PAGBASA GIKAN SA BASAHON NI PROPETA ISAIAS
Is. 55.10-11
"Kay ingon nga ang ulan ug ang yelo mangahulog gikan sa langit ug dili na mobalik didto, kondili mopatubig hinoon sa yuta aron manurok ang mga tanom niini, ug kahatagag binhi ang magpupugas ug pagkaon ang mga tawo, ang akong mga pulong usab dili mobalik kanako nga kawang lamang; hinonoa, tumanon niini ang akong tuyo ug molampos gayod kini.
ANG PULONG SA GINOO.
SALAMAT SA DIOS.
SALMO RESPONSORYO
Ps. 34:4-5, 6-7, 16-17, 18-19
R. Ang Dios magluwas sa mga matarong gikan sa tanan nilang mga kagul-anan.
Himayaa ang Ginoo uban kanako, atong ibayaw ang iyang ngalan. Gipangita ko ang Ginoo, ug iya akong gitubag, ug giluwas ako sa tanan kong mga gikahadlokan. (R)
Tan-awa siya aron mosanag kamo sa kalipay, ug ang inyong mga nawong dili manlipaghong sa kaulaw. Sa pagsangpit sa nag-antos nga tawo, namati ang Ginoo, ug sa iyang kagul-anan giluwas siya. (R)
Ang Ginoo nagatan-aw sa matarong, ug namati sa ilang mga dangoyngoy. Ang Ginoo miharong sa mga dautan aron dili sila mahinumdoman sa yuta. (R)
Sa pagsangpit sa matarong, ang Ginoo namati kanila, ug gikan sa ilang mga kagul-anan giluwas sila niya. Ang Ginoo haduol kanila nga naguol; ug kanila nga nag-antos nagluwas siya. (R)
BERSO SA DILI PA ANG EBANGHELYO
Mt. 4:4b
Aleluya! Ang tawo dili mabuhi sa pan lamang, kondili sa tanang mga pulong nga nagagikan sa baba sa Dios. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 6:7-15
Si Jesus miingon sa iyang mga tinun-an, "Sa inyong pag-ampo, ayaw daghana ang inyong mga pulong ingon sa gibuhat sa mga pagano nga naghunahuna nga dunggon sila tungod sa taas nilang pag-ampo. Ayaw panig-ingon kanila kay ang inyong Amahan nahibalo nang daan sa inyong gikinahanglan bisan gani sa dili pa kamo mangayo kaniya. Ingna niini pag-ampo: 'Amahan namo nga naa sa langit: Simbahon unta ang ngalan mo; Maghari ka unta kanamo, Ug tumanon ang imong pagbuot dinhi sa yuta ingon nga gituman kini didto sa langit. Ihatag kanamo ang kalan-on nga among gikinahanglan karong adlawa; Ug pasayloa kami sa among mga sala, Ingon nga gipasaylo namo ang nakasala kanamo. Ayaw kami itugyan sa malisod nga pagsulay; luwasa hinoon kami sa dautan. Kay imo ang gingharian, ang gahom ug himaya hangtod sa kahangturan.' Kay kon pasayluon ninyo ang nakasala kaninyo, pasayluon usab kamo sa inyong Amahan nga atua sa langit. Apan kon dili ninyo sila pasayluon, dili usab kamo pasayluon sa inyong Amahan nga atua sa langit.
ANG EBANGHELYO SA GINOO.
DAYGON IKAW, O KRISTO.
