PAGBASA GIKAN SA BASAHON NI PROPETA ISAIAS
Is. 49:8-15
Mao kini ang giingon sa Ginoo ngadto sa Israel. "Sa panahon nga akong gipili, gitubag ko ikaw, gitabangan ko ikaw sa dihang nagpakitabang ka; bantayan ug panalipdan ko ikaw. Pinaagi kanimo maghimo ako'g kasabutan uban sa tanang katawhan; ipahimutang ko ikaw didto sa imong yuta nga karon nagmingaw na. Moingon ako sa mga binilanggo, 'Gula kamo,' ug niadtong anaa sa kangitngit, 'Gawas ngadto sa kahayag.' Manibsib sila daplin sa kadalanan, ug mahimo nga ilang sibsibanan ang hawan nga kabungtoran. Dili na sila gutomon uhawon, ni ang hangin ug kainit sa adlaw dili na mosakit pa kanila, kay tultolan man sila ngadto sa mga tuburan sa tubig sa nagmahal kanila. "Maghimo ako'g agianan latas sa kabukiran, ug mag-andam ako'g dalan alang sa akong katawhan. May mangabot gikan sa halayo, ang uban gikan sa amihanan ug kasadpan, ug ang uban gikan sa Aswan sa habagatan." Pag-awit sa kalipay, O kalangitan, ug pagmaya, O yuta; pag-awit, O Kabukiran! Kay gilipay sa Ginoo ang iyang katawhan, ug maluoy siya sa mga nag-antus. Apan ang Sion miingon, "Gibiyaan na ako sa Ginoo, nalimot na siya kanako." Apan nag-ingon ang Ginoo, "Makalimot ba ang usa ka inahan sa iyang anak nga masuso, o dili ba niya mahalon ang iyang anak? "Apan bisan pag malimot ang inahan sa iyang anak, ako di gayod malimot kanimo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 145:8-9, 13-14, 17-18
R. Ang Ginoo maayo ug maluluy-on.
Ang Ginoo maayo ug maluluy-on, dugay nga masuko ug dako sa kaluoy, Ang Ginoo maayo sa tanan ug maluluy-on sa tanan niyang mga binuhat. (R)
Ang Ginoo matinumanon diha sa tanan niyang mga pulong ug balaan diha sa tanan niyang mga buhat. Ang Ginoo nagapabangon sa tanan nga napukan ug nagapatindog sa tanan nga nangalipay. (R)
Ang Ginoo matarong diha sa tanan niyang mga paagi ug balaan diha sa tanan niyang mga buhat. Ang Ginoo haduol sa tanan nga nagasangpit kaniya, sa tanan nga nagasangpit kaniya diha sa kamatuoran. (R)
BERSO SA DILI PA ANG EBANGHELYO
Jn. 11:25a, 26
Aleluya! Ug si Jesus miingon kaniya, Ako ang pagkabanhaw ug ang kinabuhi, ug ang tanan nga buhi ug nagtuo kanako dili gayod mamatay. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 5:17-30
Si Jesus miingon ngadto sa mga Judio, "Ang akong Amahan nagbuhat hangtud karon busa ako nagbuhat usab." Tungod niini misamot hinoon ang tinguha sa mga kadagkoan sa mga Judio sa pagpatay kaniya, sanglit dili lamang kay gilapas niya ang balaod sa Adlawng Igpapahulay kondili miingon pa gayod siya nga ang Dios iyang Amahan ug sa ingon niini gipakasama niya ang iyang kaugalingon sa Dios. Busa mitubag si Jesus kanila, "Sultihan ko kamo: ang Anak walay mahimo sa iyang kaugalingon. Nagbuhat lamang siya sa nakita niya nga gibuhat sa iyang Amahan. Ang gibuhat sa Amahan, gibuhat usab sa Anak. Kay ang Amahan nahigugma sa Anak ug Iyang gipakita ngadto sa Anak ang tanan nga iyang gibuhat. Ug ipakita pa gayod kaniya sa Amahan ang mga butang nga labi pang kahibulongan kay niini. Ug mahibulong kamong tanan. Kay ingon nga banhawon sa Amahan ang mga patay ug hataga'g kinabuhi, banhawon usab sa Anak ug hataga'g kinabuhi ang buot niyang banhawon. Ang Amahan dili maghukom kang bisan kinsa, kay gihatag niya sa iyang Anak ang hingpit nga katungod sa paghukom, aron ang tanan magpasidungog sa Anak ingon nga sila nagpasidungog sa Amahan. Ang dili magpasidungog sa Anak dili usab magpasidungog sa Amahan nga nagpadala kaniya." 'Sultihan ko kamo: ang mamati sa akong gisulti ug motuo kaniya nga nagpadala kanako, may kinabuhing dayon. Siya dili silotan kay nakalatas na man siya gikan sa kamatayon ngadto sa kinabuhi. Sultihan ko kamo: taliabot ang panahon ug kini miabot na, nga ang mga patay makabati sa tingog sa Anak sa Dios, ug mabuhi ang magpatalinghog niini. Ingon nga ang Amahan mao ang tinubdan sa kinabuhi, gihimo usab niya ang iyang Anak nga tinubdan sa kinabuhi. Ug iyang gihatagan ang Anak sa katungod sa pagsilot, kay siya mao man ang Anak sa Tawo. Ayaw kamo kahibulong niini, kay moabot ang panahon nga makadungog sa iyang tingog ang tanang mga patay nga anaa sa mga lubnganan, ug manggula sila sa ilang lubong: kadtong maayog binuhatan mabanhaw ug mabuhi, ug kadtong dautag binuhatan mabanhaw apan silotan." "Wala akoy mahimo sa akong kaugalingon; maghukom lamang ako sumala sa isulti sa Dios kanako, busa ang akong hukom matarong kay wala man ako magtinguha pagbuhat sa akong kabubut-on, kondili sa kabubut-on sa nagpadala kanako."
ANG EBANGHELYO SA GINOO.
DAYGON IKAW, O KRISTO.
