PAGBASA GIKAN SA UNANG BASAHON SA MGA HARI
1 Kgs. 11:29-32; 12:19
Usa niana ka adlaw sa paggawas ni Jeroboam sa Jerusalem, ang propeta nga si Ahias nga taga-Silo gikasugat niya diha sa dalan. Si Ahias nagsul-ob ug bag-ong bisti; ug sila rang duha ang diha sa kapatagan. Unya gigisigisi ni Ahias sa napulog duha ka bahin ang bag-ong bisti nga iyang gisul-ob. Ug giingnan niya si Jeroboam, "dad-a ang napulo ka bahin; kay nag-ingon ang Ginoo, ang Dios sa Israel, nga hapit na niya langkaton ang gingharian gikan sa kamot ni Solomon, ug ihatag niya kanimo ang napulo ka banay sa Israel. Apan usa ka banay mahibilin kang Solomon tungod sa iyang alagad nga si David ug tungod sa Jerusalem, ang siyudad nga iyang gipili gikan sa napulog duha ka banay sa Israel. Busa mialsa ang Israel batok sa panimalay ni David sukad niadtong panahona.
ANG PULONG SA GINOO.
SALAMAT SA DIOS.
SALMO RESPONSORYO
Ps. 81:10-11, 12-13, 14-15
R. Ako ang Ginoo nga imong Dios; pamati-a ang akong tingog.
Dili kamo maghupot ug laing Dios diha kaninyo ni magsimba kamo ug Dios nga langyaw. Ako, ang Ginoo mao ang inyong Dios, nga nagpagula kaninyo gikan sa yuta sa Ehipto. (R)
Apan ang akong lungsod wala mamati sa akong tingog ug ang Israel wala motahod kanako. Busa gipasagdan ko sila sa katig-a sa ilang mga kasingkasing; nagalakaw sila subay sa ilang kaugalingong mga tambag. (R)
Kon mamati pa lamang kanako ang akong lungsod ug molakaw ang Israel sa akong mga dalan, sa walay dugay pakamangon ko ang ilang kaaway; batok sa ilang mga kaatbang ibakyaw ko ang akong kamut. (R)
BERSO SA DILI PA ANG EBANGHELYO
Buh. 16:14b
Aleluya! Ang Ginoo nag-abli sa iyang kasingkasing aron pagdawat sa mensahe ni Pablo. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 7:31-37
Unya mibiya si Jesus sa yuta duol sa Tiro ug milakaw latas sa Sidon ngadto sa Lanaw sa Galilea, agi sa yuta sa Decapolis. Ug may usa ka tawo nga bungol ug amang nga gipadala sa pipila ka mga tawo ngadto kang Jesus, ug mihangyo sila kaniya nga ang iyang kamut itapion niya sa tawo. Busa gipahilayo siya ni Jesus sa mga tawo, ug gikulkog niya ang iyang mga tudlo sa dalunggan sa tawo. Unya gituthoan niya ang iyang mga tudlo ug iyang gihikap ang dila sa tawo. Ug mihangad si Jesus sa langit, nanghupaw siya, ug miingon sa tawo, "Efata!" nga sa ato pa, "Maabli ka!" Dihadiha makadungog na ang tawo ug maayo na siyang mosulti. Ug gipinahan silang tanan ni Jesus sa dili pagpanugilon niini kang bisan kinsa; apan hilabihan hinoon nilang panugilon niini. Ug natingala pag-ayo ang tanan ug miingon sila, "Maayo gayod niyang pagkabuhat ang tanan! Bisan gani ang mga bungol iyang gihimo nga makadungog, ug ang mga amang makasulti."
ANG EBANGHELYO SA GINOO.
DAYGON IKAW, O KRISTO.
