PAGBASA GIKAN SA BASAHON NI PROPETA ISAIAS
Is. 42:1-7
Ang Ginoo miingon, "Tan-awa ang akong alagad, nga akong gitabangan, akong pinili, ug gikahimut-an nako pag-ayo; gihatagan ko siya'g gahum, hatagan niya'g hustisya ang kanasoran. Dili siya mosinggit ni motuwaw, ni maghimo siya'g masaba nga pakigpulong sa kadalanan; maluloy-on siya sa mga huyang, ug matinabangon sa mga timawa; ipatuman gayod niya ang hustisya. Dili gayod siya molunga ni maluya hangtud nga mapatunhay niya ang hustisya dinhi sa kalibotan; ug ang kapuloan magpaabot sa iyang balaod." Mao kini ang giingon sa Dios, ang Ginoo, nga maoy nagbuhat sa kalangitan ug naghikyad niini, siya maoy nag-umol sa kalibotan ug sa mga butang nga anaa niini. Siya maoy naghatag gininhawa sa katawhan ug kinabuhi sa tanang binuhat. Ug karon ang Ginoong Dios nag-ingon sa iyang sulugoon, "Ako, ang Ginoo, nagtawag kanimo aron labanan mo ang katarong, pinaagi kanimo maghimo ako'g kasabotan uban sa tanang katawhan ug himoon ko ikaw'ng kahayag sa kanasoran, aron pagpabuka sa mata sa mga buta ug pagpagawas sa mga binilanggo sa mangitngit nga bilanggoan."
ANG PULONG SA GINOO.
SALAMAT SA DIOS.
SALMO RESPONSORYO
Ps. 26:1-2, 3, 13-14
R. Ang Ginoo maoy akong kahayag ug akong kaluwasan.
Ang Ginoo maoy akong kahayag ug akong kaluwasan, kinsa may akong kalisangan?Ang Ginoo maoy dalangpanan sa akong kinabuhi; kinsa pa may akong kahadlokan? (R)
Sa pagduol kanako sa mga dautan aron paglamoy sa akong unod, ang akong mga kaatbang ug mga kaaway sila mismo nangasukamod ug nangapukan. (R)
Bisan kasundalohan magpundok batok kanako, dili malisang ang akong kasingkasing; bisan may gubat pa batok kanako, bisan pa niana mosalig gayod ako. (R)
Gituohan ko nga makakita ako sa kaayo sa Ginoo didto sa yuta sa mga buhi. Paabota sa walay kahadlok ang Ginoo; pagmalig-on sa kasingkasing, ug paabota ang Ginoo. (R)
BERSO SA DILI PA ANG EBANGHELYO
Aleluya! Maghimaya, among Hari! Ikaw lamang ang naluoy sa among mga sayop. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 12:1-11
Unom ka adlaw sa wala pa ang Pangilin sa Pagsaylo, miadto si Jesus sa Betania diin magpuyo si Lazaro, ang gibanhaw ni Jesus. Naghikay sila'g panihapon alang kaniya ug si Marta maoy nagsilbi, samtang si Lazaro usa sa mga mitambong sa kan-anan uban kang Jesus. Unya si Maria mikuha'g tunga sa kilong pahumot nga mahal kaayo nga hinimo gikan sa lunsay'ng nardo. Gibubo niya kini sa tiil ni Jesus ug unya gipahiran sa iyang buhok. Ang tibuok balay nalukop sa kaamyon sa pahumot. Unya usa sa mga tinun-an ni Jesus, si Judas Iscariote, ang magbudhi kaniya, miingon, "Nganong wala man hinoon ibaligya kining pahumot og tulo ka gatos ka denario aron ang halin ihatag ngadto sa mga kabus?" Gisulti niya kini dili tungod kay naluoy siya sa kabus, kondili tungod kay kawatan siya; siya man god maoy gipiyalan sa puntil nga sudlanan sa kwarta ug nabatasan niya ang pagpangawkaw niini. Apan si Jesus miingon, "Pasagdi siya ug ayaw siya'g did-i nga itagana kini niya alang sa adlaw sa paglubong kanako. Ang mga kabus kanunay nga inyong ikauban, apan ako dili kanunay'ng uban kaninyo." Sa laing bahin, usa ka dakong pundok sa mga Judio nakabalita nga si Jesus didto sa Betania, busa nangadto sila didto. Nangadto sila dili lamang tungod kang Jesus, kondili aron pagtan-aw kang Lazaro nga gibanhaw ni Jesus. Tungod niini ang mga kadagkoan sa mga pari naglaraw sa pagpatay usab kang Lazaro, kay tungod kaniya daghan sa mga Judio namiya sa ilang mga pangulo ug mituo kang Jesus.
ANG EBANGHELYO SA GINOO.
DAYGON IKAW, O KRISTO.
