulat kini: "Ang Espiritu sa Ginoo ania kanako. Gidihugan ako niya aron pagsangyaw sa maayong balita ngadto sa mga kabos, gipadala ako niya aron pagsangyaw sa kagawasan ngadto sa mga binihag, ug pagpahiuli sa panan-aw sa mga buta; pagpagawas sa mga dinaugdaug ug pagpahibalo sa tuig nga ang Ginoo moluwas sa iyang katawhan!"
ANG EBANGHELYO SA GINOO.
DAYGON IKAW, O KRISTO.
