PAGBASA GIKAN SA IKADUHANG BASAHON SA MGA HARI
2 Kgs. 5:1-15
May komandante sa kasundalohan sa Siria nga si Naaman. Bantugan siya ug gitamod pag-ayo sa hari. Pinaagi kaniya gihimo sa Ginoo nga madaugon ang Siria. Isog siya apan sanlahon. Ang mga taga-Siria, sa usa nila ka pagsulong sa Israel, nakabihag og usa ka dalagita, ug nag-alagad siya sa asawa ni Naaman. Miingon siya sa asawa ni Naaman, "Maayo unta nga makaadto ang akong agalon sa propeta nga atua sa Samaria aron ayohon siya sa iyang sanla." Busa si Naaman miadto sa hari sa Siria ug gisuginlan niya ang hari bahin sa gisulti sa dalagita nga taga-Israel. Ug miingon ang hari sa Siria, "Adtoa ang hari sa Israel ug padad-an ko ikaw og sulat alang kaniya." Busa miadto siya dala ang katloan kalibo ka buok salapi, unom kalibo ka buok bulawan ug napulo ka espesyal nga mga bisti. Gidala usab niya ang sulat ngadto sa hari sa Israel. Mao kini ang sulat: "Kining sulata nagpahibalo kanimo nga gipadala ko kanimo ang akong alagad nga si Naaman, ug hangyoon ko ikaw pag-ayo sa iyang sanla." Sa dihang nabasa sa hari sa Israel ang sulat, gigisi niya ang iyang bisti ang miingon siya, "Dios ba ako nga may gahum sa pagpatay ug pagbuhi nga gisugo man ako niining tawhana sa pag-ayo sa usa ka sanlahon? Nangita lamang siya'g kapasikaran aron pagpakig-away kanako." Apan sa pagkabalita ni propeta Eliseo nga gigisi sa hari sa Israel ang iyang bisti, gipasugoan niya ang hari ug giingnan, "Nganong gigisi mo man ang imong bisti? Paaria kanako ang sanlahon aron siya masayod nga may propeta dinhi sa Israel." Busa miadto si Naaman uban sa iyang mga kabayo ug mga karwahe ug mihunong siya diha sa pultahan sa balay ni Eliseo. Ug si Eliseo nagsugo'g tawo ngadto kang Naaman aron pag-ingon, "Lakaw ngadto sa Suba sa Jordan ug tunlob makapito ug mamaayo ka." Apan nasuko si Naaman ug milakaw nga nagbagutbot. Siya miingon, "Gipakaingon ko'g moari siya kanako sa gawas ug sangpiton niya ang ngalan sa Ginoo nga iyang Dios, ug iwarawara niya ang iyang kamut sa ibabaw sa sanla ug ayohon niya ako. Dili ba ang mga suba sa Damasco nga mao ang Abana ug Farfar mas maayo pa kay sa mga suba sa Israel? Dili ko gusto nga adto ako maligo sa Jordan." Busa milakaw siya nga naglagot. Apan miduol kaniya ang iyang mga sulugoon ug miingon, "Sir, nganong dili man nimo tumanon ang gisugo sa propeta aron ka mamaayo sa imong sakit?" Busa miadto si Naaman sa Suba sa Jordan ug mitunlob siya makapito, sumala sa gisulti kaniya sa propeta sa Dios, ug nahiuli ang iyang pamanit sama sa panit sa usa ka bata. Unya si Naaman ug ang iyang mga kauban mibalik ngadto sa propeta sa Dios ug miingon, "Karon nasayod na ako nga walay laing Dios sa tibuok kalibutan gawas sa Dios sa Israel, busa dawata kining gasa ko kanimo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 42:2, 3; 43:3, 4
R. Ang akong kalag giuhaw sa buhi nga Dios; kanus-a man ako makaatubang kaniya?
Sama nga ang lagsaw nangandoy sa nagadagan nga mga tubig, sa ingon ang akong kalag nangandoy kanimo O Dios. (R)
Ang akong kalag giuhaw sa Dios, ang buhi nga Dios. kanus-a man ako moadto ug mosud-ong sa nawong sa Dios? (R)
Ipadala ang imong kahayag ug imong kamakanunayon; magtultol sila kanako sa unahan. Ang magdala kanako ngadto sa imong balaan nga bukid, ngadto sa dapit nga imong puluy-anan. (R)
Unya moadto ako sa altar sa Dios, ang Dios sa akong kalipay ug kasadya; Unya magpasalamat ako kanimo diha sa alpa, O Dios, akong Dios. (R)
BERSO SA DILI PA ANG EBANGHELYO
Ps. 130:5, 7
Aleluya! Naglaum ako sa Ginoo, nagsalig ako sa iyang Pulong; kay diha sa Ginoo anaa ang kaluoy ug diha kaniya ang kapuno sa kaluwasan. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 4:24-30
Sa dihang nahiabot na si Jesus sa Nazaret, miingon siya sa mga tawo sa Sinagoga: "Apan sultihan ko kamo niini, ang usa ka propeta dili gayod dawaton sa iyang kaugalingong lungsod. Pamati kamo kanako: Tinuod nga daghang mga biyuda didto sa Israel sa panahon ni Elias, sa dihang walay ulan sulod sa tulo ka tuig ug tunga ug may dakong gutom sa tibuok yuta. Apan wala ipadala si Elias ngadto sa bisan usa kanila, kondili ngadto hinoon sa biyuda sa Sarepta sa kayutaan sa Sidon. Ug may daghan usab nga sanlahon dinhi sa Israel sa panahon ni propeta Eliseo, apan walay bisan usa kanila nga naayo gawas kang Naaman, ang taga-Siria." Sa ilang pagkadungog niini, nangasuko pag-ayo ang tanan nga didto sa Sinagoga. Nanindog sila ug ilang gitaral si Jesus ngadto sa gawas sa lungsod ug gidala ngadto sa tumoy sa bungtod diin natukod ang ilang lungsod, aron ihulog siya sa pangpang. Apan miagi siya sa taliwala sa katawhan ug mipahilayo.
ANG EBANGHELYO SA GINOO.
DAYGON IKAW, O KRISTO.
