🟣 Lunes sa Ikaupat nga Semana sa Kwaresma

PAGBASA GIKAN SA BASAHON NI PROPETA ISAIAS

Is. 65:17-21

Ang Ginoo miingon, "Kay magbuhat na ako'g mga bag-ong langit ug bag-ong yuta, dili na hinumdoman ang nangagi. Busa paglipay pag-ayo hangtud sa hangtud tungod sa akong gibuhat, kay himoon kong malipayon ang katawhan sa Jerusalem. Magmalipayon ako tungod sa Jerusalem ug magsadya ako tungod sa akong katawhan; dili na madungog diha niini ang dangoyngoy ug mga bakho ug ang tu-aw sa pagpakitabang. Ang kabataan dili na mamatay nga masuso pa, ug ang tigulang matigulang gayod pag-ayo una pa siya mamatay, kay ang mamatay sa panuigon nga usa ka gatos isipon nga batan-on, ug kon ang tawo dili moabot sa panuigon nga usa ka gatos, isipon siya nga gisilotan sa Ginoo. Maghimo sila'g mga balay ug silay magpuyo niini; magtanum sila'g mga paras ug sila usab ang mopahimulos sa bunga niini.

SALMO RESPONSORYO

Ps. 30: 2, 4. 5-6, 11-13

R. Daygon ko ikaw, O Ginoo, kay imo man ako nga giluwas.

Ibayaw ko ikaw, O Ginoo, kay imo akong gigakos pag-ayo ug wala ka motugot nga ang akong mga kaaway maglipay bahin kanako. O Ginoo, gikuha mo ako gikan sa kahiladman sa kalibutan; gilingkawas mo ako gikan kanila nga nagadulong sa kahiladman. (R)

Dayga ang Ginoo, kamong matinumanon kaniya, ug pasalamati ang iyang balaan nga ngalan. Kay ang iyang kasuko molungtad sa makadiyot lamang; apan ang iyang maayong kabubut-on, sa tibuok kinabuhi. Sa gabii, mosuIod ang paghilak, apan sa kaadlawon, ang pagsadya. (R)

Pamati, O Ginoo, ug kaloy-i ako; O Ginoo, pagpakahimong akong magtatabang. Gibalhin mo ang akong pagbangotan ngadto sa pagsangyaw; O Ginoo, akong Dios, hangtud sa kahangturan pasalamatan ko ikaw. (R)

BERSO SA DILI PA ANG EBANGHELYO

Amos 5:14

Aleluya! Paningkamot kamo pagbuhat sa matarong, dili sa dautan, aron mabuhi kamo. Unya ang Ginoong Dios nga Labing Gamhanan makig-uban gayod kaninyo, ingon sa inyong gipamatud-an. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 4:43-54

Tapos sa duha ka adlaw, miadto si Jesus sa Galilea, kay siya miingon man, "Ang propeta dili tinahod sa iyang kaugalingong lungsod." Sa pag-abot niya sa Galilea, gidawat siya sa mga Galileanhon, kay sila nahiadto man sa Jerusalem sa Pangilin sa Pagsaylo ug nakakita sila sa tanan nga iyang nabuhat didto." Busa mibalik si Jesus sa Cana sa Galilea, diin ang tubig iyang gihimong bino. Ug didto may usa ka opisyal sa kagamhanan, kansang anak nga lalaki nasakit didto sa Capernaum. Sa pagkadungog niya nga si Jesus nahiabot sa Galilea gikan sa Judea, miadto siya kang Jesus ug mihangyo kaniya sa pag-adto sa Capernaum aron ayohon ang iyang anak nga himatyon. Si Jesus miingon kaniya, "WaIa gayod kaninyoy motuo kanako gawas kon makakita kamog mga milagro." "Sir," ang opisyal mitubag, "kuyog kanako sa dili pa mamatay ang akong anak." Si Jesus mitubag kaniya, "Lakaw na, ang imong anak naayo na!" Mituo ang tawo sa gisulti ni Jesus ug mipauli siya. Samtang nagpa-ingon siya sa iyang balay, gitagbo siya sa iyang mga sulugoon ug gibalitaan nga naayo na ang iyang anak. Unya iyang gipangutana sila unsang taknaa naayo ang iyang anak, ug sila mitubag, "Gahapon sa ala una gihuwasan siya sa hilanat." Unya nahinumdom ang amahan nga mao kadtong taknaa nga gisultihan siya ni Jesus nga naayo na ang iyang anak. Busa mituo siya ug ang tanang sakop sa iyang panimalay. Mao kini ang ikaduhang milagro nga gihimo ni Jesus sa iyang pag-abot sa Galilea gikan sa Judea.