PAGBASA GIKAN SA BASAHON NI PROPETA EZEQUIEL
Ez. 18:21-28
"Apan kon ang tawong dautan maghinulsol sa tanang sala nga iyang nahimo ug motuman sa tanan kong mga sugo ug magbuhat subay sa balaod ug sa katarong, maluwas siya ug dili mamatay. Hikalimtan sa hingpit ang tanan niyang sala, ug tungod sa pagkamatarong nga iyang nahimo, maluwas siya. Dili ako malipay nga mamatay ang usa ka makasasala; hinonoa, palabihon ko nga maghinulsol siya sa iyang sala aron maluwas siya," nag-ingon ang Ginoong Dios. "Apan sa diha nga ang usa ka tawong matarong mobiya sa iyang pagkamatarong ug magpakasala, ug magbuhat sa mga salawayong butang nga gibuhat sa tawong dautan, maluwas ba siya? Dili na gayod hinumdoman ang mga matarong niyang buhat tungod sa pagbudhi ug sa sala nga iyang nahimo; busa mamatay siya." "Moingon kamo, 'Dili matarong ang paagi sa Ginoo.' Pamati katawhan sa Israel: Dili ba matarong ang akong paagi? Dili ba ang inyo mang mga paagi maoy dili matarong? Kon ang usa ka tawong matarong mobiya sa iyang pagkamatarong ug magpakasala siya, mamatay siya tungod niini. Kon ang usa ka tawong dautan mobiya usab sa iyang pagkadautan ug buhaton niya ang husto ug matarong, maluwas siya. Tungod kay siya mibiya man sa tanan niyang sala, maluwas gayod siya."
ANG PULONG SA GINOO.
SALAMAT SA DIOS.
SALMO RESPONSORYO
Ps. 130:1-2, 3-4, 5-7, 7-8
R. Kon ikaw, O Ginoo, magtimaan sa among kalapasan kinsay makalahutay?
Gikan sa kahiladman nagatuwaw ako kanimo, O Ginoo; Ginoo, patalinghugi ang akong tingog. Abliha ang imong mga dalunggan sa akong tingog nga nangamuyo. (R)
Kon ikaw, O Ginoo, magtimaan sa among kalapasan, Ginoo, kinsay makalahutay? Apan diha kanimo anaa ang pasaylo, aron ikaw pagatahuron. (R)
Nagasalig ako sa Ginoo; ang akong kalag nagasalig sa iyang pulong. Ang akong kalag nagahulat sa Ginoo labaw sa mga guwardiya nga nagpaabot sa kaadlawon. (R)
Kay diha sa Ginoo anaa ang kaluoy ug diha kaniya ang kapuno sa kaluwasan; ug iyang luwason ang Israel sa tanan niyang kadautan. (R)
BERSO SA DILI PA ANG EBANGHELYO
Ez. 18:31
Aleluya! Isalikway ninyo ang tanang ninyong sala ug bag-oha ang inyong kasingkasing ug hunahuna. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5:20-26
Busa mag-ingon ako kaninyo nga dili kamo makasulod sa Gingharian sa Langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo. "Nasayod kamo nga ang mga tawo giingnan kaniadto, 'Ayaw pagpatay; ang makapatay taralon sa hukmanan.' Apan sultihan ko kamo nga ang masuko sa iyang isigkatawo dad-on ngadto sa maghuhukom, ug ang maghingalag kuwanggol sa iyang isigkatawo taralon ngadto sa Labaw'ng Hukmanan, ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno. Busa inigdala na nimo sa imong haIad sa Dios ngadto sa halaran ug didto mahinumdoman mo nga nasilo kanimo ang imong isigkatawo, biyai ang imong halad atubangan sa halaran, ug adtoa dayon ang imong isigkatawo, ug pakig-uli una kaniya. Unya balik sa halaran ug ihalad ang imong halad sa Dios." "Kon may mokiha kanimo ug dad-on ka niya sa hukmanan, pakighusay kaniya samtang may panahon pa ug wala pa kamo moabot didto; kay kon kamo moabot na sa hukmanan, itugyan ka niya sa huwes, ug ang huwes motugyan kanimo sa polis, ug ibalhog ka sa bilanggoan. Ug timan-i: bilangguon ka didto hangtud kabayran mo sa hingpit ang imong multa."
ANG EBANGHELYO SA GINOO.
DAYGON IKAW, O KRISTO.
