PAGBASA GIKAN SA BASAHON NI PROPETA ISAIAS
Is. 58: 9-14
Ang Ginoo miingon: "Kon likayan ninyo ang pagdaugdaog, ang pagtulisok ug ang dautang pulong, ug pakan-on ninyo ang gigutom, ug hatagan ang mga kabus sa ilang gikinahanglan, mosidlak ang inyong kahayag diha sa kangitngit, ug ang inyong kangitngit, mahisama sa kahayag sa udtong tutok. Tultolan kamo kanunay sa Ginoo, ug tagbawon kamo niya sa mga maayong butang, ug hataga'g kabaskog sa lawas. Mahisama unya kamo sa tanaman nga kanunay gitubigan ug sa tubod sa tubig nga dili gayod mohubas. Unya tukuron pag-usab ang inyong karaang mga siyudad nga nangagun-ob; bangunon ninyo ang mga tinukod sa daghang kaliwatan; tawgon kamog mga tig-ayo sa mga nangagubang paril ug sa mga kabalayan." Nag-ingon ang Ginoo, "Kon dili na kamo magnegosyo sa Adlawng Igpapahulay, ug dili na kamo magtinguha pagtagbaw sa inyong mga kaibog sa adlawng balaan, ug ikalipay na ninyo ang pagtamod sa adlaw'ng balaan sa Ginoo, kon pasidunggan ninyo kini, ug dili na kamo magtuman sa inyong gusto, o manlibak, nan magmalipayon kamo diha sa Ginoo ug tultolan ko kamo nga madaugon latas sa kabukiran. Tagbawon ko kamo sa kabilin ni Jacob nga inyong katigulangan, ako, ang Ginoo maoy nagsulti niini."
ANG PULONG SA GINOO.
SALAMAT SA DIOS.
SALMO RESPONSORYO
Ps. 86:1-2, 3-4, 5-6
R. Tudloi ako sa Imong dalan, O Ginoo, aron magmatinumanon ako diha sa Imong atubangan.
Ipaabong ang Imong dalunggan, O Ginoo; tubaga ako, kay gisakit ako ug ako kabus. Bantayi ang akong kinabuhi, kay nahigugma ako Kanimo; luwasa ang Imong sulugoon nga nagasalig kanimo. (R)
Ikaw ang akong Dios; kaloy-i ako, O Ginoo, kay nagasangpit ako Kanimo sa tibuok adlaw. Lipaya ang kalag sa Imong sulugoon, kay Kanimo, O Ginoo, gibayaw ko ang akong kalag. (R)
Kay Ikaw, O Ginoo, maayo ug mapasayloon, tugob sa gugma alang kanilang tanan nga nagasangpit Kanimo. Pamati, O Ginoo, sa akong pangamuyo, ug patalinghugi ang akong pangilaba. (R)
BERSO SA DILI PA ANG EBANGHELYO
Ez. 33:11
Aleluya! Dili ako buot sa kamatayon sa mga makasasala, nag-ingon ang Ginoo, kondili nga mobalik siya kanako. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 5:27-32
Milakaw si Jesus ug iyang nakita si Levi, usa ka kobrador sa buhis, nga naglingkod sa iyang opisina. Miingon si Jesus kaniya, "Sunod kanako." Ug mitindog si Levi, gibiyaan niya ang tanan, ug misunod kaniya. Unya si Levi naghimog dakong kombira sa iyang balay alang kang Jesus, ug didtoy daghang kobrador sa buhis ug ubang mga tawo nga nakigsalo kanila. Pipila ka mga Pariseo ug ilang mga magtutudlo sa Balaod nagbagulbol batok sa mga tinun-an ni Jesus. Nangutana sila, "Nganong nakigsalo man kamo sa mga kobrador sa buhis ug sa mga makasasala?" Si Jesus mitubag kanila, "Ang mga tawo nga walay sakit wala magkinahanglag doktor, kondili ang mga masakiton lamang. Wala ako moanhi sa pagtawag sa mga matarong, kondili sa mga makasasala aron maghinulsol sila."
ANG EBANGHELYO SA GINOO.
DAYGON IKAW, O KRISTO.
