🟣 Ikaupat nga Domingo sa Kwaresma

PAGBASA GIKAN SA UNANG BASAHON NI SAMUEL

1 Sm. 16:1, 6-7, 10-13

Ang Ginoo miingon kang Samuel: "Magsigi ka ba Iamang og subo tungod sa akong pagsalikway kang Saul ingon nga hari sa Israel? Pun-ag lana ang imong sudlanan nga sungay, ug lakaw ngadto kang Isai nga taga-Betlehem, kay gipili kong hari ang usa sa iyang mga anak." Sa pag-abot gayod nila, si Samuel nakakita sa anak ni Isai nga si Eliab ug nagtuo siya nga ang pinili sa Ginoo mao ang diha sa iyang atubangan. Apan ang Ginoo miingon kang Samuel, "Ayaw pagtan-aw sa iyang panagway ni sa iyang gitas-on kay dili siya maoy akong napilian; ang Ginoo dili sama sa tawo nga ang gitan-aw mao ang panagway ug dili ang kasingkasing." Ug gipalabay ni Isai atubangan ni Samuel ang pito niya ka anak ug si Samuel miingon, "Dili kini sila maoy napili sa Ginoo." Ug giingnan ni Samuel si Isai, "Ania ba dinhi ang tanan mong anak?" Si Isai mitubag, "Wala dinhi ang kamanghoran; nagbantay siya sa mga karnero." Giingnan ni Samuel si Isai, "Ipakuha siya, kay dili kita maghalad hangtod nga moabot siya." Busa gipakuha ni Isai ang kamanghoran. Pulapula siyag nawong, nindot siyag mata, ug guwapo. Miingon ang Ginoo kang Samuel, "Hala, dihogi siya, kay mao kini siya ang akong napili." Unya gikuha ni Samuel ang sungay nga gisudlag lana, ug iyang gidihogan si David atubangan sa iyang mga igsuon; ug mikunsad kang David ang Espiritu sa Ginoo ug nagpabilin kini kaniya sukad niadtong adlawa. Unya miadto si Samuel sa Rama.

SALMO RESPONSORYO

Ps. 23:1-3, 3-4, 5, 6

R. Magbalantay kanako ang Ginoo, wala nay magmakulang pa kanako.

Magbalantay kanako ang Ginoo, wala nay magmakulang pa kanako. Sa Iunhaw nga sibsibanan iya Ako nga gipapahulay; Sa daplin sa malinawon nga tubig iya akong gidala; iyang gihupay ang akong kalag. (R)

Iya ako nga gitultolan sa matarong nga mga agianan tungod sa iya nga ngalan. Bisan kon maglakaw ako sa walog nga mangitngit wala akoy kahadlokan nga dautan; kay anaa ka man sa akong kiliran. Sa imong igbubugaw ug sungkod gihatagan mo ako og kaisog. (R)

Gihikyaran mo ako og lamesa sa akong atubangan samtang nagtan-aw ang akong mga kaaway; Gidihogan mo ang akong ulo og lana; nagaawas gayod ang akong imnanan. (R)

Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi; Ug magpuyo ako sa balay sa Ginoo sa mga katuigan nga umaabot. (R)

PAGBASA GIKAN SA SULAT NI SAN PABLO NGADTO SA TAGA- EFESO

Eph. 5:8-14

Mga igsuon: Kaniadto diha kamo sa kangitngit, apan sukad kamo nahimong katawhan sa Dios, anaa na kamo sa kahayag. Busa kinahanglan nga magkinabuhi kamo ingon nga mga tawo nga iya sa kahayag. Kay ang bunga sa kahayag mao ang kaayo, katarong ug kamatuoran. Paningkamoti nga makat-onan ninyo ang makapahimuot sa Ginoo. Ayaw kamo pag-apil-apil sa mga dautang buhat nga iya sa kangitngit; hinonoa ibutyag kini. (Kay makauulaw bisan gani ang paghisgot sa mga butang nga gibuhat nila sa tago.) Ug kon ipadayag na ngadto sa kahayag ang tanang mga butang, makita ang matuod nga kinaiya niini; kay ang tanang madayag mahimong kahayag. Busa giingon,"Pagmata na, hingatulog, Bangon gikan sa mga patay! Ug dan-agan ka ni Cristo."

BERSO SA DILI PA ANG EBANGHELYO

Jn. 8:12

Aleluya! Ako mao ang kahayag sa kalibutan, nag-ingon ang Ginoo; ang magsunod kanako makabaton sa kahayag sa kinabuhi. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 9:1-41 (TINAAS)

Samtang naglakaw si Jesus nakita niya ang usa ka tawo nga buta sukad pa sa iyang pagkahimugso. Ang iyang mga tinun-an nangutana kaniya. "Magtutudlo, kinsa may nakasala nga natawo man siya nga buta? Siya ba o ang iya bang mga ginikanan?" Si Jesus mitubag, "Ang iyang pagkabuta dili tungod sa iyang mga sala ni sa mga sala sa iyang mga ginikanan. Siya natawong buta aron ang gahom sa Dios ikapadayag diha kaniya. Samtang adlaw pa, kinahanglan buhaton ta ang mga buhat sa nagpadala kanako, kay moabot ang kagabhion ug wala nay makatrabaho. Samtang ania pa ako sa kalibutan, ako ang kahayag sa kalibutan." Human siya makasulti niini, si Jesus miluwa sa yuta ug nagmasa siya'g lapok ginamit ang laway. Unya gihidhiran niya sa lapok ang mata sa tawo, ug giingnan, "Lakaw, panghilam-os didto sa Linaw sa Siloe." (Kining ngalana nagkahulugan "Pinadala.") Busa milakaw ang tawo ug nanghilam-os ug unya mibalik siya nga makakita na. Unya ang iyang mga silingan ug ang mga tawo nga nakakita kaniya nga nagpakilimos sa wala pa siya maayo, nangutana, "Dili ba mao kini ang tawo nga kaniadto nagpunayg lingkod ug nagpakilimos?" May miingon, "Mao kana siya," apan ang uban miingon, "Dili, pariho lamang sila'g hitsura." Busa ang tawo mitug-an, "Ako bitaw." Sila nangutana kaniya, "Nganong nakakita ka man?" Siya mitubag, "Ang tawo nga ginganlag Jesus nagmasag lapok ug unya gihidhid niya kini sa akong mata ug giingnan ako, 'Lakaw ngadto sa Siloe ug panghilam-os.' Busa miadto ako, ug human ako makahilam-os, nakakita ako." Sila nangutana, "Hain man siya?" "Wala ako masayod,"siya mitubag. Unya ilang gidala ngadto sa mga Pariseo ang tawo nga kaniadto buta. Adlaw'ng Igpapahulay kadto sa pagmasa ni Jesus og lapok ug sa pagpabuka niya sa mga mata sa buta. Unya gipangutana pag-usab sa mga Pariseo ang tawo kon giunsa niya pagkakita. Ug siya miingon kanila, "Gibutangan niya'g Iapok ang akong mata ug unya nanghilam-os ako ug karon makakita na ako." Pipila sa mga Pariseo miingon, "Ang nag-ayo kanimo dili gikan sa Dios, kay wala man siya magtuman sa balaod, mahitungod sa Adlaw'ng Igpapahulay." Apan ang uban miingon, "Unsaon man sa usa ka makasasala pagbuhat sa mga milagro nga sama niini?" Ug nabahin sila. Busa nangutana pag-usab kaniya ang mga Pariseo, "Nag-ingon ka nga gipabuka niya ang imong mata; kon tinuod kini, unsa may imong ikasulti mahitungod kaniya?" Ang tawo mitubag, "Siya usa ka propeta." Apan ang kadagkoan sa mga Judio wala motuo nga siya buta kaniadto, hangtod gitawag nila ang mga ginikanan sa tawo ug gipangutana, "Inyo ba siyang anak? Buta ba s iyang daan sa iyang pagkahimugso? Kon tinuod kini, nganong makakita na man siya karon?" Ang iyang mga ginikanan mitubag, "Tinuod nga siya among anak ug tinuod usab nga natawo siyang buta. Apan wala kami masayod nganong makakita na siya karon, ug kinsa ang nag-ayo kaniya. Pangutan-a lang siya, kay but-an naman siya ug makatubag na mahitungod sa iyang kaugalingon." Gisulti kini sa iyang ginikanan tungod kay nahadlok man sila sa kadagkoan sa mga Judio, sanglit nagkauyon man sila na kadtong moingon nga si Jesus mao ang Mesiyas dili na ilhon nga sakop sa sinagoga. Kini ang hinungdan nga ang iyang mga ginikanan miingon, "But-an na man siya; pangutan-a lang!" Unya gitawag na usab nila ang tawo nga nahimugsong buta ug ilang giingnan, "Isulti ang matuod atubangan sa Dios. Nasayod kami nga ang tawo nga giingon mo nga nag-ayo kanimo makasasala." Ang tawo mitubag, "Wala ako masayod kon siya makasasala ba o dili. Ang nasayran ko lamang mao nga buta ako kaniadto, apan karon nakakita na." Sila nangutana, "Unsa may iyang gibuhat kanimo? Giunsa man niya pagpabuka ang imong mga mata?" Siya mitubag, "Gisultihan ko na kamo, apan wala kamo motuo. Nganong buot man kamong mamati pag-usab? Buot ba usab kamo nga mahimong iyang tinun-an?" Ug siya giinsultohan nila ug giingnan, "Ikaw ang tinun-an niya, apan kami mga tinun-an ni Moises. Nasayod kami nga ang Dios misulti kang Moises, apan bahin niadtong tawhana, wala gani kami masayod kon taga diin siya!" Ang tawo mitubag, kahibulongan! Kamo wala masayod kon taga diin siya, apan iyang gipabuka ang akong mata! Nasayod kita nga ang Dios dili motagad sa mga makasasala, apan tagdon niya kadtong nagtahod kaniya ug nagtuman sa iyang gisugo kanila. Sukad masukad wala pa gayod igdungog nga may makapabuka sa mata sa tawo nga nahimugsong buta. Kon kining tawhan dili pa gikan sa Dios, wala gayod siyay mahimo." Sila mitubag, "Natawo ka ug nagtubo diha sa sala, ug karon magpalumaluma ka'g tudlo kanamo?" Ug siya gipalagpot nila sa sinagoga. Si Jesus nakabalita nga siya ilang gipalagpot sa sinagoga. Unya hikit-an niya ang tawo ug giingnan, "Mituo ka ba sa Anak sa Tawo?" Ang tawo mitubag, "Sir, tug-ani ako kon kinsa siya, aron motuo ako kaniya!" Si Jesus miingon, "Nakakita na ikaw kaniya, ug siya ang nakigsulti kanimo karon." "Mituo ako, Ginoo!" ang tawo miingon, ug unya miluhod siya sa atubangan ni Jesus. Ug si Jesus miingon, "Mianhi ako niining kalibutana aron paghukom, aron ang mga buta makakita ug kadtong makakita mangabuta." Pipila sa mga Pariseo nga didto uban kaniya nakadungog sa iyang pagsulti niini, ug sila nangutana kaniya, "Mga buta ba diay usab kami?" Si Jesus mitubag, "Kon buta kamo, wala unta kamoy sala; apan kay nag-ingon man kamo nga makakita kamo, nan, sad-an kamo."

PAGBASA SA SANTOS NGA EBANGHELYO SUMALA NI SAN JUAN

Jn. 9:1, 6-9, 13-17, 34-38 (MINUBO)

Samtang naglakaw si Jesus nakita niya ang usa ka tawo nga buta sukad pa sa iyang pagkahimugso. Human siya makasulti niini, si Jesus miluwa sa yuta ug nagmasa siya'g lapok ginamit ang laway. Unya gihidhiran niya sa lapok ang mata sa tawo, ug giingnan, "Lakaw, panghilam-os didto sa Linaw sa Siloe." (Kining ngalana nagkahulugan "Pinadala.") Busa milakaw ang tawo ug nanghilam-os ug unya mibalik siya nga makakita na. Unya ang iyang mga silingan ug ang mga tawo nga nakakita kaniya nga nagpakilimos sa wala pa siya maayo, nangutana, "Dili ba mao kini ang tawo nga kaniadto nagpunayg lingkod ug nagpakilimos?" May miingon, "Mao kana siya," apan ang uban miingon, "Dili, pariho lamang sila'g hitsura." Busa ang tawo mitug-an, "Ako bitaw." Unya ilang gidala ngadto sa mga Pariseo ang tawo nga kaniadto buta. Adlaw'ng Igpapahulay kadto sa pagmasa ni Jesus og lapok ug sa pagpabuka niya sa mga mata sa buta. Unya gipangutana pag-usab sa mga Pariseo ang tawo kon giunsa niya pagkakita. Ug siya miingon kanila, "Gibutangan niya'g Iapok ang akong mata ug unya nanghilam-os ako ug karon makakita na ako." Pipila sa mga Pariseo miingon, "Ang nag-ayo kanimo dili gikan sa Dios, kay wala man siya magtuman sa balaod, mahitungod sa Adlaw'ng Igpapahulay." Apan ang uban miingon, "Unsaon man sa usa ka makasasala pagbuhat sa mga milagro nga sama niini?" Ug nabahin sila. Busa nangutana pag-usab kaniya ang mga Pariseo, "Nag-ingon ka nga gipabuka niya ang imong mata; kon tinuod kini, unsa may imong ikasulti mahitungod kaniya?" Ang tawo mitubag, "Siya usa ka propeta." Sila mitubag, "Natawo ka ug nagtubo diha sa sala, ug karon magpalumaluma ka'g tudlo kanamo?" Ug siya gipalagpot nila sa sinagoga. Si Jesus nakabalita nga siya ilang gipalagpot sa sinagoga. Unya hikit-an niya ang tawo ug giingnan, "Mituo ka ba sa Anak sa Tawo?" Ang tawo mitubag, "Sir, tug-ani ako kon kinsa siya, aron motuo ako kaniya!" Si Jesus miingon, "Nakakita na ikaw kaniya, ug siya ang nakigsulti kanimo karon." "Mituo ako, Ginoo!" ang tawo miingon, ug unya miluhod siya sa atubangan ni Jesus.