PAGBASA GIKAN SA BASAHON NI PROPETA ISAIAS
Is. 50:4-9
Gitudloan ako sa Ginoong Dios sa angay kong isulti aron mahibalo akong modasig niadtong gikapuyan. Matag buntag gidasig niya ako sa pagpaminaw sa buot niyang itudlo kanako. Giablihan sa Ginoo ang akong salabutan, ug wala ako mosupil ni mobiya kaniya. Gipatara ko ang akong likod niadtong buot mohampak kanako, ug ang akong aping ngadto sa mga milabnot sa akong bungot; wala ko ilingiw ang akong nawong sa nagbugalbugal ug nagluwa kanako. Kay mitabang man kanako ang Ginoong Dios, busa wala ako maunsa; ug gitaon ko ang akong nawong ingon sa batong bantilis, ug nasayod ako nga dili gayod ako maulawan; ang molaban sa akong katungod ania sa akong duol. Kinsay makig-away kanako? Magdungan kita pag-adto sa hukmanan. Kinsay akong kaaway? Paduola siya kanako. Mitabang kanako ang Ginoong Dios, kinsay moingon nga sad-an ako? Mangadunot silang tanan sama sa bisti; ug kutkoton sila sa tangkob.
ANG PULONG SA GINOO.
SALAMAT SA DIOS.
SALMO RESPONSORYO
Ps. 68:8-10, 21-22, 31, 33-34
R. Ginoo, diha sa imong dakong gugma, tubaga ako.
Tungod kanimo giantos ko ang insulto, nalumos ang akong nawong sa kaulaw. Nahimo akong sinalikway sa akong mga igsuon, usa ka langyaw alang sa mga anak sa akong inahan, Kay ang kasilag alang sa imong balay nagaut-ut kanako, ug ang mga insulto kanila nga nangulipas kanimo natingob diri kanako. (R)
Ang insulto nakasamad sa akong kasingkasing, ug naluya ako, nangita ako nga may malouy unta kanako, apan walay bisan usa; nga maghuhupay, ug wala akoy hikaplagan. Hinoon gibutangan nilag apdo ang akong kalan-on, ug sa akong kauhaw gitagaan ako nila og suka aron imnon. (R)
Daygon ko ang ngalan sa Ginoo diha sa awit, ug himayaon ko siya uban sa pasalamat;"Tan-awa, kamong mga mapaubsanon, ug pagsadya; kamo nga nangita sa Ginoo, malipay unta ang inyong mga kasingkasing. Kay ang Ginoo magpatalinghug sa kabus. Ug ang mga iyaha nga gigapos dili niya tamayon." (R)
BERSO SA DILI PA ANG EBANGHELYO
Aleluya! Maghimaya ka, among Hari, ikaw nga mapuangoron sa among mga kasaypanan. Aleluya!
Aleluya! Maghimaya ka, among Hari nga masinugtanon sa Amahan! Gidala ka aron ilansang sa krus, ingon og malumo nga kordero aron patyon. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 26:14-25
Usa sa napulog-duha ka tinun-an, ang ginganlag Judas Iscariote miadto sa kadagkoan sa mga pari ug miingon, "Unsa may inyong ihatag kanako kon itugyan ko kaninyo si Jesus?" Miihap sila og katloan ka salapi nga sinsilyo ug gihatag kaniya. Sukad niadtong adlawa si Judas nangitag maayong higayon sa pagbudhi kang Jesus. Sa unang adlaw sa Pangilin sa Pan nga Walay Patubo, ang mga tinun-an miadto kang Jesus ug nangutana kaniya, "Asa man nimo ipahikay kanamo ang panihapon sa Pangilin sa Pagsaylo?" Si Jesus miingon kanila, "Adtoa ninyo ang usa ka tawo didto sa siyudad ug ingna siya, 'Ang Magtutudlo nag-ingon, Miabot na ang akong oras; ang akong mga tinun-an ug ako magsaulog sa Pangilin sa Pagsaylo didto sa imong balay.'" Ug gibuhat sa mga tinun-an ang giingon ni Jesus kanila ug gihikay nila ang panihapon. Sa pagkagabii, si Jesus ug ang napulog-duha sa tinun-an mitambong sa kan-anan. Ug samtang nangaon sila miingon si Jesus, "Sultihan ko kamo, usa kaninyo magbudhi kanako." Nangaguol pag-ayo ang mga tinun-an ug ang tagsatagsa kanila nangutana kaniya, "Ginoo, ako ba ang gipasabut mo?" Si Jesus mitubag, "Ang nagtuslob sa pan uban kanako niining panaksan maoy magbudhi kanako. Ang Anak sa Tawo mamatay sumala sa giingon sa Kasulatan, apan alaot siya nga magbudhi sa Anak sa Tawo! Maayo pa lang untag wala siya matawo!"Si Judas, ang mabudhion, miingon, "Magtutudlo, ako ba ang gipasabot mo?" Si Jesus mitubag, "Giingon mo."
ANG EBANGHELYO SA GINOO.
DAYGON IKAW, O KRISTO.
