PAGBASA GIKAN SA BASAHON NI PROPETA JEREMIAS
Jer. 11:18-20
Gisuginlan ako sa Ginoo bahin sa Iaraw sa akong mga kaaway batok kanako. Sama ako sa maaghop nga nating karnero nga patyonon. WaIa ako masayod nga naglaraw diay silag dautan batok kanako. Matod nila, "Putlon nato ang kahoy samtang lig-on pa kini. Ato siyang patyon aron wala nay mahinumdom kaniya." Unya nag-ampo ako, "Labing Gamhanang Ginoo, maghuhukom ka nga matarong, nagsusi ka sa kasingkasing ug hunahuna sa tawo. Pakit-a ako nga silotan mo sila kay gipadayag ko na kanimo ang akong mulo mo kanila, kay gitugyan ko na man kanimo ang akong mulo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 7:2-3, 9-10, 11-12
R. O Ginoong akong Dios, nagadangop ako kanimo.
O Ginoong akong Dios, nagadangop ako kanimo; luwasa ako sa mga naggukod kanako ug palingkawasa ako, Tingali unyag mahimo ako nga sama sa gitukob sa liyon, kuniskonison nga wala gayoy motabang. (R)
Hukmi ako, O Ginoo, kay nagmatarong ako, ug tungod kay wala akoy sala. Laglaga ang kangil-ad sa dautan, apan sagnga ang matarong, O tig-usisa sa kasingkasing ug sa kalag, O matarong nga Dios. (R)
Taming sa akong atubangan mao ang Dios, nga nagaluwas sa matarong og kasingkasing matarong nga maghuhukom ang Dios, usa ka Dios nga mosilot sa adlaw-adlaw. (R)
BERSO SA DILI PA ANG EBANGHELYO
Lk. 8:15
Aleluya! Ang binhi nga nahulog sa maayong yuta mao kadtong nakadungog sa mensahe ug midawat ug mituman niini, ug magpadayon hangtod nga mamunga sila. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 7:40-53
Daghang mga tawo didto nakadungog kaniya nga misulti niini ug miingon sila, "Kining tawhana mao gayod ang Propeta nga atong gipaabot!" Ang uban miingon, "Siya mao ang Mesiyas!" Apan ang uban usab miingon, "Ang Mesiyas dili maggikan sa Galilea. Ang Kasulatan nag-ingon nga ang Mesiyas kaliwat ni David ug matawo siya sa Betlehem, ang lungsod ni David." Busa tungod kaniya nabahin ang mga tawo. Ang uban gusto unta nga modakop kaniya, apan walay nakahimo pagbuhat niini. Ang mga sundalo namalik ngadto sa mga kadagkoan sa mga pari ug sa mga Pariseo, ug nangutana kanila, "Nganong wala man ninyo siya dad-a nganhi?" Ang mga sundalo mitubag, "Wala pay tawo nga nakasulti sama kaniya!" Ang mga Pariseo nangutana kanila, "Hasta ba usab kamo nalimbongan niya? May usa ba sa atong mga kadagkoan o usa ka Pariseo nga mituo kaniya? Kining mga tawhana wala masayod sa Balaod ni Moises, busa tinunglo sila sa Dios!" Si Nicodemo, usa sa mga Pariseo nga nakigkita kang Jesus kaniadto, miingon kanila, "Sumala sa atong Balaod, dili kita makahukom nga sad-an ang usa ka tawo sa dili pa nato siya mahusay ug maila kon unsay iyang nabuhat." Sila mitubag, "Taga-Galilea ba usab ikaw? Nan, pagtuon sa Kasulatan ug masayran mo nga wala pa gayoy propeta nga naggikan sa Galilea." Ug namauli silang tanan.
ANG EBANGHELYO SA GINOO.
DAYGON IKAW, O KRISTO.
