PAGBASA GIKAN SA BASAHON NI PROPETA JEREMIAS
Jer. 7:23-28
Mao kini ang giingon sa Ginoo: "Gisugo ko sila sa pagsunod sa akong kasugoan aron ako mahimong ilang Dios, ug sila mahimong akong katawhan. Gisugo ko sila sa pagkinabuhi sumala sa akong kabubut-on aron walay dautan nga mahitabo kanila. Apan wala sila motuman ni magtagad niini. Hinonoa, gibuhat nila ang gidikta kanila sa tig-a ug sa dautan nilang kasingkasing, ug misamot hinoon silag kadautan. Sukad sa pagbiya sa inyong katigulangan sa Ehipto hangtod karon nagsigi akog padala kaninyo sa akong mga sulugoon nga mga propeta. Apan wala gayod kamo magpatalinghug ni magtagad kanila. Hinonoa, misamot kamog katig-a ug mas dautan pa kamo kay sa inyong katigulangan. "Busa, Jeremias, isulti kanila kining tanan, apan dili sila mamati kanimo; sangpiton mo sila, apan dili sila motubag. Sultihi sila nga ang ilang nasod dili magpatalinghug sa nga ilang Dios, ug dili buot nga tudloan. Alang kanila wala nay kamatuoran, ug dili na gani sila maghisgot bahin niini."
ANG PULONG SA GINOO.
SALAMAT SA DIOS.
SALMO RESPONSORYO
Ps. 95:1-2, 6-7, 8-9
R. Kon karon makadungog kamo sa iyang tingog, ayaw patig-aha ang inyong mga kasingkasing.
Umari kamo, awitan ta nga malipayon ang Ginoo; isangyaw ta ang Bato sa atong kaluwasan. Yukboan ta siya uban sa pasalamat; awitan ta siya nga malipayon og mga salmo. (R)
Umari kamo, manghapa kita sa pagsimba; mangluhod kita atubangan sa Ginoo nga nagbuhat kanato. Kay siya mao ang atong Dios, ug kita ang katawhan nga iyang gidumala, ang panon nga iyang gitultolan. (R)
Inyong mga kasingkasing. Hinaut unta nga karon mamati kamo sa iyang tingog "Ayaw patig-aha ang inyong mga kasingkasing sama didto sa Meriba, sama sa adlaw ni Massah didto sa kamingawan. Diin gisulayan ako sa inyong mga katigulangan; ila akong gisuta bisan nakakita sila sa akong mga buhat." (R)
BERSO SA DILI PA ANG EBANGHELYO
Jl. 2:12-13
Aleluya! Bisan pa ngani karon, nagaingon ang Ginoo, pamalik kamo kanako uban ang bug-os ninyong kasingkasing, kay Ako napuno sa grasya ug maluluy-on. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 11:14-23
Niadtong higayona gipapahawa ni Jesus ang yawa nga amang, ug sa nakagula na ang yawa, nakasulti ang tawo. Ang mga tawo nahibulong, apan pipila kanila miingon, "Si Beelsebul, ang pangulo sa mga yawa, maoy naghatag kaniyag gahom sa pagpapahawa kanila." Dihay uban nga buot mobitik kaniya, mao nga sila mihangyo kaniya nga mohimo siyag usa ka milagro aron pagpaila nga siya pinadala sa Dios. Apan nahibalo si Jesus sa ilang mga hunahuna ug miingon siya kanila, "Bisan unsang nasora nga magkabahinbahin ug mag-unay pag-away dili molungtad og dugay; ang banay nga mabahinbahin maungkag. Busa kon diha sa gingharian ni Satanas may mga pundok nga nag-unayg away, unsaon man paglungtad sa maong gingharian? Nag-ingon kamo nga naghingilin ako sa mga yawa tungod kay naghatag si Beelsebul kanakog gahom paghimo niini. Kon giingon niini nako paghingilin kanila, giunsa man diay sa inyong mga sumusunod pagpapahawa kanila? Ang inyong kaugalingong mga sumusunod nagpaila nga sayop gayod kamo! Ang tinuod mao nga tungod sa gahom sa Dios naghingilin ako sa mga yawa, ug kini maoy nagmatuod nga naghari na ang Dios kaninyo." "Kon ang usa ka tawo nga kusgan, nga sangkap sa tanan niyang inandam nga mga hinagiban, magbantay sa iyang balay, dili gayod kahilabtan ang iyang mga butang. Apan kon may labi pang kusgan nga mosulong og mobuntog kaniya ang labing kusgan mosakmit sa tanang mga hinagiban nga gisaligan sa tag-iya ug bahinbahinon ang iyang tinulis." "Ang dili dapig kanako, batok gayod kanako; ang dili motabang kanako pagtigom, nagpatibulaag."
ANG EBANGHELYO SA GINOO.
DAYGON IKAW, O KRISTO.
