🟢 Ikaunom nga Domingo sa Tuig

PAGBASA GIKAN SA BASAHON NI SIRAC

Sir. 15:15-20

Kon gusto ikaw, makahimo ikaw pagtuman sa mga kasugoan sa Ginoo, Makahukom ka kon magmatinumanon ka ba kaniya o dili. Gibutang niya ang kalayo ug ang tubig diha sa imong atubangan; kab-ota ug kuhaa ang bisan unsa nga higustohan mo. Gipapilian kanimo ang kinabuhi ug ang kamatayon; maimo kadtong bisan unsa nga imong pilion. Ang kaalam ug gahom sa Ginoo dako ug nagtan-aw siya sa tanang butang. Nasayod siya sa tanan nga buhaton sa usa ka tawo, ug nagbantay siya kanila nga mahadlokon kaniya. Wala gayod siya nagsugo kang bisan kinsa sa pagkadaotan ni nagtugot kang bisan sa pagpakasala.

SALMO RESPONSORYO

Ps. 119:1-2, 4-5, 17-18, 33-34

R. Bulahan sila nga nagatuman sa balaod sa Ginoo.

Bulahan sila kansang paagi walay ikasaway, nga nagalakat diha sa balaod sa Ginoo. Bulahan sila nga nagatuman sa iyang mga kasugoan, nga nangita niya sa tibuok nilang kasingkasing. (R)

Nagsugo ka nga tumanon pag-ayo ang imong mga sugo, hinaut unta nga maglig-on ako diha sa mga dalan, sa pag-amping sa imong mga kasugoan. (R)

Kaloy-i ang imong sulugoon, aron mabuhi ako ug mag-amping sa imong mga pulong Ablihi ang akong mga mata aron magpalandong ako sa mga katingalahan sa imong balaod. (R)

Tudloi ako, O Ginoo, sa paagi sa imong mga kasugoan, aron ayohon ko sila pagtuman. Tagai akog kinaadman aron akong tumanon ang imong mga sugo ug ampingan ko sa tibuok kong kasingkasing. (R)

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 2:6-10

Hinuon, niadtong mga hamtong na sa ilang kinabuhing espirituhanon, gigamit ko ang makinaadmanong mga pulong apan dili kinaadman nga iya niining kalibotana, ni sa nagmando niining kalibotana, kansang gahom nagkahanaw na. Ang kinaadman nga akong gitudlo mao ang tinagong kinaadman sa Dios nga iyang gililong sa tawo, apan gipili niya alang sa atong himaya, bisan saw ala pa himoa ang kalibotan. Ug walay pangulo niining kalibotana nga nasayod sa maong kinaadman, kay kon nasayran pa kini, dili unta nila ilansang sa krus ang Ginoo sa himaya. Hinuon, sumala sa giingon sa Kasulatan, "Ang wala makitamadungog sa tawo, ang wala gayod palandonga sa tawo nga mahitabo, mao ang giandam sa Dios niadtong nahigugma kaniya." Apan gipadayag kanato sa Dios ang iyang tinago pinaagi sa iyang Espiritu. Ang Espiritu nagsusi sa tanang mga butang busan pa niadtong labing natago nga mga katuyoan sa Dios.

BERSO SA DILI PA ANG EBANGHELYO

Mt. 11:25

Aleluya! Dalaygon ikaw, Amahan, Ginoo sa langit ug yuta; kay imong gipadayag sa mga gagmay ang mga misteryo sa gingharian. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 5.17-37

Si Jesus miingon sa iyang mga tinun-an, "Ayaw ninyo hunahunaa nga mianhi ako aron pagsalikway sa Balaod ni Moises ug sa mga pagtulon-an sa mga propeta. Wala ako moanhi aron pagsalikway niini, kondili aron paghatag niini sa hustong kahulugan. Timan-i kini: samtang may langit pa ug yuta, bisan ang labing gamay nga kudlit o ang labing diyotay nga bahin sa Balaod, dili gayod sayloan hangtud matuman ang tanan. Busa ang dili magtuman bisan sa labing gamayng bahin sa kasugoan, ug magtudlo sa uban sa pagbuhat sa ingon, mahimong labing iwit sa Gingharian sa langit. Apan ang magtuman sa Balaod ug magtudlo sa uban sa pagbuhat sa ingon mahimong dako sa Gingharian sa langit. Busa mag-ingon ako kaninyo nga dili kamo makasulod sa Gingharian sa langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo." "Nasayod kamo nga ang mga tawo giingnan kaniadto, 'Ayaw pagpatay; ang makapatay taralon sa hukmanan.' Apan sultihan ko kamo nga ang masuko sa iyang isigkatawo dad-on ngadto sa maghuhukom, ug ang maghingalag kuwanggol sa iyang isigkatawo taralon ngadto sa Labawng Hukmanan, ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno. Busa inigdala na nimo sa imong halad sa Dios ngadto sa halaran ug didto mahinumdoman mo nga nasilo ang imong isigkatawo, biyai ang imong halad atubangan sa halaran, ug adtoa dayon ang imong isigkatawo, ug pakig-uli una kaniya. Unya balik sa halaran ug ihalad ang imong halad sa Dios." "Kon may mokiha kanimo ug dad-on ka niya sa hukmanan, pakighusay kaniya samtang may panahon pa ug wala pa kamo moabot didto; kay kon kamo moabot na sa hukmanan itugyan ka niya sa huwes, ug ang huwes motugyan kanimo sa polis, ug ibalhog ka sa bilanggoan. Ug timan-i: bilangguon ka didto hangtud kabayran mo sa hingpit ang imong multa." "Nakadungog kamo nga giingon kaniadto, 'Ayaw panapaw.' Apan karon sultihan ko kamo nga bisan kinsay motan-aw sa usa ka babaye uban sa law-ay nga hunahuna nakapanapaw na kaniya sulod sa iyang kasingkasing. Busa kon ang imong tuong mata makaangin kanimo sa pagpakasala, Iugita kini ug ibalibag, kay mas maayo pa kanimo nga kawad-an ang imong lawas og usa ka bahin kay sa itambog ang tibuok mong lawas ngadto sa impiyerno. Kon ang imong tuong kamut makaangin kanimo sa pagpakasala, putla kini ug ibalibag! Mas maayo pa kanimo nga kawad-an ka og usa ka kamut, kay sa itambog ang tibuok mong lawas ngadto sa impiyerno." "Giingon usab kaniadto, 'Ang makigbulag sa iyang asawa kinahanglan nga maghatag kaniya og sinulat nga pahibalo sa pakigbulag.' Apan karon sultihan ko kamo nga ang mobulag sa iyang asawa nga wala magluib kaniya makasala kay siya man ang makaangin sa iyang asawa sa pagpanapaw kon ang asawa magminyo pag-usab; ug ang mangasawa kaniya makapanapaw usab." "Nakadungog usab kamo nga giingnan ang atong katigulangan kaniadto, 'Ayaw pakyasa ang imong panaad, kondili tumana ang imong gipanumpa sa Ginoo nga imong buhaton.' Apan karon sultihan ko kamo: ayaw gayod panumpa kon ikaw manaad; ayaw panumpa sa langit, kay ang langit mao ang trono sa Dios; ni sa yuta, kay ang yuta mao ang iyang tumbanan; ni sa Jerusalem, kay kini mao ang siyudad sa halangdong Hari. Ayaw kamo panumpa bisan gani sa inyong ulo kay dili man kamo makapaputi o makapaitom sa usa ka lugas nga buhok. Ingna lamang 'Oo' o 'Dili', kay kon may mokapin pa niini, kana gikan na sa yawa."