⚪ [S] Ang Pagpahibalo mahitungod sa Ginoo

PAGBASA GIKAN SA BASAHON NI PROPETA ISAIAS

Is. 7:10-14, 8:10

Misulti pag-usab ang Ginoo kang Acas, "Pangayog milagro sa imong Ginoong Dios, bisag kini adto sa kinahiladman sa Seol, o sa kinatumyan sa langit." Apan miingon si Acas, "Dili ako mangayo, ug dili ko sulayan ang Ginoo." Ug miingon si Isaias, "Busa pamati, O banay ni David! Dili pa ba igo ang imong pagsamok sa mga tawo, nga imo na man usab nga samokon ang Dios? Busa ang Ginoo gayod mohatag kanimog timaan, ug kini mao nga usa ka batan-ong dalaga manamkon ug moanak og usa ka lalaki, ug nganlan niya siyag Emmanuel." Pagsabotsabot kamo, apan kawang lamang ang inyong pagsabotsabot; sulti bisag unsa, apan dili kini magpulos kay ania uban man kanamo ang Dios.

SALMO RESPONSORYO

Ps. 40:7-8, 8-9, 10, 11

R. Ania ako, Ginoo; mianhi ako aron pagtuman sa imong kabubut-on.

Sakripisyo ug halad wala ka mobuot, apan mga dalunggan nga inablihan alang sa pagsugot imong gihatag kanako. Mga hinurot ug sunog o mga halad bayad sa sala wala ka mangita; unya miingon ako, "Ania mianhi ako." (R)

Diha sa basahon gibut-an alang kanako, ang pagbuhat sa imong kabubut-on, O Dios ko, maoy akong kalipay, ug ang imong balaod ania sulod sa akong kasingkasing." (R)

Ang imong katarong wala nako tagoi sulod sa akong kasingkasing bahin sa imong kamatinud-anon ug sa imong kaluwasan nagsulti ako. Wala nako ang imong kaayo himoang tinagoan ug ang imong kamatuoran diha sa bagang pundok sa katawhan. (R)

PAGBASA GIKAN SA SULAT NGADTO SA MGA HEBREO

Heb. 10:4-10

Kay ang dugo sa mga toro nga baka ug mga kanding dili gayod makawagtang sa mga sala. Tungod niini, sa dayon nang anhi ni Cristo sa kalibutan, miingon siya sa Dios, "Dili ka buot sa sakripisyo ug mga halad nga mananap, apan giandaman mo ako og usa ka lawas. Wala ka mahimuot sa halad nga mga mananap nga gisunog didto sa halaran, O sa mga sakripisyo sa pagwagtang sa mga sala. Unya miingon ako, 'Ania ako, O Dios, aron pagtuman sa buot mong ipabuhat kanako - sumala sa nahisulat bahin diha sa libro sa Balaod."' Una sa tanan miingon siya, "Dili ka buot ni mahimuot sa mga sakripisyo ug mga halad nga mananap, o sa mga halad nga mananap nga sunugon didto sa halaran ug sa mga sakripisyo sa pagwagtang sa mga sala." Gisulti kini niya bisan kon kining tanang mga sakripisyo gihalad subay sa Balaod. Unya miingon siya, "Ania ako, O Dios, aron pagtuman sa buot mong ipabuhat kanako." Busa gisalikway sa Dios ang tanang karaang mga sakripisyo ug giilisan kini sa sakripisyo ni Cristo. Tungod kay gituman ni JesuCristo ang buot ipabuhat sa Dios kaniya, nahinloan kitang tanan sa sala pinaagi sa paghalad sa iyang kaugalingong lawas, sa makausa lamang ug alang sa tanan.

BERSO SA DILI PA ANG EBANGHELYO

Jn. 1:14

Aleluya! Ang Pulong sa Dios nahimong tawo ug mipuyo uban kanato; ug nakita nato ang iyang himaya. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 1:26-38

Sa ikaunom ka bulan sa pagmabdos ni Isabel, gipadala sa Dios ang anghel nga si Gabriel ngadto sa usa ka lungsod sa Galilea nga ginganlag Nazaret. May mensahe siya alang sa usa ka batan-ong dalaga nga sinayoran sa usa ka lalaki nga ginganlag Jose, nga kaliwat ni Hari David. Maria ang ngalan sa babaye. Miadto ang anghel kaniya ug miingon, "Paglipay! Ang Ginoo nag-uban ug nagpanalangin kanimo pag-ayo!" Nalibog pag-ayo si Maria sa pagkabati niya sa mensahe sa anghel, ug nagpaIandong siya kon unsay kahulugan sa iyang mga pulong. Miingon ang anghel kaniya, "Ayaw kahadlok, Maria, kay gikahimut-an ka sa Dios. Magmabdos ka ug manganak og lalaki, ug nganlan mo siya'g Jesus. Mahimo siyang inila ug tawgon siya nga Anak sa Dios nga Labing Halangdon. Ang Ginoong Dios maghimo kaniyang hari, sama sa iyang katigulangan nga si David, ug mahimo siyang hari sa mga kaliwat ni Jacob hangtud sa kahangturan; ug dili gayod matapos ang iyang gingharian!" Si Maria miingon sa anghel, "Ulay ako, busa unsaon man pagkahimo niini?" Ang anghel mitubag, "Mokunsad kanimo ang Espiritu Santo, ug magpabilin ang gahum sa Dios diha kanimo. Tungod niini, ang balaan nga bata tawgon nga Anak sa Dios. Hinumdumi ang imong paryenti nga si Isabel. Giingon nga dili na siya moanak; apan karon ika-unom na kabulan ang iyang pagsabak, bisa'g tigulang na siya kaayo; kay walay dili mahimo sa Dios." Miingon si Maria, "Sulugoon ako sa Ginoo; mahitabo unta kanako ang imong gisulti." Ug mibiya ang anghel kaniya.