⚪ [M] Santa Escolastica, birhen

PAGBASA GIKAN SA UNANG BASAHON SA MGA HARI

1 Kgs. 8:22-23, 27-30

Unya si Solomon mibarog sa atubangan sa halaran sa Ginoo, atubangan sa mga Israelita. Giisa niya ang iyang mga kamot ngadto sa langit ug miingon, "O Ginoo nga Dios sa Israel, walay Dios nga sama kanimo sa langit ug sa yuta nga nagtuman sa kasabotan ug nagpakita sa gugmang walay paglubad ngadto sa imong mga sulugoon nga nagsunod kanimo sa kinasingkasing gayod." "Apan mopuyo ba gayod ikaw, O Dios dinhi sa kalibotan? Kon ang langit ug ang kinatas-ang langit dili man gani igo nga imong kapuy-an, unsa pa kaha ang Templo nga akong gitukod! Apan tagda ang akong pag-ampo, O Ginoo nga akong Dios. Pamatia ang akong pagsangpit kanimo niining adlawa aron sa adlaw ug gabii bantayan mo kining Templo, ang dapit nga imong giingon diin pasidunggan ang imong ngalan aron mamati ka sa pag-ampo nga ihalad sa imong alagad nganhi niining dapita. Ug pamatia usab ang pangaliya sa imong alagad ug sa imong katawhan, ang Israel, inig-ampo nila nga mag-atubang niining dapita. Pamati diha sa langit nga maoy imong puy-anan ug inigkadungog mo, pasayloa kami.

SALMO RESPONSORYO

Ps. 84:3, 4, 5, 10, 11

R. Pagkahiligugmaon sa imong puloy-anan, O Ginoo, gamhanang Dios.

Ang akong kalag nangandoy ug gihidlaw sa kahawanan sa Ginoo. Ang akong kasingkasing ug ang akong unod nangandoy sa buhi nga Dios. (R)

Bisan ang langgam nakakaplag ug puloy-anan, ug ang sayaw iyang salag diin iyang kabutangan sa iyang kuyabog maingon usab ang imong mga altar, Ginoo sa kagahuman, akong hari ug akong Dios. (R)

Bulahan sila nga nagapuyo sa imong balay; sa walay hunong nagadayeg sila kanimo. O Dios, tan-awa ang among taming, ug sud-onga ang nawong sa imong dinihogan. (R)

Palabihon ko ang usa ka adlaw diha sa Imong kahawanan kay sa usa ka libo sa laing dapit; palabihon ko ang paghigda sa tugkaran sa balay sa akong Dios kay sa pagpuyo diha sa mga tolda sa dautan. (R)

BERSO SA DILI PA ANG EBANGHELYO

Ps. 119:36, 29

Aleluya! Tanduga ang akong kasingkasing aron magtuman ako sa imong kabubut-on; tudloi ako sa imong balaod, O Dios. Aleluya!

PAGBASA SA SANTOS NGA EBANGHELYO SUMALA NI SAN MARKOS

Mk. 7:1-13

Ang mga Pariseo ug pipila sa mga magtutudlo sa Balaod nga gikan sa Jerusalem mialirong kang Jesus. Ug namatikdan nila nga may mga tinun-an ni Jesus nga nangaon nga hugaw og kamut, sa ato pa, wala sila makapanghunaw sumala sa paagi nga gitudlo sa mga Pariseo nga buhaton sa mga tawo. (Kay ang mga Judio god, labi na ang mga Pariseo, nagtuman man sa mga gitudlo sa ilang mga katigulangan. Dili mokaon ang mga Pariseo kondili una sila makapanghunaw sa hustong paagi, ni mokaon sila og bisan unsa nga gikan sa merkado kondili pa nila kini kahugasan. May daghan pang mga sugo nga ilang nadawat ug gituman, ingon pananglit sa hustong paagi sa paghugas sa mga tasa, mga kolon, mga panaksan nga tumbaga, ug mga higdaanan. ) Busa nangutana kang Jesus ang mga Pariseo ug ang magtutudlo sa Balaod, "Ngano ba ang imong mga tinun-an wala man magtuman sa mga sugo nga gibilin sa atong mga katigulangan, kondili nangaon hinoon nga hugaw og kamut?" Si Jesus mitubag kanila, "Wala gayod masayop si Isaias sa iyang gipanagna mahitungod kaninyo. Mga tigpakaaron-ingnon kamo, sumala sa giingon sa Dios nga gisulat ni Isaias: 'Kining mga tawhana nagpasidungog kanako sa pulong lamang, Apan ang ilang kasingkasing halayo kanako. Kawang lamang ang ilang pagsimba kanako, Kay ilang gitudlo nga balaod sa Dios ang mga sugo nga hinimo lamang sa tawo!" Ug midugang si Jesus sa pag-ingon, "Gipasagdan ninyo ang mga sugo sa Dios ug mao hinooy inyong gituman ang mga pagtulon-an nga iya sa tawo." Ug miingon pa gayod si Jesus, "Maantigo gayod kamo nga mosalikway sa balaod sa Dios aron lamang matuman ang inyong kaugalingong pagtulon-an! Kay nagsugo si Moises, "Tahora ang imong amahan ug inahan,' ug 'Ang magsultig dautan batok sa iyang amahan ug inahan kinahanglan patyon.' Apan kamo nagtudlo nga kon ang usa ka tawo may butang nga iya untang ikatabang sa iyang amahan ug inahan, apan moingon siya, 'Corban kini' (nga sa ato pa, iya kini sa Dios), dili na kinahanglan nga siya motabang pa sa iyang amahan ug inahan. Niining paagiha wala ninyo itudlo ang pulong sa Dios diha sa mga pagtulon-an nga inyong gipasunod sa uban. Ug daghan pang mga butang nga sama niini nga inyong gibuhat."