🟣 Biyernes sa Ikaduhang Semana sa Kwaresma

PAGBASA GIKAN SA BASAHON SA GENESIS

Gn. 37:3-4, 12-13, 17-28

Gipangga ni Jacob si Jose labaw sa tanan niyang mga anak, sanglit natawo man si Jose sa tigulang na si Jacob. Gitahian niya si Jose og taas nga bisti nga binuktonan. Ug sa nakita sa iyang mga igsuon nga gipangga sa ilang amahan si Jose labaw kanila, naglagot sila kaniya ug masuk-anon kanunay ang ilang sinultihan kaniya. Usa ka adlaw niana, miadto sa Siquem ang mga igsuon ni Jose aron pagpasibsib sa kahayopan sa ilang amahan. Miingon Si Jacob kang Jose, "Tua sa Siquem ang imong mga igsuon aron pagpasibsib sa atong kahayopan. Pangandam kay paapason ko ikaw kanila." Si Jose mitubag, "Andam ako!" Ang tawo miingon, "Wala na sila dinhi; nadungog ko nga miingon sila nga moadto sila sa Dotan." Busa miapas si Jose kanila, ug nakaplagan niya sila didto sa Dotan. Layo pa gani siya, nakakita na kaniya ang iyang mga igsuon. Sa wala pa siya mahiabot kanila, naglaraw sila kon unsay ilang angay buhaton kaniya. Nakahukom sila nga patyon siya; nag-ingnanay sila, "Ania na ang tigdamgo. Karon patyon ta siya ug itambog ta ang iyang lawas sa usa sa mga atabay, ug moingon kita nga gitukob siya'g ihalas nga mananap. Tan-awon ta kon matuman ba ang iyang mga damgo." Nakabati si Ruben sa ilang gipanagsultihan ug gipaningkamutan niya pagluwas si Jose. Siya miingon, "Dili nato siya patyon". Ihulog lamang siya dinhi niining atabay sa kamingawan, apan ayaw siya ninyog dagmali." Gisulti kini ni Ruben kay naghunahuna man siya sa pagluwas kang Jose aron iyang dad-on balik sa ilang amahan. Sa pag-abot ni Jose sa iyang mga igsuon, gihukas nila ang taas niyang bisti nga binuktonan. Unya gidala nila siya ngadto sa atabay nga walay tubig ug gihulog siya didto. Unya samtang nangaon sila, nakita nila ang usa ka panon sa mga Ismaelita gikan sa Galaad. Nagbaguod ang ilang mga kamelyo sa karga nga mga salong ug mga pahumot nga ilang dad-on ngadto sa Ehipto. Miingon si Juda sa iyang mga igsuon, "Unsa may makuha nato kon patyon ta ang atong igsuon ug ililong ang iyang kamatayon? Maayo pa'g ibaligya ta siya sa mga Ismaelita. Sa ingon niini, dili kita makapasakit kaniya; hinumdoman ta nga ato siyang igsuon ug kaputol tag tinai." Miuyon niini ang iyang mga igsuon. Ug sa pag-agi sa mga negosyante nga taga-Midian, gikuha nila si Jose sa atabay, ug gibaligya og kawhaan ka buok salapi ngadto sa mga Ismaelita, nga nagdala kaniya ngadto sa Ehipto.

SALMO RESPONSORYO

Ps. 105:16-1 7, 18-19, 20-21

R. Hinumdomi ang mga katingalahan nga nahimo sa Ginoo.

Sa pagpakanaug sa Ginoo sa usa ka gutom nganhi sa yuta ug sa paglaglag sa mga tanom nga nagbuhi kanila, Iyang gipadala ang usa ka tawo una kanila, Si Jose, nga gibaligya ingo'g usa ka ulipon. (R)

Ila siyang gikargahan og mga gapos, ug gipusasan og mga kadena, hangtod nga ang iyang panag-an natuman ug nagpakita sa iyang kamatinud-anon. (R)

Gipatawag siya sa hari ug gibuhian, ang magmamando sa katawhan mipalingkawas kaniya. Gihimo siya nga agalon sa iyang balay ug magmamando sa tanan niyang mga katigayonan. (R)

BERSO SA DILI PA ANG EBANGHELYO

Jn. 3:16

Aleluya! Kay gihigugma pag-ayo sa Dios ang kalibutan ug tungod niini gihatag niya ang iyang bugtong Anak, aron nga ang tanan nga motuo kaniya dili mamatay, kondili makabaton hinuon sa kinabuhing dayon. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 21:33-43, 45-46

Si Jesus miingon ngadto sa mga labawng pari ug sa mga kadagkoan sa katawhan: "Pamati kamo og laing sambingay. May usa ka tawo nga yutaan nga nagtanom og mga paras. Gikoral niya kini ug gikalotag lungag nga kasudlan sa giniok nga ubas, ug nagtukod siyag bantayan. Unya gipasaopan niya ang iyang parasan ug milangyaw siya. Sa tingpamupo na sa ubas, gipadala niya ang iyang mga ulipon ngadto sa mga saop aron pagkuha sa iyang bahin. Apan gidakop sa mga saop ang mga ulipon; gibunalan nila ang usa, ug ang usa ilang gipatay, ug ang lain pa gayod ilang gibato. Unya gipadala pa gayod niya ang laing mga ulipon nga labaw pa kadaghan kay sa unang gipadala, ug mao gihapon ang gibuhat sa mga saop kanila. Sa katapusan gipadala niya ang iyang anak. Miingon siya, 'Sa walay duhaduha tahuron gayod nila ang akong anak.' Apan sa dihang nakita sa mga saop ang anak, nag-ingnanay sila, 'Ania ang anak sa tag-iya. Tana, patyon ta siya, ug maato na ang parasan!' Busa siya ilang gidakop, gitaral ngadto sa gawas sa parasan, ug gipatay." "Karon, inig-abot sa tag-iya, unsa may iyang buhaton sa mga saop?" nangutana si Jesus. Sila mitubag, "Sa walay duhaduha patyon niya kadtong mga tawong dautan, ug pasaopan niya ang parasan og laing mga tawo nga makahatag kaniya sa iyang bahin sa abot sa hustong panahon." Si Jesus miingon kanila, "Wala ba kamo makabasa sa giingon sa Kasulatan? 'Ang bato nga gisalikway sa mga magtutukod kay walay kapuslanan, Nahimo hinoong bato nga labing importante. Buhat kini sa Ginoo, Ug kahibulongan gayod kini!"' Ug midugang si Jesus, "Busa sultihan ko kamo nga ang Gingharian sa Dios kuhaon gikan kaninyo ug ihatag ngadto sa mga tawo nga makahatag og maayong mga bunga." Nakabati ang kadagkoan sa mga pari ug ang mga Pariseo sa mga sambingay ni Jesus ug nakasabut sila nga nagsulti siya mahitungod kanila, busa naninguha sila pagdakop kaniya. Apan nahadlok sila sa mga tawo nga miila kang Jesus nga usa ka propeta.