PAGBASA GIKAN SA BASAHON SA LEVITICO
Lv. 19:1- 2, 11-18
Ang Ginoo miingon kang Moises, "Sultihi ang tibuok Israel, pagbalaan kamo, kay ako, ang Ginoo nga inyong Dios, balaan man." "Ayaw pangawat; ayaw kamo paglinimbongay o pagbinakakay. Ug ayaw usab panumpa og bakak ginamit ang akong ngalan, kay sa ingon gipasipad-an ninyo ang ngalan sa inyong Dios. Ako mao ang Ginoo." "Ayaw limbongi o kawati ang inyong isigkatawo. Ayaw langana ang paghatag sa suhol sa usa ka mamumuo. Ayaw insultohi ang tawong bungol, ni alihan mo ang agian sa buta; hinonoa, kahadloki ang inyong Dios. Ako mao ang Ginoo." "Ayaw paghimo og dili matarong nga paghukom; ayaw usab pagdapig sa mga kabus, ni sa mga adunahan; hinonoa, hukmi sa matarong nga paghukom ang inyong isigkatawo. Ayaw panumbalay aron manlibak sa inyong isigkatawo, ni magtinguha kamo sa pagpatay sa inyong isigkatawo: Ako mao ang Ginoo." "Kon may kasilo kamo sa inyong isigkatawo, prangkahi siya, aron dili kamo makasala. Ayaw panimalos, ug ayaw usab pagdumot sa inyong kadugo. Higugmaa ang inyong isigkatawo ingon sa inyong paghigugma sa inyong kaugalingon: Ako mao ang Ginoo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 19:8,9,10,15
R. Ang imong mga pulong, O Ginoo, espiritu ug kinabuhi.
Ang balaod sa Ginoo hingpit, nagalipay sa kalag; Ang kasugoan sa Ginoo kasaligan, nagahatag og kinaadman sa tawo nga yano. (R)
Ang mga sugo sa Ginoo matarong, nagalipay sa kasingkasing; Ang sugo sa Ginoo matin-aw, nagahatag og kahayag sa mata. (R)
Ang kahadlok sa Ginoo malinis, nagalungtad sa kahangturan; Ang mga gimbut-an sa Ginoo matuod silang tanan matarong. (R)
Ang mga pulong sa akong ba-ba ug ang hunahuna sa akong kasingkasing makapahimuot unta kanimo. O Ginoo, akong bato ug akong manunubos. (R)
BERSO SA DILI PA ANG EBANGHELYO
2 Cor. 6:2b
Aleluya! Mao kini ang takna sa pagdawat sa kaluwasan sa Dios; karon mao ang adlaw sa kaluwasan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 25:31-46
Si Jesus miingon sa iyang mga tinun-an, "Inig-anhi sa Anak sa Tawo ingon nga Hari, uban sa tanang mga anghel, molingkod siya sa iyang harianong trono, ug ang tanang tawo sa kalibutan tigomon sa iyang atubangan. Unya bahinon niya sila sa duha ka pundok, sama sa usa ka magbalantay sa hayop nga maglain sa mga karnero gikan sa mga kanding: ibutang niya ang mga karnero sa iyang tuo ug ang mga kanding sa iyang wala. Unya ang Hari moingon sa mga tawo sa iyang tuo, 'Umari kamo nga gipanalanginan sa akong Amahan ug dawata ninyo ang Gingharian nga giandam alang kaninyo sukad pa sa pagbuhat sa kalibutan. Gigutom ako ug inyo akong gipakaon; giuhaw ako ug inyo akong gipainom; dumuduong ako ug inyo akong gidawat sa inyong mga balay; hubo ako ug inyo akong gibistihan; nagmasakiton ako ug inyo akong gialimahan; nabilanggo ako ug inyo akong giduaw.' Unya motubag kaniya ang mga matarong, 'Ginoo, kanus-a man kami makakita kanimo nga gigutom ug gipakaon ka namo, o giuhaw ug gipainom? Kanus-a man kami makakita kanimo nga dumuduong ug midawat kami kanimo sa among mga balay, o hubo ug gibistihan ka namo? Kanus-a man kami makakita kanimo nga nagmasakiton o gibilanggo, ug giduaw ka namo?' Unya ang Hari motubag kanila, 'Sultihan ko kamo nga sa matag higayon nga maghimo kamo niini alang sa usa sa labing ubos niining akong mga igsuon, gihimo ninyo kini alang kanako!' "Unya moingon siya ngadto sa mga tawo sa iyang wala, 'Pahawa kamo kanako, kamong gipanghimaraot sa Dios! Ngadto kamo sa kalayo nga walay pagkapalong nga giandam alang sa Yawa ug sa iyang mga anghel! Gigutom ako, apan wala ako ninyo pakan-a; giuhaw ako, apan wala ako ninyo paimna; dumuduong ako, apan wala ako ninyo dawata sa inyong mga balay; hubo ako, apan wala ako ninyo bistihi; nagmasakiton ako ug nabilanggo, apan wala ako ninyo alimahi.' Unya motubag sila kaniya, 'Ginoo, kanus-a man kami makakita kanimo nga gigutom, o giuhaw, o usa ka dumuduong, o hubo, o nagmasakiton, o nabilanggo, ug wala kami motabang kanimo?' Ang Hari motubag kanila, 'Sultihan ko kamo nga sa matag higayon nga nagdumili kamo pagtabang sa usa niining labing ubos, nagdumili kamo sa pagtabang kanako.' Busa kini sila ipadala ngadto sa walay katapusang silot; apan ang mga matarong moadto sa kinabuhing dayon."
ANG EBANGHELYO SA GINOO.
DAYGON IKAW, O KRISTO.
