PAGBASA GIKAN SA BASAHON NI PROPETA JEREMIAS
Jer. 17:5-10
Nag-ingon ang Ginoo, "Silotan ko ang tawo nga motalikod kanako, ug mosalig hinoon sa mga tawo, ug sa kusog sa tawo. Sama siya sa usa ka kupongkupong sa kamingawan, nga nagtubo sa ugang yuta, o sa yuta nga parat diin walay laing tanom nga moturok; ug wala gayoy maayo nga maangkon niya. "Apan panalanginan ko ang tawo nga mosalig kanako. Mahisama siya sa kahoy duol sa tubig; mokuyanap ang mga gamut niini ngadto sa sapa. Dili siya mabalaka kon ting-init na, kay dili matagas ang iyang mga dahon. Kon dili moulan dili gihapon siya mabalaka, ug magsigi siyag pamunga. "Kinsa may makatukib sa kasingkasing sa tawo? Walay molabaw niini kamalimbongon; ug Iabihan kini kadautan. Ako, ang Ginoo, nagsusi sa hunahuna ug nag-usisa sa kasingkasing sa tawo. Gantihan ko ang tawo sumala sa iyang binuhatan ug sa iyang pagkinabuhi."
ANG PULONG SA GINOO.
SALAMAT SA DIOS.
SALMO RESPONSORYO
Ps. 1:1-2, 3, 4, 6
R. Bulahan sila nga nagalaum sa Ginoo.
Bulahan ang tawo nga wala magsunod sa tambag sa dautan ni maglakaw sa dalan sa makasasala, ni makig-uban sa mga walay ulaw, kondili nalipay pagpalandong sa balaod sa Ginoo adlaw ug gabii. (R)
Sama siya sa usa ka kahoy nga gitanom duol sa masulog nga tubig, nga nagahatag sa iyang bunga sa tingbunga, ang iyang dahon dili gayod malarag. (Bisag unsay iyang buhaton molampus.) (R)
Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan nagalaglag sa dalan sa dautan. (R)
BERSO SA DILI PA ANG EBANGHELYO
Lk. 8:15
Aleluya! Ang binhi nga nahulog sa maayong yuta mao kadtong nakadungog sa mensahe ug midawat ug mituman niini, ug magpadayon hangtod nga mamunga sila. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 16:19-31
Miingon si Jesus ngadto sa mga Pariseo: "May usa ka dato nga nagsul-ob sa labing mahal nga bisti ug nagpuyo nga luho kaayo. May usa usab ka kabus nga ginganla'g Lazaro, kansang lawas nalukop sa mga nuka, ug pagadad-on siya ngadto sa pultahan sa balay sa dato, basin na lang makakaon siya sa mga mumho nga mangatagak gikan sa lamesa sa dato. Ug bisan ang mga iro manuol ug motilap sa iyang mga nuka. Unya namatay si Lazaro ug gidala sa mga anghel ngadto sa kiliran ni Abraham, didto sa kombira sa langit; ang dato usab namatay ug gilubong, ug nag-antos pag-ayo didto sa Hades. Unya miyahat siya ug iyang nakita si Abraham didto sa layo, ug si Lazaro sa tupad niya. Busa misinggit siya ngadto kang Abraham, 'Amahan! Kaloy-i intawon ako, ug ipadala si Lazaro diri aron itunlob ang iyang tudlo sa tubig ug pabugnawan ang akong dila, kay nag-antos ako pag-ayo sa kainit niining kalayo!' Apan si Abraham mitubag, 'Anak, hinumdomi nga sa didto ka pa sa kalibutan, nabuhong ka sa tanang maayong butang, samtang si Lazaro lunlon lamang daotan ang nahiagoman. Apan karon malipayon na siya diri, samtang ikaw diha nag-antos. Gawas pa niana, anaay lawom nga bung-aw nga nag-ulang kanato, aron kadtong buot motabok nganha kanimo gikan diri dili makahimo, ni ang anaa diha makatabok ngari kanamo.' Ang dato mitubag, 'Kon mao kana, Amahan, hangyoon ko ikaw nga imo untang ipadala si Lazaro ngadto sa amo, diin ako may lima ka igsuong lalaki. Paadtoa siya aron sila kapasidan-an ug dili mahianhi niining dapit sa kasakitan.' Si Abraham miingon, 'Atua didto si Moises ug ang mga propeta mga magpasidaan kanila; sila nay mahibalo sa pagpamati sa ilang isulti.' Ang dato mitubag, 'Apan Amahan, kana dili pa igo! Kon adunay mabanhaw ug moadto kanila, mamiya gayod sila sa ilang mga sala.' Apan miingon si Abraham, 'Kon dili sila mamati kang Moises ug sa mga propeta, dili gayod sila makabig bisan pa'g may mabanhaw.'"
ANG EBANGHELYO SA GINOO.
DAYGON IKAW, O KRISTO.
