PAGBASA GIKAN SA BASAHON NI PROPETA JEREMIAS
Jer. 20:10-13
Nabati ko ang hagawhaw sa katawhan. Gianggaan ako nilag, "Ang Gikalisangan sa Tanang Dapit!" Miingon sila, "Ato siyang pakaulawan!" Bisan ang suod kong mga higala nagtinguha nga mapukan ako. Matud nila, "Basin pag malingla ta siya aron ato siyang madakop ug makapanimalos kita kaniya." Apan ikaw, Ginoo, dapig kanako ug gamhanan kaayo; mangapukan ug mangapakyas gayod sila nga naglutos kanako, ug dili gayod modaug. Maulawan sila pag-ayo kay dili man sila molampos. Ug ang ilang kaulawan walay katapusan ug dili gayod hikalimtan. Apan ikaw, Labing Gamhanang Ginoo, matarong ang pagsulay mo sa mga tawo, kay nasayod ka man sa ilang kasingkasing ug hunahuna. Busa pakit-a ako sa imong pagpanimalos sa akong mga kaaway, kay gitugyan ko ang akong mga mulo sa imong mga kamot. Pag-awit ug dayga ang Ginoo! Giluwas niya ang mga dinaug-daug gikan sa mga tawong dautan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 18:2-3, 3-4, 5-6, 7
R. Sa akong kasakit misangpit ako sa Ginoo, ug iyang gipatalinghogan ang akong tingog.
Nahigugma ako kanimo, O Ginoo, akong kusog, O Ginoo, akong Bato, akong kuta, akong Manluluwas. (R)
Dios ko, akong Bato nga dalangpanan, akong taming, ang kusog sa akong kaluwasan, akong kuta, Daygon unta ang Ginoo, mituwaw ako, ug naluwas ako gikan sa akong mga kaaway. (R)
Ang mga balud sa kamatayon nagalibot kanako, ang makalaglag nga baha milumos kanako; Ang mga gapos sa kahiladman nagabugkos kanako, ang mga lit-ag sa kamatayon nakaapas kanako. (R)
Sa akong kasakit misangpit ako sa Ginoo ug mitawag ako sa akong Dios; Gikan sa iyang Templo gipamati niya ang akong tingog, ug ang akong singgit kaniya miabot sa iyang mga dalunggan. (R)
BERSO SA DILI PA ANG EBANGHELYO
Jn. 6:63c, 68c
Aleluya! O Ginoo, ang imong mga Pulong, Espiritu ug kinabuhi, naghupot ikaw sa mensahe sa kinabuhi nga dayon. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 10:31-42
Unya ang mga Judio mipunit na usab og mga bato aron pagbato kaniya. Si Jesus miingon kanila, "Gipakita ko kaninyo ang daghang maayong buhat nga gisugo kanako sa Amahan; hain man niini ang hinungdan nga inyo man akong batoon?" Ang mga Judio mitubag, "Dili ka namo batoon tungod sa bisan unsang buhat nga maayo, kondili tungod sa imong pagpasipala sa Dios! Tawo ka lamang, apan nagpakaDios ka!" Si Jesus mitubag, "Nahisulat sa inyong kaugalingong Balaod nga ang Dios miingon, 'Mga dios kamo.' Kon sila nga gihatagan sa iyang mensahe gitawag sa Dios nga mga dios ug ang Kasulatan dili man gayod masayop, nan nganong moingon man kamo nga ako nga gipili sa Amahan ug gipadala nganhi sa kalibutan nagpasipala sa Dios sa akong pag-ingon nga ako mao ang Anak sa Dios? Busa ayaw kamo pagtuo kanako kon wala ako magbuhat sa mga buhat sa akong Amahan. Apan kon nagbuhat ako niining mga butanga, tuohi ninyo ang akong mga buhat bisag dili kamo motuo kanako, aron mahibalo kamo nga ang Amahan ania kanako ug ako anaa sa Amahan." Ug dakpon na usab unta nila si Jesus, apan miikyas siya. Si Jesus mibalik pagtabok sa Suba sa Jordan, sa dapit diin namunyag si Juan, ug nagpabilin siya didto. Daghang mga tawo miadto kaniya. Sila miingon, "Si Juan wala magbuhat og mga milagro, apan ang tanan nga iyang gisulti mahitungod niining tawhana tinuod gayod." Ug didto daghan ang mga tawo nga mituo kang Jesus.
ANG EBANGHELYO SA GINOO.
DAYGON IKAW, O KRISTO.
