PAGBASA GIKAN SA BASAHON NI PROPETA JONAS
Jon. 3:1-10
Ang Ginoo miingon kang Jonas, "Lakaw ngadto sa dakong siyudad sa Ninibe ug isangyaw didto ang gipamulong nga gitugyan ko kanimo." Busa miadto si Jonas sa Ninibe. Ang Ninibe dako kaayo nga siyudad ug nagkinahangla'g tulo ka adlaw'ng pagbaktas tadlas niini. Si Jonas misulod sa siyudad, ug tapos sa usa ka adlaw'ng pagbaktas miingon siya, " Laglagon ang Ninibe tapos sa kwarinta ka adlaw!" Ang tanang molupyo sa Ninibe mituo sa gisulti sa Dios ug nagpuasa. Ang tanang tawo, gikan sa labing inila ngadto sa labing timawa, nagbisti'g sako ilhanan sa ilang paghinulsol. Sa pagkabalita niini sa hari sa Ninibe, mitindog siya gikan sa iyang trono. Unya gihukas niya ang iyang bisti, nagsul-ob siyag sako, ug milingkod sa abo. Ug nagpadala siya'g pahibalo ngadto sa molupyo sa Ninibe. Siya miingon, " Ako ug ang akong mga opisyal nagdili sa tanang tawo ug mananap sa pagkaon ug pag-inom. Kinahanglan ang tanang tawo ug mananap magbisti'g sako. Ang tanan kinahanglan kinasingkasing mag-ampo sa Dios, ug mamiya sa dautang pagkinabuhi. Basin pa'g mausab ang laraw sa Dios ug dili na siya masuko kanato, ug dili kita mangamatay!" Nakita sa Dios ang gibuhat nila; nakita niya nga gibiyaan nila ang ilang dautang pagkinabuhi. Busa nausab ang laraw sa Dios ug wala niya ipahamtang kanila ang makalilisang silot.
ANG PULONG SA GINOO.
SALAMAT SA DIOS.
SALMO RESPONSORYO
Ps. 51:3-4, 12-13, 18-19
R. Ang mahinulsulon ug mapaubsanon nga kasingkasing, O Dios, dili nimo tamayon.
Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi ako'g maayo sa akong kasaypanan, ug linisi ako sa akong kasal-anan. (R)
Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu. (R)
Kay dili ikaw mahimuot sa mga sakripisyo; kon maghalad ako og halad nga sinunog, dili ikaw modawat niini. Ang akong sakripisyo, O Dios, mao ang mahinulsulon nga espiritu; usa ka kasingkasing nga mahinulsulon ug mapaubsanon, O Dios, dili nimo tamayon. (R)
BERSO SA DILI PA ANG EBANGHELYO
Jl. 2:12-13
Aleluya! Nag-ingon ang Ginoo, "Apan karon, paghinulsol kamo sa kinasingkasing ug balik kanako nga magpuasa, maghilak ug magbangotan. Gisia ang inyong kasingkasing inay ang inyong bisti." Balik sa Ginoo nga inyong Dios, kay maluloy-on siya kaayo, mapailubon ug matinumanon sa saad; andam siya sa pagpasaylo, ug dili sa pagsilot. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 11:29-32
Samtang nagpunsisok ang mga tawo libot ni Jesus, mipadayon siya pagsulti, "Pagkadautan gayod sa katawhan niining panahona! Nangayo sila'g usa ka milagro nga ilhanan sa pag-uyon sa Dios, apan walay ihatag kanila gawas niadtong milagro nga nahitabo kang Jonas. Ingon nga si Jonas maoy usa ka ilhanan alang sa mga tawo sa Ninibe, ang Anak sa Tawo usab maoy mahimong ilhanan alang sa mga tawo niining panahona. Sa Adlaw sa Paghukom ang Rayna sa Habagatan mobangon ug mosudya sa mga tawo niining panahona, kay mipanaw siya'g katunga sa kalibutan aron lang pagpamati sa makinaadmanong mga pagtulon-an ni Solomon; ug hibaloi nga dinhi aniay labaw pa kang Solomon. Sa Adlaw sa Paghukom ang mga tawo sa Ninibe mamangon ug mosudya kaninyo, kay naghinulsol man sila sa ilang mga sala sa pagkabati nila sa wali ni Jonas; ug hibaloi nga dinhi aniay labaw pa kang Jonas!
ANG EBANGHELYO SA GINOO.
DAYGON IKAW, O KRISTO.
