PAGBASA GIKAN SA BASAHON NI PROPETA DANIEL
Dn. 3:25, 34-43
Si Azarias mihunong ug mibarog didto sa kalayo ug nag-ampo sa kusog nga tingog: "Tungod sa imong ngalan, O Ginoo, ayaw kami itugyan sa kadautan sa kahangturan, ayaw kawanga ang imong kasabutan. Ayaw kami pagkuhai sa imong kaluoy, tungod ni Abraham, imong minahal, ni Isaac imong sulugoon ug ni Israel imong balaan, nga imong gisaaran nga imong padaghanon ang ilang kaliwat sama sa mga bitoon sa kalangitan, o sa balas diha sa kabaybayonan sa dagat. Kay naut-ot kami, O Ginoo, labaw sa bisan unsang nasod, naalaut bisan diin sa kalibutan niining adlawa tungod sa among kasal-anan. Karong mga adlawa wala na kamiy hari, propeta o pangulo walay hinurot pagsunog, walay sakripisyo, halad o insenso, walay dapit nga arang kahalaran sa unang mga bunga, aron makapahimuot kami kanimo. Apan uban sa mahinulsulon nga kasingkasing ug sa maubsanong espiritu dawata kami; ingon og mga hinurot pagsunog nga karnero ug baka, o linibo nga pinatambok nga nating karnero. Busa dawata ang among sakripisyo diha sa imong atubangan karong adlawa samtang nagasunod kami kanimo sa walay pupanagana; kay ang tanan nga nagasalig kanimo dili gayod kaulawan. Ug karon nagasunod kami kanimo sa bug-os nga kasingkasing, nahadlok kami kanimo ug nagaampo kami. Ayaw kami himoa nga maulaw, kondili tagda kami diha sa imong gugma ug dakong kaluoy. Palingkawasa kami pinaagi sa imong kahibulongang mga buhat ug hatagig himaya ang imong ngalan, O Ginoo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 25:4-5, 6-7, 8-9
R. Hinumdomi ang imong mga kaluoy, O Ginoo.
Ang imong mga paagi, O Ginoo, ipahibalo kanako; tudloi ako sa imong mga agianan, Agaka ako diha sa imong kamatuoran ug tudloi ako, kay ikaw man ang Dios nga akong manluluwas. (R)
Hinumdomi ang imong mga kaluoy, O Ginoo, ug ang imong kaayo sukad pa kaniadto. Sa imong kaluoy hinumdomi ako, tungod sa imong kaayo, O Ginoo. (R)
Maayo ug matarong ang Ginoo; sa ingon iyang gipakitaan sa dalan ang makasasala. Iyang giagak ang mapaubsanon ngadto sa katarong, iyang gitudloan ang mapaubsanon sa iyang dalan. (R)
BERSO SA DILI PA ANG EBANGHELYO
Jl. 2:12-13
Aleluya! Nag-ingon ang Ginoo, apan karon, paghinulsol kamo sa kinasingkasing ug balik kanako nga magpuasa, maghilak nga magbangotan. Gisia ang inyong kasingkasing inay ang inyong bisti. Balik sa Ginoo nga inyong Dios, kay maluloy-on siya kaayo, mapailubon ug matinumanon sa saad; andam siya sa pagpasaylo, ug dili sa pagsilot. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 18:21-35
Niadtong panahona miduol si Pedro kang Jesus ug nangutana, "Ginoo, makapila ba makasala kanako ang akong isigkatawo ug ako gihapon siyang pasayluon? Makapito ba?" Si Jesus mitubag, "Dili kay makapito ra, kondili kapito-an ka pito. Kay ang Gingharian sa Langit sama man sa usa ka hari nga nakighusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniyag milyon ka pesos. Ug tungod kay wala man siyay igong ikabayad sa iyang utang, misugo ang iyang agalon nga ibaligya siya ingon nga usa ka ulipon, lakip ang iyang asawa ug ang iyang mga anak ug ang tanan nga iyaha, aron makabayad siya sa utang. Miluhod ang sulugoon atubangan sa iyang agalon, ug nagpakiluoy nga nag-ingon, 'Sir, ayaw intawon ako apikiha, kay bayran ko ra ikaw sa tanan!' Naluoy kaniya ang agalon, busa gipapas niya ang utang sa sulugoon ug iyang gipalakaw." "Milakaw ang tawo ug gikasugat niya ang usa sa iyang mga kaubang sulugoon nga nakautang kaniyag pipila lamang ka pesos. Gilabni dayon niya ug gituok, ug giingnan, 'Bayri na ko sa imong utang!' Ang iyang kaubang sulugoon miluhod ug nagpakiluoy kaniya sa pag-ingon, 'Ayaw intawon ako apikiha kay bayran ko ra ikaw!' Apan wala Siya mosugot; hinonoa, gipapriso niya hangtod nga makabayad sa utang. Sa pagkakita sa ubang sulugoon sa nahitabo, nasubo sila pag-ayo, ug nangadto sila sa ilang agalon ug siya gisuginlan nila sa tanan. Busa gipatawag sa agalon ang sulugoon ug giingnan, 'Banyaga ka! Gipapas ko ang tanan mong utang kay nagpakiluoy ka man kanako. Angay ka untang maluoy sa imong isigkasulugoon, ingon nga ako naluoy kanimo.' Nasuko pag-ayo ang agalon, ug gipapriso niya ang sulugoon aron silotan hangtod nga makabayad siya sa tanang utang." Ug gitapos ni Jesus ang sambingay sa pag-ingon, "Ingon usab niana ang buhaton kaninyo sa akong Amahan nga atua sa langit kon dili kamo mopasaylo sa inyong isigkatawo sa kinasingkasing gayod."
ANG EBANGHELYO SA GINOO.
DAYGON IKAW, O KRISTO.
