🟣 Sabado sa Ikalimang Semana sa Kwaresma

PAGBASA GIKAN SA BASAHON NI PROPETA EZEQUIEL

Ez. 37:21-28

Mao kini ang giingon sa Ginoong Dios: "Kuhaon ko ang katawhan sa Israel gikan sa mga nasud nga nagbihag kanila ug tigomon ko silang tanan, ug dad-on ko sila balik sa ilang kaugalingong yuta. Himoon ko silang usa ka nasud sa yuta nga anaa sa kabukiran sa Israel. Ug usa na lamang ka hari ang magmando kanila kay dili na sila duha ka nasud ug duha ka gingharian. Dili na nila hugawhugawan ang ilang kaugalingon pinaagi sa mga diosdios ug sa hugaw nilang mga buhat. Luwason ko sila gikan sa ilang pagkahisalaag sa sala, ug hinloan ko sila, ug sila mahimong akong katawhan ug ako mailang Dios. "Maghari kanila ang hari nga sama sa akong sulugoon nga si David, ug usa ray ilang magbalantay. Tumanon nila ang akong mga sugo ug bantayan nila ang akong mga lagda. Magpuyo sila sa yuta nga gipuy-an sa ilang mga ginikanan; yuta kini nga gihatag ko kang Jacob nga akong sulugoon, ug didto magpuyo sila ingon man ang ilang kaliwatan. Maoy mangulo kanila ang hari nga sama kang David nga akong sulugoon hangtud sa kahangturan. Himoon ko ang usa ka kasabutan sa pakigdait uban kanila—kasabutan nga walay pagkabalhin. Panalanginan ko sila ug padaghanon, ug ibutang ko ang akong Templo sa taliwala nila hangtud sa kahangturan. Magpuyo ako uban kanila ug ako mailang Dios ug sila maakong katawhan. Unya hisayran sa mga nasud nga ako, ang Ginoo, nagbalaan sa Israel, kon ang akong Templo anha na sa taliwala nila hangtud sa kahangturan."

SALMO RESPONSORYO

Jer. 31:10, 11-12, 13

R. Ang Ginoo magbantay kanato, maingon sa usa ka magbalantay nga nagbantay sa iyang panon.

Pamati-a O mga nasud, isangyaw kini sa lagyo nga mga yuta, ug ingna: Siya nga nagpatibulaag sa Israel, nagatigom karon kanila, nagabantay siya kanila ingon sa usa ka magbalantay sa iyang panon. (R)

Ang Ginoo maglukat kang Jacob, magluwas siya kaniya gikan sa kamut sa iyang kaaway. Sa pagsinggit, motungas sila sa katumyan sa Sion, magnayan sila ngadto sa mga panalangin sa Ginoo; Ang trigo, ang bino, ug ang lana, ang karnero ug ang mga baka. (R)

Unya ang mga dalaga magsadya ug mosayaw, ang mga batan-on nga mga lalaki ug usab ang mga tigulang. Himoon ko ang ilang pagbangutan nga kasadya, lipayon ko ug hupayon ko sila human sa ilang mga kasubo. (R)

BERSO SA DILI PA ANG EBANGHELYO

Ez. 18:31

Aleluya! Biyae ninyo ang tanan ninyong mga sala; himoa ang usa ka bag-ong kasing-kasing ug bag-ong Espiritu. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 11:45-56

Daghan sa mga Judio nga miduaw kang Maria nakakita sa gibuhat ni Jesus ug mituo sila kaniya. Apan ang uban kanila miadto sa mga Pariseo ug misugilon kanila sa gibuhat ni Jesus. Busa ang mga Pariseo ug ang mga kadagkoan sa mga pari mitawag og tigom sa Labawng Hukmanan ug miingon, "Unsa may atong buhaton nga kining tawhana naghimo mag daghang milagro? Kon pasagdan ta siya, ang tanan motuo kaniya, ug manganhi ang mga Romanhon ug gun-obon nila ang Templo ug ang tibuok nasud!" Usa kanila nga ginganlag Caifas, nga mao ang Pangulong Pari niadtong tuiga, miingon, "Wala kamoy alamag! Wala ba kamo mahibalo nga mas maayo alang kaninyo nga usa ra ka tawo ang mamatay alang sa katawhan kay sa malaglag ang tibuok nasod?" Gisulti niya kini dili sa iyang kaugalingong kabubut-on kondili ingon nga Pangulong Pari, niadtong tuiga, nagtagna siya nga si Jesus kinahanglan mamatay alang sa mga Judio ug dili lamang alang kanila, kondili aron pagtigum ug paghiusa sa nagkatibulaag nga mga anak sa Dios. Sukad niadtong adlawa, ang kadagkoan sa mga Judio naglaraw sa pagpatay kang Jesus. Tungod niini si Jesus wala na magpasayasaya paglakaw didto sa Judea, kondili miadto siya sa usa ka dapit nga duol sa kamingawan, sa usa ka lungsod nga ginganlag Efraim, diin nagpabilin siya uban sa iyang mga tinun-an. Ang Pangilin sa Pagsaylo duol na, ug daghan ang nanungas ngadto sa Jerusalem gikan sa kalungsoran aron pagtuman sa seremonyas sa pagpanghinlo sa dili pa moabot ang pangilin. Nangita sila kang Jesus; ug samtang nagkapundok sila didto sa templo, nagpangutan-anay sila, "Unsa may inyong hunahuna? Motambong ba kaha siya sa pangilin?"