PAGBASA GIKAN SA BASAHON NI PROPETA ISAIAS
Is. 58:1-9
Ang Ginoo miingon: "Singgit og kusog ug ayaw pagpugongpugong; ipatugbaw ang imong tingog ingon sa trumpeta; sultihi ang akong katawhan sa ilang mga sala, ug ang banay ni Jacob sa ilang kalapasan. Adlaw-adlaw gipangita nila ako, ug malipay sila nga masayod sa akong kabubut-on, daw usa ka nasud nga matarong ug wala magsalikway sa balaod sa ilang Dios. Nangayo sila kanako og hustong hukom ug ikalipay nila ang pagduol sa Dios. Nangutana ang katawhan, "Nganong magpuasa man kami kon dili ka makakita? Nganong magpaubos man kami kon dili ka magpakabana?" Ang Ginoo miingon kanila, "Ang tinuod mao nga samtang nagpuasa kamo nangita kamo sa inyong kalipay, ug gidaugdaog ninyo ang tanan ninyong trabahador. Magpuasa kamo apan mangaway ug mangulata gihapon kamo. Ang pagpuasa nga sama sa inyoha dili makatabang aron dunggon ang inyong pag-ampo. Mao ba kining matanga sa pagpuasa ang makalipay kanako? Mao ba kini ang tinuod nga pagpaubos? Igo na ba ang pagduko sa inyong ulo ingon sa bugang, ug sa pagbanig og sako ug abo? Mao ba kini ang gitawag ninyog puasa, nga kahimut-an sa Ginoo?" "Ang puasa nga akong gikinahanglan mao ang paglugtab sa mga gapos sa sala ug pagtangtang sa higot sa yugo, ingon man sa paghatag og kagawasan sa mga dinaugdaog, ug pagbali sa tanang yugo. Dili ba ang puasa nga akong gikinahanglan mao man nga hatagan ninyog pagkaon ang mga gigutom, ug papuy-on ninyo sa inyong balay ang mga kabus nga walay puloy-anan; ug nga bistihan ninyo ang hubo inay pasagdan ninyo ang inyong kaigsuonan?" "Sa ingon, modan-ag ang inyong kahayag ingon sa banagbanag sa kabuntagon, ug mamaayo kamo pagdali; maggiya kaninyo ang inyong katarong, ug sa inyong luyo panalipdan kamo sa himaya sa Ginoo." "Kon mosangpit kamo sa Ginoo, tubagon kamo niya; kon magpakitabang kamo, dili kamo niya balibaran." "Kon likayan ninyo ang pagdaugdaog, ang pagtulisok ug ang dautang pulong."
ANG PULONG SA GINOO.
SALAMAT SA DIOS.
SALMO RESPONSORYO
Ps. 51:3-4, 5-6, 18-19
R. Usa ka mahinulsulon ug mapaubsanon nga kasingkasing, O Dios, dili nimo tamayon.
Kaloy-i ako, O Dios, diha sa Imong kaayo; sa kadako sa Imong kaluoy papasa ang akong kalapasan. Hugasi akog maayo sa akong kasaypanan ug linisi ako sa akong kasal-anan. (R)
Kay giila ko ang akong kalapasan, ug ang akong sala kanunay ania sa akong atubangan: "Kanimo lamang nakasala ako, ug nakabuhat og dautan sa Imong atubangan." (R)
Kay dili Ikaw mahimuot sa mga sakripisyo; kon maghalad ako og halad nga sinunog, dili Ikaw modawat niini. Ang akong sakripisyo, O Dios, mao ang mahinulsulon nga espiritu; usa ka kasingkasing nga mahinulsulon ug mapaubsanon, O Dios, dili Nimo tamayon. (R)
BERSO SA DILI PA ANG EBANGHELYO
Amos 5:14
Aleluya! Paningkamot kamo pagbuhat sa matarong, dili sa daotan, aron mabuhi kamo. Unya ang Ginoong Dios nga labing gamhanan making-uban gayod kaninyo, ingon sa inyong gipamatud-an. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 9:14-15
Unya miadto kang Jesus ang mga tinun-an ni Juan nga Magbubunyag ug nangutana, "Ngano man nga kami ug ang mga Pariseo masubsob nga nagpuasa, apan wala magpuasa ang imong mga tinun-an?" Si Jesus mitubag, "Naghunahuna ba diay kamo nga magsubo ang mga dinapit sa kombira sa kasal samtang ang pamanhonon uban pa kanila? Dili gayod? Apan moabot ang panahon nga ang pamanhonon kuhaon gikan kanila, ug magpuasa na unya sila."
ANG EBANGHELYO SA GINOO.
DAYGON IKAW, O KRISTO.
