PAGBASA GIKAN SA BASAHON SA GENESIS
Gen. 2:7-9; 3:1-7
Unya mikuha ang Ginoong Dios og yuta ug nagbuhat siyag tawo gikan niini; gihuypan niya ang buho sa ilong sa tawo sa makapabuhing gininhawa ug ang tawo nakabaton og kinabuhi. Unya naghimo ang Ginoong Dios og tanaman didto sa Eden, sa silangan, ug gibutang niya didto ang tawo nga iyang gibuhat. Gipatubo sa Ginoong Dios ang tanang matang sa mga kahoy nga maanindot ug mamunga'g mga bunga nga maayong kan-on. Sa taliwala sa tanaman diha ang kahoy nga naghatag og kinabuhi ug ang kahoy nga naghatag og kahibalo unsay maayo ug unsay dautan. Sa tanang mananap nga gibuhat sa Ginoong Dios, ang bitin mao ang labing abtik. Gipangutana sa bitin ang babaye, "Gidid-an ba diay kamo sa Dios pagkaon sa bunga sa tanang kahoy sa tanaman?" Mitubag ang babaye, "Makakaon kami sa bunga sa tanang kahoy sa tanaman, gawas sa kahoy nga anaa sa taliwala niini. Gidid-an kami sa Dios sa pagkaon og bisan gani sa paghikap nianang kahoya; kon supakon namo kini, mamatay kami." Miingon ang bitin, "Dili tinuod nga mamatay kamo! Gisulti kini sa Dios kaninyo kay nasayod man god siya nga kon mokaon kamo niini, maabli ang inyong salabotan ug mahisama kamo kaniya nga nasayod unsay maayo ug unsay dautan." Sa pagkakita sa babaye nga ang maong kahoy maanindot kaayo ug laming kan-on ang bunga niini ug makapahimo kaniyang maalamon, mikuha siya'g bunga ug gikaon niya kini. Unya gihatagan niya ang iyang bana ug mikaon usab siya. Pagkahuman gayod nila'g kaon, naabli ang ilang salabotan ug nakita nila nga hubo diay sila; busa naghimo sila'g mga tapis gikan sa mga dahon sa kahoy'ng igera aron itabon sa ilang lawas.
ANG PULONG SA GINOO.
SALAMAT SA DIOS.
SALMO RESPONSORYO
Ps. 51:3-4, 5-6, 12-13, 14, 17
R. Maluoy ka, Ginoo, kay nakasala kami.
Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi ako'g maayo sa akong kasaypanan ug linisi ako sa akong kasal-anan. (R)
Kay giila ko ang akong kalapasan, ug ang akong sala kanunay ania sa akong atubangan "Kanimo lamang nakasala ako, ug nakabuhat og dautan sa imong atubangan." (R)
Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa kanako ang imong balaang espiritu. (R)
Ibalik kanako ang kasadya sa imong kaluwasan, ug padayona dinhi kanako ang mauyonong espiritu. O Ginoo, ablihi ang akong mga ngabil, ug ang akong baba magsangyaw sa imong kadayganan. (R)
PAGBASA GIKAN SA SULAT NI SAN PABLO NGADTO SA TAGA-ROMA
Rom. 5:12-19 (TINAAS)
Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Dinhi na sa kalibotan ang sala sa wala pa gani ihatag ang Balaod; apan sanglit wala may balaod, wala isipa ang mga sala. Apan sukad sa panahon ni Adan hangtod sa panahon ni Moises ang tanang tawo gigamhan sa kamatayon, lakip kadtong wala makasala sama sa pagpakasala ni Adan sa iyang paglapas sa sugo sa Dios. Naghulagway si Adan sa usa ka tawong umaabot. Apan dili managsama silang duha; kay dili sama sa sala ni Adan ang gasa sa Dios. Kay kon daghan ang nangamatay tungod sa pagkasala sa usa ka tawo, labi pang dako ang grasya ug ang gasa sa Dios nga mabatonan sa daghang tawo pinaagi sa usa ka tawo nga mao si Jesu-Cristo. Ug may kalainan ang sangpotanan sa gasa sa Dios ug sala sa usa ka tawo. Kay gipahamtang ang silot tungod lamang sa usa ka sala, apan ang gasa nga gihatag tapos sa daghang pagpakasala naghimong matarong sa tawo. Kon tungod sa pagpakasala sa usa ka tawo naghari ang kamatayon pinaagi sa maong tawo, Iabi pang maghari kadtong nakadawat sa madagayaong grasya sa Dios ug sa gasa sa iyang pagkamatarong pinaagi kang JesuCristo. Busa ingon nga ang pagpakasala sa usa ka tawo maoy nahimong hinungdan nga silotan ang tanan, pinaagi usab sa matarong buhat sa usa ka tawo maluwas ug makabaton sa kinabuhi ang tanan. Kay ingon nga pinaagi sa pagkamasupilon sa usa ka tawo daghan ang nahimong makasasala, pinaagi usab sa pagkamatinumanon sa usa ka tawo daghan ang gihimong matarong sa Dios.
ANG PULONG SA GINOO.
SALAMAT SA DIOS.
PAGBASA GIKAN SA SULAT NI SAN PABLO NGADTO SA TAGA-ROMA
Rom. 5:12, 17-19 (MINUBO)
Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Kon tungod sa pagpakasala sa usa ka tawo naghari ang kamatayon pinaagi sa maong tawo, Iabi pang maghari kadtong nakadawat sa madagayaong grasya sa Dios ug sa gasa sa iyang pagkamatarong pinaagi kang JesuCristo. Busa ingon nga ang pagpakasala sa usa ka tawo maoy nahimong hinungdan nga silotan ang tanan, pinaagi usab sa matarong buhat sa usa ka tawo maluwas ug makabaton sa kinabuhi ang tanan. Kay ingon nga pinaagi sa pagkamasupilon sa usa ka tawo daghan ang nahimong makasasala, pinaagi usab sa pagkamatinumanon sa usa ka tawo daghan ang gihimong matarong sa Dios.
ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO
Mt. 4:4b
Aleluya! Ang tawo dili mabuhi sa pan lamang, kondili sa tanang mga pulong nga nagagikan sa baba sa Dios. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 4:1-11
Unya gidala si Jesus sa Espiritu ngadto sa kamingawan aron tintalon sa Yawa. Nagpuasa siya sulod sa kap-atan ka adlaw ug kap-atan ka gabii ug unya gigutom siya. Ang Yawa miduol kaniya ug miingon, "Kon Anak ka sa Dios, himoang pan kining mga bato." Si Jesus mitubag, "Ang Kasulatan nag-ingon, 'Dili mabuhi ang tawo sa pan Iamang, kondili sa matag pulong usab nga isulti sa Dios."' Unya si Jesus gidala sa Yawa ngadto sa Balaang Siyudad, ug gipahiluna siya sa kinatas-ang bahin sa Templo, ug giingnan, "Kon ikaw Anak sa Dios, ambak ngadto sa ubos, kay nag-ingon man ang Kasulatan: 'Ang Dios magsugo sa iyang mga anghel pagbantay kanimo: Sapnayon ka nila sa ilang mga kamut, Aron dili madugmok sa bato bisan gani ang imong tiil." Si Jesus mitubag, "Apan nag-ingon usab ang Kasulatan, 'Ayaw tintala ang Ginoo nga imong Dios."' Unya gidala si Jesus sa Yawa ngadto sa usa ka taas kaayong bukid ug gipakita kaniya ang tanang gingharian sa kalibutan ug ang ilang kaanindot. Ang Yawa miingon, "Ihatag ko kanimo kining tanan kon moluhod ka ug mosimba kanako." Si Jesus mitubag, "Pahawa, Satanas! Ang Kasulatan nag-ingon, 'Simbaha ang Ginoo nga imong Dios ug siya lamang ang alagari!"' Busa ang Yawa mibiya kaniya, ug unya nangabot ang mga anghel ug miatiman kaniya.
ANG EBANGHELYO SA GINOO.
DAYGON IKAW, O KRISTO.
