PAGBASA GIKAN SA BASAHON NI PROPETA OSEAS
Hos. 6:1-6
Ang katawhan miingon, "Ngari kamo, mamalik kita sa Ginoo kay gikuniskunis kita niya aron iyang ayohon; gisamaran aron iyang bindahian. Tapus sa duha ka adlaw buhion kita niya; ug bangonon kita niya sa ikatulo ka adlaw, ug magpuyo kita sa iyang atubangan. Kinahanglan makaila gayod kita sa Ginoo; ang iyang pagpanaw sama sa kasiguro sa kaadlawon, ug moanhi siya kanato sama sa alindahaw ug sa ulan panahon sa tingpugas." Ang Ginoo miingon, "Unsa may buhaton ko kanimo, O Israel, ingon man kanimo, O Juda? Ang imong gugma kanako sama sa gabon sa buntag ug sa yamog nga dali rang mahanaw. Busa gipapanton ko kamo sa mga propeta, ug gilaglag pinaagi sa akong mga pulong. Ang akong hukom motungha sama sa kahayag. Ang akong gikinahanglan mao ang gugmang walay paglubad, dili ang mga halad; ang kahibalo bahin sa Dios, ug dili ang mga halad nga sunogon.
ANG PULONG SA GINOO.
SALAMAT SA DIOS.
SALMO RESPONSORYO
Ps. 51:3-4, 18-19, 20-21
R. Ang makanunayong gugma, dili sakripisyo, mao ang gipangayo sa Ginoo.
Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi akog maayo sa akong kasaypanan, ug linisi ako sa akong kasal-anan. (R)
Kay dili ka mahimuot sa mga sakripisyo; kon maghalad ako og hinurot-pagsunog, dili nimo kini dawaton. Ang akong sakripisyo, O Dios, usa ka espiritu nga mahinulsulon, usa ka kasingkasing nga mahinulsulon ug maubsanon, O Dios, dili nimo tamayon. (R)
Pagmanggihatagon, O Ginoo, sa Sion diha sa imong kaluoy pinaagi sa pagbag-o pagpatindog sa mga paril sa Jerusalem; unya mahimuot ka sa angay nga mga sakripisyo, sa mga halad ug sakripisyo nga hinurot pagsunog. (R)
BERSO SA DILI PA ANG EBANGHELYO
Ps. 95:8
Aleluya! Kon karon makadungog kamo sa iyang tingog, ayaw patig-aha ang inyong mga kasingkasing. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 18:9-14
Gisugilon usab ni Jesus kining sambingaya ngadto sa mga naniguro nga sila maayong tawo ug nagtamay sa uban. "May duha ka tawo nga nangadto sa Templo aron pag-ampo; ang usa Pariseo ug ang usa kobrador sa buhis. Ang Pariseo naglain pagtindog ug nag-ampo, 'Nagpasalamat ako kanimo, O Dios, nga ako dili hakog, dili limbongan, ug dili himabayi sama sa uban; nagpasalamat ako kanimo nga dili ako sama nianang kobrador sa buhis. Nagpuasa akog duha ka adlaw matag semana, ug naghatag ako kanimog ikapulo sa tanan kong abot.' Apan ang kobrador sa buhis nagtindog sa layo ug dili gani moyahat ngadto sa langit; nagpamukpok siya sa iyang dughan ug nag-ingon, 'O Dios, maluoy ka kanako nga usa ka makasasala!"' Unya miingon si Jesus, "Sultihan ko kamo nga ang kobrador sa buhis, ug dili ang Pariseo, mao ang gikahimut-an sa Dios sa iyang pagpauli sa ila. Kay ang tanan nga magpataas sa iyang kaugalingon ipaubos, ug ang tanan nga magpaubos sa iyang kaugalingon ipataas."
ANG EBANGHELYO SA GINOO.
DAYGON IKAW, O KRISTO.
