🟣 Ikaduhang Domingo sa Kwaresma

PAGBASA GIKAN SA BASAHON SA GENESIS

Gn. 12:1-4

Ang Ginoo miingon kang Abram, "Biyai ang imong nasod ug ang imong mga paryenti ug ang balay sa imong amahan, ug lakaw ngadto sa usa ka nasod nga ipakita ko kanimo. Hatagan ko ikaw og daghang kaliwat ug sila nahimong dakong nasod. Panalanginan ko ikaw ug himoon kong bantogan ang imong ngalan aron gamiton kini sa pagpanalangin alang sa uban." "Panalanginan ko kadtong magapanalangin kanimo, apan tunglohon ko kadtong magtunglo kanimo. Ang tanang nasod sa kalibutan maghangyo kanako nga panalanginan ko sila ingon sa pagpanalangin ko kanimo." Sa nagpanuigon na'g kapitoa'g-lima si Abram, mibiya siya sa Haran sumala sa gisugo kaniya sa Ginoo, ug mikuyog kaniya si Lot.

SALMO RESPONSORYO

Ps. 33:4-5, 18-19, 20, 22

R. O Ginoo, kaloy-i kami, sanglit nagasalig kami kanimo.

Matarong ug ang tanan niyang mga buhat kasaligan. Nahigugma siya sa husto ug matarong; puno ang yuta sa kaluoy sa Ginoo. (R)

Tan-awa, ang mga mata sa Ginoo anaa kanila nga mahadlokon kaniya, kanila nga nagalaum sa iyang kaayo, Aron pagluwas kanila gikan sa kamatayon ug pag-amping kanila sa panahon sa gutom. (R)

Ang among kalag nagapaabot sa Ginoo, nga mao ang among hinabang ug among taming. Maania unta kanamo, O Ginoo, ang imong kaluoy, kami nga nagalaum kanimo. (R)

PAGBASA GIKAN SA IKADUHANG SULAT NI SAN PABLO NGADTO KANG TIMOTEO

2 Tm. 1:8-10

Busa ayaw kaulaw sa pagsaksi sa atong Ginoo, ug kanako nga iyang binilanggo. Hinonoa, pakig-ambit sa mga pag-antos tungod sa Maayong Balita, sumala sa kusog nga ihatag sa Dios kanimo. Giluwas kita niya ug gipili aron maiyang katawhan, dili tungod sa atong nabuhat kondili tungod sa iyang kaugalingong tuyo ug grasya. Gihatag niya kanato kining maong grasya diha kang Cristo Jesus sa wala pa magsugod ang panahon, apan karon gipakita na kanato pinaagi sa pag-abot sa atong Manluluwas nga si Cristo Jesus. Gibuntog niya ang gahom sa kamatayon, ug pinaagi sa Maayong Balita gipadayag niya ang kinabuhing walay katapusan.

BERSO SA DILI PA ANG EBANGHELYO

Mt. 17:5

Aleluya! Gikan sa masiga nga panganod nadungog ang tingog sa Amahan: Mao kini ang akong Anak nga hinigugma pamati-a ninyo siya. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 17:1-9

Tapos sa unom ka adlaw gidala ni Jesus si Pedro ug ang magsuon nga si Santiago ug si Juan ngadto sa usa ka taas nga bukid. Samtang nagtan-aw sila kaniya, nausab ang iyang panagway; ang iyang nawong misanag sama sa adlaw, ug naputi ang iyang bisti sama sa kahayag. Unya nakita sa tulo ka tinun-an si Moises ug si Elias nga nakigsulti kang Jesus. Si Pedro miingon kang Jesus, "Ginoo, maayo nga ania kita dinhi; kon gusto ka, magbuhat ako dinhi og tulo ka payag, usa alang kanimo, usa alang kang Moises, ug usa alang kang Elias." Samtang nagsulti siya niini, usa ka masanag nga panganod mitabon kanila, ug unya usa ka tingog gikan sa panganod miingon, "Kini ang pinangga kong Anak nga akong gikahimut-an. Pamati kamo kaniya!" Sa pagkadungog sa mga tinun-an sa tingog, nangahadlok sila pag-ayo ug tungod niini, nanghapa sila. Miduol si Jesus ug gihikap sila. "Tindog kamo ug ayaw kahadlok," miingon siya. Sa paghangad nila, wala na silay laing nakita gawas kang Jesus. Samtang nanglugsong sila sa bukid, gipinahan sila ni Jesus, "Ayaw ninyo isugilon kang bisan kinsa kining panan-awon nga inyong nakita hangtod nga mabanhaw na ang Anak sa Tawo."