PAGBASA GIKAN SA UNANG BASAHON SA MGA HARI
1 Kgs. 10:1-10
Sa pagkabalita sa rayna sa Seba sa kabantog ni Solomon, miadto siya sa Jerusalem aron pagsulay kaniya sa malisod nga mga pangutana. Gikuyogan siya sa daghan kaayong mga sakop. Nagdala silag mga kamelyo nga gikargahan og mga pahumot, daghang bulawan, ug mahalon nga mga bato ug sa pag-adto niya kang Solomon, gisuginlan niya siya sa tanang mga pangutana nga diha sa iyang hunahuna. Ug gitubag ni Solomon ang tanan niyang mga pangutana, wala gayoy wala matubag sa hari. Ug nakadayeg kaayo ang rayna sa Seba sa dihang nakita niya ang pagkamaalamon ni Solomon, ingon man ang palasyo nga iyang natukod, ang mga putahi sa iyang lamesa, ang iyang mga opisyal, ang pamisti sa iyang mga sulugoon ug ang kahanas nila, ang mga tigtagay sa ilimnon, ug ang iyang mga halad nga sunogon. Ug ang rayna miingon sa hari, "Matuod gayod ang mga taho nga akong nabati didto sa akong yuta bahin kanimo ug sa imong kaalam, apan wala ko tuohi ang mga taho hangtod nga mianhi ako ug nakita ko kini. Ang tinuod mao nga ang gisugilon nila kanako wala ra gani sa katunga sa akong nakita; ang imong kaalam ug bahandi labaw sa taho nga akong nabati. Bulahan ang imong mga asawa! Bulahan usab ang imong mga sulugoon nga kanunay nag-alagad kanimo ug namati sa maalamon mong pulong. Dalaygon ang Ginoo nga imong Dios nga nahimuot kanimo ug nagpahimutang kanimo sa trono sa Israel. Kay gihigugma sa Ginoo ang Israel hangtod sa hangtod, gihimo ka niyang hari, aron ipahamtang mo ang hustisya ug katarungan." Unya gihatagan niya ang hari og duolan sa lima ka toneladang bulawan, ug daghan kaayong mga pahumot, ug mga alahas. Wala na gayoy sama niadto ka daghan sa mga pahumot kay sa niadtong gihatag sa rayna sa Seba ngadto kang hari Solomon.
ANG PULONG SA GINOO.
SALAMAT SA DIOS.
SALMO RESPONSORYO
Ps. 37:5-6, 30-31, 39-40
R. Ang ba-ba sa matarong nagabungat sa kinaadman.
Itugyan ngadto sa Ginoo ang imong dalan, salig kaniya ug mobuhat siya. Pasubangon niya ang katarong alang kanimo ingon sa kahayag; masiga ingon og udtong tutok ang imong katarungan. (R)
Ang ba-ba sa matarong nagasulti sa kinaadman ug ang iyang dila nagabungat sa husto. Ang balaod sa iyang Dios anaa sa iyang kasingkasing ug ang iyang mga lakang dili masayop. (R)
Ang kaluwasan sa matarong gikan sa Ginoo, siya ang ilang dalangpanan sa panahon sa kalisod. Ug ang Ginoo nagatabang kanila ug nagaluwas kaniya; gilingkawas niya sa dautan ug giluwas sila, kay midangop man sila kaniya. (R)
BERSO SA DILI PA ANG EBANGHELYO
Jn. 17:17b,17a
Aleluya! Ang imong pulong kamatuoran, himoa silang imo gayod pinaagi sa kamatuoran. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 7:14-23
Unya gipaduol pag-usab ni Jesus ang panon sa katawhan, ug miingon siya kanila, "Pamati kamong tanan ug sabta ninyo kini: Bisan unsa nga mosulod sa baba sa tawo dili makahugaw kaniya. Ang makahugaw sa tawo mao kadtong mogula kaniya." Sa pagbiya na niya sa panon sa katawhan ug pagsulod sa balay, gipangutana siya sa iyang mga tinun-an mahitungod niining mga panultihona. "Sa inyong panabut sama ra kamo sa uban," mitubag si Jesus kanila. "Wala ba diay kamo makasabut? Bisan unsa nga mosulod sa baba sa tawo dili makahugaw kaniya, kay kini dili man mosulod sa iyang kasingkasing, kondili ngadto sa iyang tiyan, ug unya mogula usab sa lawas." (Sa pagsulti ni Jesus niini, iyang gipahayag nga mahimong kan-on ang tanang pagkaon. ) Ug mipadayon siya sa pag-ingon, "Ang makahugaw sa tawo mao kadtong mogula kaniya. Kay gikan sa sulod, gikan sa kasingkasing sa tawo, manggula ang mga dautang hunahuna, pagpakighilawas, pagpangawat, pagpatay, pagpanapaw, pagkaibog, pagpanlimbong, kalaw-ay, kasina, pagbutangbutang, pagpagarbo, ug pagbinuang—kining tanan naggikan sa sulod sa tawo ug maoy makahugaw kaniya."
ANG EBANGHELYO SA GINOO.
DAYGON IKAW, O KRISTO.
