🟣 Huwebes human sa Badlis

PAGBASA GIKAN SA BASAHON SA DEUTERONOMIO

Dt. 30:15-20

Miingon si Moises ngadto sa mga Israelita, "Karong adlawa pagpili kamo niini: kinabuhi ba ug kauswagan, o kamatayon ba ug katalagman. Kon tumanon ninyo ang mga sugo sa Ginoo nga inyong Dios nga gihatag ko kaninyo karong adlawa nga mao ang paghigugma sa Ginoo nga inyong Dios, sa pagsunod sa iyang kabubut-on, ug pagbantay sa tanan niyang mga sugo, mahimo kamong lig-on ug modaghan pag-ayo, ug panalanginan kamo niya sa yuta nga inyong gidulngan, aron mainyo kini. Apan kon inyong isalikway ang akong mga sugo, ug madani kamo sa pagsimba sa laing mga dios, sultihan ko kamo karon nga mangamatay gayod kamo. Mubo lamang ang inyong kinabuhi sa yuta nga inyong panag-iyahon iniglabang ninyo sa Jordan. Gihimo kong saksi karon ang langit ug ang yuta nga kamo gipapili ko sa kinabuhi o kamatayon, sa panalangin o katalagman. Busa pili-a ninyo ang kinabuhi aron kamo ug ang inyong mga kaliwatan molungtad. Higugmaa ang Ginoo nga inyong Dios, alagari siya ug ayaw kamo pagbulag kaniya. Kini makahatag unya kaninyog kusog ug taas nga kinabuhi inigpuyo unya ninyo sa yuta nga gisaad niya sa inyong katigulangan nga si Abraham, si Isaac, ug si Jacob."

SALMO RESPONSORYO

Ps. 1:1-2, 3, 4, 6

R. Bulahan sila nga nagalaum sa Ginoo.

Bulahan ang tawo nga wala magsunod sa tambag sa dautan ni maglakaw sa dalan sa makasasala, ni makig-uban sa mga walay ulaw, kondili nalipay pagpalandong sa balaod sa Ginoo adlaw ug gabii. (R)

Sama siya sa usa ka kahoy nga gitanom duol sa masulog nga tubig, nga nagahatag sa iyang bunga sa tingbunga, ang iyang dahon dili gayod malarag. (Bisag unsay iyang buhaton molampos.) (R)

Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan nagalaglag sa dalan sa dautan. (R)

BERSO SA DILI PA ANG EBANGHELYO

Mt. 4:17

Aleluya! Paghinulsol kamo nag-ingon ang Ginoo, kay ang gingharian sa langit haduol na. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 9:22-25

Si Jesus miingon sa iyang mga tinun-an, "Ang Anak sa Tawo kinahanglan nga mag-antus pag-ayo ug isalikway sa mga punoan sa mga Judio, sa mga kadagkoan sa mga pari, ug sa mga magtutudlo sa Balaod. Patyon siya ug banhawon sa ikatulo ka adlaw." Ug miingon siya sa tanan, "Kon may buot mosunod kanako. Kinahanglan nga magdumili siya sa iyang kaugalingon, magpas-an sa iyang krus sa tanang adlaw, ug magsunod kanako. Kay ang buot magluwas sa iyang kinabuhi kawad-an hinuon niini, apan ang kawad-an sa iyang kinabuhi tungod kanako magluwas niini. Aduna bay makuha ang tawo kon maiya ang tibuok kalibutan apan mawala ang iyang kinabuhi? Wala gayod!"