⚪ [M] San Cirilo, monghe ug San Metodio, obispo

PAGBASA GIKAN SA UNANG BASAHON SA MGA HARI

1 Kgs. 12:26-32; 13:33-34

Ug nakaingon si Jeroboam sa iyang kaugalingon, "Lagmit ang gingharian mahibalik sa panimalay ni David; kon ang katawhan magpadayon pag-adto sa Jerusalem aron paghalad ug mga mananap didto sa Templo sa Ginoo, kining mga tawhana mobalik na usab sa ilang agalon nga si Roboam, ang hari sa Juda, ug patyon nila ako." Busa nakahukom siya paghimo ug duha ka nating baka nga bulawan. Unya giingnan niya ang katawhan, "Ayaw na kamo paghagohago ug adto sa Jerusalem kay ania may inyong mga dios nga maoy nagkuha kaninyo gikan sa Ehipto." Ang usa niini gipahimutang niya didto sa Betel, samtang ang usa didto sa Dan. Ug kining butanga nakaangin sa katawhan sa pagpakasala, kay miadto man sila aron pagsimba sa nating baka nga bulawan nga didto sa Betel, ug ang uban misimba usab didto sa Dan. Naghimo usab siyag mga halaran didto sa mga bungtod; ug nagtudlog mga pari gikan sa tanang katawhan nga dili mga Levita. Ug si Jeroboam naghimog pangilin sa ika-napulog lima ka adlaw, sa ikawalong bulan sama sa pangilin nga gihimo didto sa Juda. Ug naghalad siyag mga mananap didto sa halaran sa Betel alang sa diosdios nga nating baka nga iyang gihimo. Ug gipahimutang niya didto sa Betel ang mga pari. Apan si Jeroboam wala mohunong sa iyang dautang buhat, kondili nagtudlo na usab siyag mga pari gikan sa katawhan alang sa mga halaran nga didto sa kabungtoran. Ang bisan kinsa nga buot mahimong pari iyang giordinahan pagkapari. Ug kining butanga nakaangin sa panimalay ni Jeroboam sa pagpakasala busa gilaglag kini hangtod sa hangtod.

SALMO RESPONSORYO

Ps. 106: 6-7, 19-20, 21-22

R. Ginoo, hinumdomi kami, tungod sa gugma nimo sa imong lungsod.

Kami nakasala, kami ug ang among mga amahan; nakahimo kami og kasal-anan; nakabuhat kami og sayop. Ang among mga Amahan didto sa Ehipto wala magpalandong sa imong mga buhat nga katingalahan. (R)

Naghimo sila og baka didto sa Horeb ug gisimba nila ang usa ka larawan sa tinunaw nga bulawan; Gibaylo nila ang ilang himaya sa larawan sa baka nga nagakaon og balili. (R)

Nahikalimot sila sa Dios nga nagaluwas kanila, nga naghimog dagkong mga buhat didto sa Ehipto, Katingalahang mga buhat didto sa yuta sa Ham, makalilisang nga mga butang didto sa Dagat nga Pula. (R)

BERSO SA DILI PA ANG EBANGHELYO

Mt. 4:4b

Aleluya! Dili mabuhi ang tawo sa pan lamang, kondili sa matag pulong usab nga isulti sa Dios. Aleluya!

PAGBASA SA SANTOS NGA EBANGHELYO SUMALA NI SAN MARKOS

Mk. 8:1-10

Wala madugay, may laing dakong panon sa mga tawo nga nagkatapok. Sa dihang wala na silay pagkaon, gipaduol ni Jesus kaniya ang iyang mga tinun-an, ug giingnan niya, "Naluoy ako niining mga tawhana, may tulo na karon ka adlaw nga mikuyog sila kanako, ug wala na silay makaon. Kon papaulion ko sila nga walay kaon, panguyapan sila sa dalan, kay ang uban kanila layo ra ba og gigikanan." Nangutana kaniya ang iyang mga tinun-an, "Asa man kita mokuha og pan dinhi niining awaaw nga dapit nga arang ikapakaon niining mga tawhana?" "Pila ba ka buok ang inyong pan?" nangutana si Jesus kanila. "Pito," mitubag sila. Unya gipalingkod ni Jesus sa yuta ang mga tawo. Gikuha niya ang pito ka pan ug nagpasalamat siya sa Dios. Human niini, gipikaspikas niya ang pan ug gihatag ngadto sa iyang mga tinun-an aron ilang iapod-apod sa mga tawo. Gituman kini sa mga tinun-an. Sila may pipila usab ka gagmayng isda, ug si Jesus nagpasalamat sa Dios tungod niini. Gisugo niya ang iyang mga tinun-an sa pag-apod-apod niini sa mga tawo. Nangaon ang tanan ug nangabusog—mga upat ka Iibo sila. Ang salin nga nahipos sa mga tinun-an pito ka bukag. Unya gipapauli ni Jesus ang mga tawo, ug misakay dayon siya sa sakayan uban sa iyang mga tinun-an ug miadto sa yuta sa Dalmanuta.