PAGBASA GIKAN SA BASAHON SA DEUTERONOMIO
Dt. 26:16-19
Misulti si Moises ngadto sa katawhan, nga nag-ingon: "Niining adlawa gisugo kamo sa Ginoo nga inyong Dios sa pagtuman niining tanang mga balaod sa bug-os ninyong kasingkasing ug kalag. Gipahayag ninyo karon nga ang Ginoo mao ang inyong Dios ug nga magkinabuhi kamo sumala sa iyang kabubut-on ug tumanon ninyo ang iyang mga sugo. Karong adlawa usab miingon ang Ginoo nga kamo iyang katawhan, sumala sa gisaad niya kaninyo, ug nga kamo magtuman sa tanan niyang mga sugo, ug nga himoon kamo niyang labaw sa tanang nasod, alang sa iyang dungog ug himaya, usa ka balaang katawhan nga iya sa Ginoo nga inyong Dios, sumala sa iyang gisaad."
ANG PULONG SA GINOO.
SALAMAT SA DIOS.
SALMO RESPONSORYO
Ps. 119:1-2, 4-5, 7-8
R. Bulahan sila nga nagasunod sa Balaod sa Ginoo.
Bulahan sila kansang kinabuhi walay ikasaway, nga nagalakat diha sa balaod sa Ginoo. Bulahan sila nga nagatuman sa iyang mga kasugoan, nga nangita kaniya sa tibuok nilang kasingkasing. (R)
Nagsugo ka nga tumanon pag-ayo ang imong mga sugo. Hinaut unta nga maglig-on ako diha sa mga dalan sa pagtuman sa imong mga kasugoan. (R)
Pasalamatan ko ikaw sa matarong nga kasingkasing, sa pagkasayod nako sa imong matarong nga mga gimbut-an. Ampingan ko ang imong mga kasugoan; ayaw gayod ako biyai. (R)
BERSO SA DILI PA ANG EBANGHELYO
2 Cor. 6:2b
Aleluya! Mao na kini ang takna sa pagdawat sa kaluoy sa Dios; karon mao na ang adlaw sa kaluwasan! Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5:43-48
Si Jesus miingon sa iyang mga tinun-an, "Nakadungog kamo nga giingon kaniadto, 'Higugmaa ang imong mga higala, ug dumti ang imong mga kaaway.' Apan karon sultihan ko kamo: higugmaa ang inyong mga kaaway, ug pag-ampo kamo alang sa mga tawo nga nagpasipala kaninyo, aron mahimo kamong mga anak sa inyong Amahan nga atua sa langit. Kay siya, sa walay pagpili, nagpadan-ag sa iyang adlaw ug naghatag og ulan ngadto sa mga matarong ug sa mga makasasala. Nganong magpaabot man kamo nga mobalos kaninyo ang Dios, kon kamo nahigugma lamang sa mga tawo nga nahigugma kaninyo? Bisan gani ang mga kobrador sa buhis nagbuhat man niana! Kon kamo makighimamat lamang sa inyong mga higala, unsa may nahimo ninyo nga labaw pa sa kasagaran? Bisan gani ang mga tawo nga wala magtuo sa Dios nagbuhat man niana! Kinahanglan magmahingpit kamo ingon nga hingpit ang inyong Amahan nga atua sa langit."
ANG EBANGHELYO SA GINOO.
DAYGON IKAW, O KRISTO.
