PAGBASA GIKAN SA BASAHON NI PROPETA OSEAS
Hos. 14:2-10
Balik, O katawhan sa Israel, sa Ginoo nga inyong Dios, kay nadugmo kamo tungod sa inyong kadautan. Andama ang inyong igsusulti, ug balik sa Ginoo. Ingna siya, "Pasayloa ang tanan namong kalapasan ug dawata ang among pangaliyupo ug tumanon namo ang among gisaad kanimo. Dili makaluwas kanamo ang Asiria, dili na kami mokabayo sa mga kabayo; ug dili na kami moisip nga among Dios ang binuhat sa among kamut. Maluloy-on ka niadtong walay laing kadangpan." Ang Ginoo miingon, "Himoon ko silang matinuohon ug higugmaon ko sila, kay nahanaw na ang kasuko ko kanila. Mahimo akong sama sa yamog alang sa Israel; ug mamulak siya sama sa liryo, mogamut siya pag-ayo daw usa ka dakong kahoy; molipang ang iyang mga salingsing ug mahisama siya katahum sa olibo, ug mangalimyon siya sama sa Lebanon. Mamauli sila ug magpuyo sa silong sa akong landong; molambo siya sama sa tanaman ug mamulak sama sa paras; ug ang iyang alimyon sama sa bino sa Lebanon. O katawhan sa Israel, unsa may makuha ninyo sa mga diosdios? Dili ba ako may nagtubag sa inyong pag-ampo ug nag-atiman kaninyo kanunay? Sama ako sa sipre nga lunhaw kanunay, ug akoy naghatag kaninyo sa bunga nga inyong gikaon." Ang maalamon angay mosabot sa nahisulat dinhi, ug ang masinabuton angay masayod niini; kay matarong man ang tanang paagi sa Ginoo, ug mosubay niini ang mga buotan, apan mapandol niini ang mga malapason.
ANG PULONG SA GINOO.
SALAMAT SA DIOS.
SALMO RESPONSORYO
Ps. 81:6-8, 8-9, 10-11, 14,17
R. Ako ang Ginoo nga imong Dios: Pamati-a ang akong tingog.
Usa ka panultihon nga wala ako maanad pagpamati giluwas ko ang iyang abaga sa karga; ang iyang mga kamut gilingkawas sa bukag sa kalisdanan misangpit ikaw ug giluwas ko ikaw." (R)
Bisan wala ako makita, gitubag ko ikaw diha sa dalugdog; gisulayan ko ikaw didto sa mga tubig sa Meriba. Pamati, O lungsod ko, ug pahimangnoan ko ikaw; O Israel, dili ba ikaw magpatalinghug kanako? (R)
Dili kamo maghupot og laing Dios diha kaninyo, ni magsimba kamo og Dios nga langyaw. Ako, ang Ginoo, mao ang inyong Dios, nga nagpagula kaninyo gikan sa yuta sa Ehipto. (R)
Kon mamati pa lamang kanako ang akong lungsod, ug molakaw ang Israel sa akong mga dalan, Pakan-on ko sila sa labing maayong trigo, ug busgon ko sila sa dugos gikan sa Bato." (R)
BERSO SA DILI PA ANG EBANGHELYO
Mt. 4:17
Aleluya! Si Jesus nagwali nga nag-ingon, "Hinulsoli ang inyong mga sala, kay hapil na maghari ang Dios." Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 12:28-34
Didtoy usa ka magtutudlo sa Balaod nga nakabati sa panaglalis nila. Nakita niya nga maayo ang pagkatubag ni Jesus sa mga Saduseo; busa miduol siya kaniya ug nangutana, "Unsa mang sugoa ang labing hinungdanon sa tanan?" Mitubag si Jesus, "Mao kini ang labing hinungdanong sugo: 'Pamati, Israel! Ang Ginoo nga atong Dios maora gayod ang Ginoo. Kinahanglan mahalon mo ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog.' Ang sunod mao kini: 'Higugmaa ang imong isigkatawo sama sa imong kaugalingon.' Wala nay sugo nga labi pang hinungdanon kay niining duha." Ang magtutudlo sa Balaod miingon kang Jesus, "Husto kana, Magtutudlo! Tinuod ang imong gisulti nga ang Ginoo lamang maoy Dios, ug nga wala nay laing Dios gawas kaniya. Busa ang tawo kinahanglang magmahal sa Dios sa tibuok niyang kasingkasing, ug sa tibuok niyang salabutan, ug sa tibuok niyang kusog, ug kinahanglang higugmaon niya ang iyang isigkatawo ingon sa iyang kaugalingon. Mas maayo ang pagtuman niining duha ka sugo kay sa pagdala og mga mananap nga sunogon ibabaw sa halaran ug paghatag og ubang mga halad ngadto sa Dios." Nakaalinggat si Jesus nga maalamon kaayo ang iyang tubag, busa siya miingon kaniya, "Dili ka halayo sa gingharian sa Dios." Ug wala na gayoy nangahas pagpangutana kaniya.
ANG EBANGHELYO SA GINOO.
DAYGON IKAW, O KRISTO.
