PAGBASA GIKAN SA BASAHON NI ESTER
Est. 12:14-16, 23-25
Si Rayna Ester, sa dakong kasakit midangop sa Ginoo. Nag-ampo siya sa Ginoo, ang Dios sa Israel, "Akong Ginoo, ug Hari, ikaw lamang mao ang Dios. Nag-inusara Iamang ako, ug wala akoy kadangpan gawas kanimo. Tabangi intawon ako! Hapit na itahan ko ang akong kinabuhi. O Ginoo, kutob sa akong hinumdoman, ang akong banay nagsugilon kanako giunsa nimo pagpili ang Israel gikan sa tanang kanasuran ug giunsa nimo kanhi sa pagpili sa among mga katigulangan aron mahimong imong katawhan hangtod sa kahangturan. Imong gituman ang tanan nimong mga saad ngadto kanila." "Hinumdomi kami, O Ginoo. Umari ka kanamo niining panahon sa kasamok. Hatagi ako og kaisog. Hari sa tanang Dios ug Magmamando sa tanang gahom nga yutan-on. Hatagi ako sa hustong mga pulong nga akong isulti sa akong pag-atubang ni Asuero, kanang lampingasan nga liyon. Usba ang iyang kasingkasing aron awayon niya si Aman, ang among kaaway, ug laglagon siya ug ang iyang mga lumalaban. Luwasa kami, O Ginoo. Tabangi ako; nag-inusara lamang ako, ug walay bisan kinsa nga akong kapaingnan gawas kanimo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 138:1-2, 2-3, 7-8
R. Ginoo, sa adlaw nga nagsangpit ako sa imong panabang, imo ako nga gipatalinghugan.
Pasalamatan ko ikaw, O Ginoo sa tibuok kong kasingkasing (kay imong gidungog ang mga pulong sa akong ba-ba) sa atubangan sa mga anghel awiton ko ang imong kadayganan: Magasimba ako didto sa imong balaan nga templo ug pasalamatan ko ang imong ngalan. (R)
Tungod sa imong kaluoy ug sa imong kamatuoran; kay imong gihimong dako labaw sa tanan ang imong ngalan ug ang imong saad. Sa akong pagsangpit, gipatalinghugan mo ako; imo akong gilig-on sulod sa akong kaugalingon. (R)
Ang imong tuong kamut nagaluwas kanako. Ang Ginoo maghingpit sa iyang gibuhat kanako, Ang imong kaluoy, O Ginoo, nagalungtad hangtod sa kahangturan; ayaw pagbiyai ang buhat sa imong mga kamut. (R)
BERSO SA DILI PA ANG EBANGHELYO
Ps. 51:12,14
Aleluya! O Dios, paggama dinhi kanako ug usa ka malinis nga kasingkasing; ihatag kanako pagbalik ang kasadya sa imong kaluwasan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 7:7-12
Si Jesus miingon sa iyang mga tinun-an, "Pangayo kamo, ug kamo hatagan; pangita kamo, ug kamo makakaplag; pagtuktok kamo, ug ablihan ang pultahan alang kaninyo. Kay hatagan ang mangayo, ug makakaplag ang mangita, ug ablihan ang pultahan alang kaniya nga nagtuktok. Kamong mga amahan, hatagan ba ninyo'g bato ang inyong anak kon siya mangayo'g pan? O hatagan ba ninyog bitin kon mangayo'g isda? Kon kamo nga mga dautan mahibalong mohatag og maayong butang ngadto sa inyong mga anak, unsa pa kaha ang inyong Amahan nga atua sa langit? Mohatag gayod siya sa mga maayong butang niadtong mangayo kaniya!" "Buhata sa uban ang buot ninyo nga buhaton nila kaninyo: kini ang kahulugan sa Balaod ni Moises ug sa pagtulon-an sa mga propeta."
ANG EBANGHELYO SA GINOO.
DAYGON IKAW, O KRISTO.
