PAGBASA GIKAN SA BASAHON SA DEUTERONOMIO
Dt. 4:1, 5-9
Si Moises miingon sa mga Israelita, "Pagmatngon kamo sa tanang sugo nga gitudlo ko kaninyo, ug tumana kini aron kamo magpabiling buhi ug makasulod ug makapanag-iya sa yuta nga gihatag kaninyo sa Ginoo, ang Dios sa inyong katigulangan." "Gitudloan ko kamo sa mga balaod ug mga tulumanon, sumala sa gisugo kanako sa Ginoo nga akong Dios, aron tumanon ninyo kini didto sa yuta nga inyong adtoan ug panag-iyahon. Tumana ninyo kini, kay mao kini ilhanan nga kamo maalamon atubangan sa katawhan. Inigkadungog nila niining tanang mga balaod, moingon sila, 'Sa walay duhaduha ang katawhan niining dakong nasod maalamon ug masinabuton.'" "Kay unsa mang nasora nga gamhanan kansang dios duol kaayo niini, ingon ka duol sa Ginoo nga atong Dios nganhi kanato, sa dihang mosangpit kita kaniya? Ug unsa mang nasora nga gamhanan nga may mga balaod ug mga tulomanon nga matarong ingon niining tanang balaod nga gihatag ko kaninyo niining adlawa? Busa pagmatngon kamo aron dili kamo mahikalimot sa mga butang nga inyong nakita, ug magpabilin kini sa inyong kasingkasing sa tibuok ninyong kinabuhi. Isaysay sa inyong mga anak ug mga apo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 147:12-13, 15-16, 19-20
R. Dayga ang Ginoo, O Jerusalem.
Himayaa ang Ginoo, O Jerusalem, dayga ang imong Dios, O Sion. Kay gilig-on niya ang mga trangka sa imong mga ganghaan; iyang gibendisyonan ang imong mga anak sulod kanimo. (R)
Misugo siya sa kayutaan; makusog nga midagan ang iyang pulong; Gikatag niya ang niyebe ingon og delana; ang yelo iyang gisabolag ingog abo. (R)
Gisangyaw niya ang iyang pulong kang Jacob, ang iyang mga Iagda ug iyang kasugoan kang Israel. Wala siya maghimog sama niini alang sa bisan unsang nasod; ang iyang kasugoan wala niya ipahibalo kanila. (R)
BERSO SA DILI PA ANG EBANGHELYO
Jn. 6:63c, 68c
Aleluya! Ang mga pulong nga akong gisulti kaninyo鈥擡spiritu ug kinabuhi; ang mga pulong nga naghatag ug kinabuhing walay katapusan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5:17-19
Si Jesus miingon sa iyang mga tinun-an, "Ayaw ninyo hunahunaa nga mianhi ako aron pagsalikway sa Balaod ni Moises ug sa mga pagtulon-an sa mga propeta. Wala ako moanhi aron pagsalikway niini, kondili aron paghatag niini sa hustong kahulugan. Timan-i kini: samtang may langit pa ug yuta, bisan ang labing gamay nga kudlit o ang labing diyotay nga bahin sa Balaod, dili gayod sayloan hangtod matuman ang tanan. Busa ang dili magtuman bisan sa labing gamayng bahin sa kasugoan, ug magtudlo sa uban sa pagbuhat sa ingon, mahimong labing iwit sa Gingharian sa langit. Apan ang magtuman sa Balaod ug magtudlo sa uban sa pagbuhat sa ingon mahimong dako sa Gingharian sa langit."
ANG EBANGHELYO SA GINOO.
DAYGON IKAW, O KRISTO.
