⚪ [S] San Jose, bana ni Santa Maria Birhen

PAGBASA GIKAN SA IKADUHANG BASAHON NI SAMUEL

2 Sm. 7:4-5, 12-14, 16

Niadtong gabhiona gisultihan si Natan sa Ginoo, "Ingna ang akong alagad nga si David, 'Kini ang gisulti sa Ginoo: Buhatan ba ako nimo'g balay nga akong kapuy-an? Ug inigkamatay mo, ilubong ka tupad sa imong mga katigulangan ug himoon kong hari ang usa sa imong mga anak ug lig-onon ko ang iyang gingharian. Siya ang magtukod ug usa ka templo alang sa akong ngalan ug palungtaron ko ang trono sa iyang gingharian hangtud sa kahangturan. Ako maiyang amahan, ug siya maakong anak. Kon makasala siya, kastigohon ko siya ingon sa buhaton sa usa ka amahan ngadto sa iyang anak. Ug palungtaron ko ang imong banay ug gingharian hangtod sa hangtod."

SALMO RESPONSORYO

Ps. 89:2-3, 4-5, 27, 29

R. Ang anak ni David mabuhi hangtod sa kahangturan.

Ang mga kaayohan sa Ginoo akong awitan hangtud sa kahangturan; latas sa tanang kaliwatan magsangyaw ang akong ba-ba sa imong kamatinud-anon kay miingon ikaw, "Ang akong kaluoy nagabarog sa kahangturan: diha sa langit imong gilig-on ang imong kamatinud-anon." (R)

"Naghimo akog kasabutan uban sa akong pinili; Nanumpa ako kang David akong sulugoon: Hangtud sa kahangturan, lig-onon ko ang imong kaliwat ug pabarugon ko ang imong trono sa tanang kaliwatan." (R)

"Moingon siya kanako 'Ikaw akong Amahan; Akong Dios, akong Bato, akong Manluluwas! Hangtud sa kahangturan patunhayon ko ang akong kaluoy alang kanimo ug ang akong kasabutan uban kanimo nagabarog nga malig-on." (R)

PAGBASA GIKAN SA SULAT NI SAN PABLO NGADTO SA TAGA-ROMA

Rom. 4:13, 16-18, 22

Mga igsuon: Gisaad sa Dios kang Abraham ug sa iyang mga kaliwat nga maiya ang kalibutan. Gihimo kining saara dili tungod kay gituman ni Abraham ang Balaod, kondili tungod kay mituo siya ug gimatarong sa Dios. Busa ang saad gipasikad sa pagtuo aron kini maangkon ingon nga gasa sa Dios alang sa tanang kaliwat ni Abraham dili lamang kanila nga nagtuman sa Balaod kondili niadtong nagtuo usab sama kang Abraham. Kay si Abraham mao ang espirituhanong amahan natong tanan. Sumala sa Kasulatan, "Gihimo ko ikaw nga amahan sa daghang mga nasud." Busa ang saad maayo gayod atubangan sa Dios nga gituohan ni Abraham - ang Dios nga nagbanhaw sa mga patay ug maoy nagbuhat sa tanan pinaagi sa pulong. Mituo ug milaom si Abraham bisan sa panahon nga wala na siyay kalauman nga manganak pa busa nahimo siyang amahan sa daghang mga nasud. Sumala sa Kasulatan, "Ingon niana kadaghan ang imong kaliwat." Busa si Abraham "gimatarong sa Dios" gumikan sa iyang pagtuo.

BERSO SA DILI PA ANG EBANGHELYO

Ps. 84:5

Aleluya! Pagkabulahan gayod kanila nga nagpuyo sa imong balay, O Ginoo. Mapadayonon silang mag-awit sa imong kadayganan! Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 1:16, 18-21, 24

Si Jacob mao ang amahan ni Jose, ang bana ni Maria nga maoy amahan ni Jesus nga ginganlag Mesiyas. Mao kini ang kaagi sa pagkatawo ni JesuCristo. Ang iyang inahan nga si Maria sinayoran ni Jose, apan sa wala pa sila magtipon nakamatikod si Maria nga nagsabak siya sa lalang sa Espiritu Santo. Si Jose nga iyang pamanhonon, tawo nga matarong, apan dili siya buot nga pakaulawan niya si Maria atubangan sa mga tawo, busa naglaraw siya sa pagpakigbulag kaniya sa hilom. Samtang naghunahuna siya niini, mipakita kaniya ang usa ka anghel sa Ginoo pinaagi sa damgo ug miingon, "Jose, kaliwat ni David, ayaw kahadlok pagpangasawa kang Maria, kay ang iyang gisabak Ialang sa Espiritu Santo. Manganak siya'g lalaki ug nganli siya'g Jesus—kay luwason niya ang iyang katawhan sa ilang mga sala". Busa sa pagmata ni Jose gituman niya ang gisugo sa anghel ug gipangasawa niya si Maria.

PAGBASA SA SANTOS NGA EBANGHELYO SUMALA NI SAN LUKAS

Lk. 2:41-51

Matag tuig ang mga ginikanan ni Jesus moadto sa Jerusalem aron pagtambong sa Kasaulogan sa Pagsaylo. Sa dihang napulog duha na ka tuig si Jesus, nangadto sila sa kasaulogan sama sa naandan. Sa pagkatapos sa mga adlaw sa kasaulogan namauli sila apan ang bata nga si Jesus nagpabilin didto sa Jerusalem. Wala mahibalo niini ang iyang mga ginikanan ug nagtuo sila nga miuban si Jesus sa panon. Sa nakalakat na silag usa ka adlaw, gipangita nila siya didto sa ilang mga paryenti ug mga higala. Apan wala siya nila hikaplagi busa mibalik sila sa Jerusalem aron sa pagpangita kaniya. Sa ikatulo ka adlaw nakit-an nila siya didto sa Templo nga naglingkod uban sa mga magtutudlo, namati kanila ug nangutana. Ang tanan nga nakadungog kaniya nahibulong sa iyang maalamong mga tubag. Nahibulong ang iyang mga ginikanan sa pagkakita nila kaniya ug miingon ang iyang inahan kaniya, "Anak, nganong gibuhat mo man kini kanamo? Ako ug ang imong amahan nabalaka kaayo nga nangita kanimo." Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" Apan wala sila makasabot sa iyang gisulti kanila. Mipauli si Jesus sa Nazaret uban kanila ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing.