PAGBASA GIKAN SA BASAHON NI PROPETA ISAIAS
Is. 49:1-6
Pamati kanako, O kapuloan, ug patalinghug, kamong katawhan nga atua sa layo. Gipili ako sa Ginoo didto pa sa tiyan sa akong inahan; gihatagan ako niya sa akong ngalan. Gihimo niya ang akong dila sama sa usa ka hait nga espada; gipanalipdan ako niya diha sa landong sa iyang kamut, gihimo ako niya nga usa ka talinis nga udyong ug gitagoan ako niya diha sa iyang sudlanag pana. Ug giingnan ako niya, "Israel, sulugoon ko ikaw, ug pasidunggan ako tungod kanimo." Apan miingon ako, "Kawang lamang ang akong kahago; gigamit ko ang akong kusog sa wala lamay hinungdan." Apan siya ang mohatag kanako'g hustisya ug ang moganti kanako. Sa wala pa gani ako matawo gipili na ako sa Ginoo aron pagtigom sa nagkatibulaag nga katawhan sa Israel. Gipasidunggan ako niya ug gihatagag gahum. Miingon ang Ginoo kanako, "May mas dako pang bulohaton nga akong ipabuhat kanimo aron pagpatunhay sa mga banay ni Israel ug sa pagpahiuli sa nasalin niya; ug himoon ko ikaw nga kahayag sa kanasuran, aron ang akong kaluwasan modangat sa kinasuokan sa kalibutan."
ANG PULONG SA GINOO.
SALAMAT SA DIOS.
SALMO RESPONSORYO
Ps. 70:1-2, 3-4, 5-6, 15, 17
R. Awitan ko ang imong kaluwasan.
Kanimo, O Ginoo, nagadangop ako; ayaw gayod itugot nga ako kaulawan. Sa imong katarong luwasa ako ug palingkawasa ako; ipaabong ang imong dunggan kanako, ug tubaga ako. (R)
Pagpakahimong akong matuod nga dalangpanan, usa ka kota nga manalipod kanako, Kay ikaw man ang akong Bato ug akong Kota. O Dios ko, luwasa ako sa kamut sa dautan. (R)
Kay ikaw ang akong kalauman, O Ginoo; ang akong gisaligan, O Dios gikan sa akong kabatan-on. Kanimo nagasalig ako sukad sa akong pagkatawo; gikan sa tiyan sa akong inahan, ikaw ang akong kusog. (R)
Magsangyaw ang akong ba-ba sa imong katarong, adlaw-adlaw magsangyaw sa imong kaluwasan, bisan wala ako mahibalo sa ilang gidak-on. O Dios, gitudloan mo ako sukad sa akong kabatan-on, ug hangtud karon, magasangyaw ako sa imong mga buhat nga katingalahan. (R)
BERSO SA DILI PA ANG EBANGHELYO
Aleluya! Maghimaya ka, among Hari nga masinugtanon sa Amahan! Gidala ka aron ilansang sa krus, ingon og malumo nga kordero aron patyon. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 13:21-33, 36-38
Nasubo si Jesus pag-ayo ug miingon sa walay lipodlipod ngadto sa iyang mga tinun-an, "Sultihan ko kamo: usa kaninyo magbudhi kanako." Nagtinan-away ang mga tinun-an ug nahibulong pag-ayo kon kinsa kaha ang iyang gipasabot. Usa sa mga tinun-an nga gimahal ni Jesus naglingkod tupad kaniya. Si Simon Pedro misinyas kaniya ug miingon, "Pangutan-a si Jesus kon kinsa ang iyang gipasabot." Busa ang maong tinun-an midip-ig kang Jesus ug nangutana, "Kinsa man siya, Ginoo?" Si Jesus mitubag, "Ituslob ko ang pan sa panaksan ug ihatag ko sa magbudhi kanako." Busa mikuha siya'g pan ug gituslob niya kini sa panaksan ug gihatag kang Judas, ang anak ni Simon Iscariote. Sa pagdawat ni Judas sa pan, si Satanas misulod kaniya. Miingon kaniya si Jesus, "Buhata dayon ang buot mong buhaton!" Walay usa niadtong didto sa kan-anan nga nakasabut nganong gisulti kadto ni Jesus kang Judas. Ug sanglit si Judas man ang nagkupot sa puntil sa kwarta, pipila sa mga tinun-an naghunahuna nga gipalakaw siya ni Jesus aron pagpalit sa ilang gikinahanglan alang sa pangilin, o kaha may ipahatag si Jesus ngadto sa mga kabus. Gidawat ni Judas ang pan ug midali siya paggula. Gabii kadto. Sa nakalakaw na si Judas, miingon si Jesus, "Karon ang himaya sa Anak sa Tawo gipadayag, ug ang himaya sa Dios gipadayag pinaagi kaniya. Ug kon ang himaya sa Dios gipadayag pinaagi kaniya, nan ang Dios magpadayag diha kaniya sa himaya sa Anak sa Tawo, ug kini iyang buhaton dayon. Mga anak, dili na ako magdugay uban kaninyo. Mangita kamo kanako, apan sultihan ko kamo karon sa akong gisulti sa mga Judio, 'Dili kamo makaadto sa akong adtoan.'" Si Simon Pedro nangutana kaniya, "Ginoo, asa ka man moadto?" Si Jesus mitubag, "Dili ka pa karon makaadto sa akong adtoan, apan makaadto ka ra unya." Si Pedro nangutana, "Ginoo, nganong dili man ako makauban kanimo karon? Andam ako pagpakamatay alang kanimo!" Si Jesus mitubag, "Andam ka ba gayod pagpakamatay alang kanako? Sultihan ko ikaw: sa dili pa motuktugaok ang manok, ilimod mo na ako sa makatulo."
ANG EBANGHELYO SA GINOO.
DAYGON IKAW, O KRISTO.
