PAGBASA GIKAN SA SULAT NI SANTIAGO
Jas. 1:12-18
Bulahan ang tawo nga mobarog taliwala sa mga pagsulay; kay sa iyang pagdaog sa mga pagsulay makadawat siya sa kinabuhi, ang ganti nga gisaad sa Dios alang niadtong mga nahigugma kaniya. Kon ang usa ka tawo tintalon, dili siya angay moingon, "Kining tentasyon gikan sa Dios." Kay ang Dios dili man matintal sa pagbuhat ug dautan, ug dili usab siya motintal kang bisan kinsa. Apan moabot ang tentasyon kon ang tawo ganoyon o hayloon sa dautan niyang tinguha. Unya ang iyang dautang tinguha manamkon ug manganak ug sala, ug inigkahingkod na sa sala, manganak kini ug kamatayon. Minahal kong mga igsuon, ayaw kamo palimbong! Ang tanang maayo ug hingpit nga gasa naggikan sa Iangit; gikan kini sa Dios nga maoy nagbuhat sa mga kahayag diha sa langit. Dili gayod siya mausab ni magpakitag landong sa pagkausab. Sa iyang pagbuot iya kitang gihimong mga anak pinaagi sa pulong sa kamatuoran aron sa tanan niyang binuhat mahisama kita sa unang mga bunga.
ANG PULONG SA GINOO.
SALAMAT SA DIOS.
SALMO RESPONSORYO
Ps. 94:12-13, 14-15, 18-19
R. Bulahan ang tawo nga imong tudloan, O Ginoo.
Bulahan ang tawo nga imong gitun-an, O Ginoo, nga pinaagi sa imong balaod imong gitudloan, Gihatagan mo siya og pahulay sa dautang mga adiaw. (R)
Kay ang Ginoo dili mosalikway sa iyang lungsod ni mobiya sa iyang kabilin; Apan ang hukom molungtad pag-usab uban sa katarong, ug ang tanang matarong og kasingkasing magsunod kaniya. (R)
Sa pag-ingon nako, "Nadalin-as ang akong tiil," ang imong kaluoy, O Ginoo, nagasagang kanako; Diha nga nagadaghan ang kabalaka dinhi kanako, ang imong kahupayan nagalipay sa akong kalag. (R)
BERSO SA DILI PA ANG EBANGHELYO
Jn. 14:23
Aleluya! Ang nahigugma kanako magtuman sa akong gisugo. Mahigugma kaniya ang akong Amahan, ug ang akong Amahan ug ako moanha ug magpuyo diha kaniya. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 8:14-21
Ang mga tinun-an nakalimot sa pagdalag pan; apan didtoy usa ka buok pan sa sakayan. Unya miingon si Jesus kanila, "Pagbantay kamo sa igpapatubo sa pan sa mga Pariseo ug ni Herodes." Ug nag-ingnanay sila. "Gisulti niya kini kay wala man kitay pan." Nahibalo si Jesus kon unsay ilang gipanagsultihan, busa gipangutana niya sila, "Nganong naghisgot man kamo mahitungod sa inyong wala pagpakadalag pan? WaIa ba gihapon kamo makasabut? Bugo naba gayod kamo kaayo? May mga mata man unta kamo—dili ba kamo makakita? May mga dalunggan man unta kamo—dili ba kamo makadungog? Wala ba kamo mahinumdom sa akong pagpikaspikas sa lima ka pan alang sa lima ka libo ka mga tawo? Pila ka bukag ang napuno sa mga salin nga inyong nahipos?" "Napulog-duha," mitubag sila. "Ug sa akong pagpikaspikas sa pito ka pan alang sa upat ka libo ka mga tawo, pila ka bukag ang napuno sa mga salin nga inyong nahipos?" "Pito," mitubag sila. "Ug wala pa ba gihapon kamo makasabut?" miingon siya kanila.
ANG EBANGHELYO SA GINOO.
DAYGON IKAW, O KRISTO.
