🟢 Lunes sa Ikalima nga Semana sa Tuig

PAGBASA GIKAN SA UNANG BASAHON SA MGA HARI

1 Kgs. 8:1-7, 9-13

Unya gitigom ni Hari Solomon sa iyang atubangan, didto sa Jerusalem, ang mga pangulo sa Israel, ug ang tanang mga pangulo sa mga banay ingon man ang mga pangulo sa mga panimalay sa katigulangan sa katawhan sa Israel, aron ilang dad-on didto sa Siyudad ni David nga mao ang Sion ang Sudlanan sa Kasabutan sa Ginoo. Ug ang tanang katawhan sa Israel miadto kang Hari Solomon sa Pangilin sa Balongbalong sa bulan sa Etanim, nga mao ang ikapitong bulan. Ug mianha usab ang tanang kadagkuan sa Israel, ug giyayongan sa mga pari ang Sudlanan sa Kasabutan. Gidala nila kini ug ang Tolda nga Tagboanan, ug ang mga sagradong galamiton nga diha sa Tolda nga Tagboanan. Gidala kini sa mga pari ug mga Levita. Si Hari Solomon ug ang mga Israelita nagkatigom diha sa atubangan sa Sudlanan sa Kasabutan ug naghalad silag mga karnero ug mga baka nga dili maihap nga tungod sa kadaghan. Unya gidala sa mga pari ang Sudlanan sa Kasabutan sa Ginoo ngadto sa butanganan niini, didto sa Labing Balaang Dapit sa Templo, ilalom sa mga pako sa kerubin. Gipandungan sa mga pako sa kerubin ang Sudlanan sa Kasabutan ug ang mga yayongan niini. Walay sulod ang Sudlanan gawas sa duha ka papan nga bato nga gisulod ni Moises niini didto sa Bukid sa Sinai, diin ang Ginoo naghimog kasabutan uban sa katawhan sa Israel, sa paghigawas nila sa Ehipto. Sa paggula sa mga pari gikan sa Balaang Dapit, may panganod nga milukop sa Templo sa Ginoo, ug tungod niini ang mga pari naglisod sa pagpadayon sa ilang buluhaton, kay ang Templo napuno man sa himaya sa Ginoo. Unya nag-ampo si Solomon, "Gipahimutang mo, Ginoo, ang adlaw diha sa kalangitan, apan anaa ka magpuyo sa mga sa mga panganod ug sa mangitngit nga dapit. Nakatukod ako alang kanimo og usa ka matahom nga balay, dapit nga sarang mo kapuy-an hangtod sa kahangturan."

SALMO RESPONSORYO

Ps. 132: 6-7, 9-10

R. Ginoo, tungas ngadto sa dapit nga Imong pahulayanan.

Ania, nakadungog kami niini didto sa Efrata; hikaplagan namo kini sa kaumahan sa Jaar. Manulod kita ngadto sa Iyang puloy-anan, managsimba kita sa tumbanan sa Iyang mga tiil. (R)

Padayon, O Ginoo, ngadto sa imong pahulayanan ikaw ug ang arka sa imong kahalangdon. Magsul-ob unta ang imong kaparian sa katarong; magsinggit unta sa kalipay ang mga nagtuo kanimo. Tungod kang David imong sulugoon, ayaw isalikway ang pangaliya sa imong dinihogan. (R)

BERSO SA DILI PA ANG EBANGHELYO

Mt. 4:23

Aleluya! Si Jesus misuroy sa tibuok Galilea ug nagtudlo sulod sa ilang mga sinagoga, ug nagwali sa Maayong Balita bahin sa paghari sa Dios, ug nag-ayo sa mga masakiton. Aleluya!

PAGBASA SA SANTOS NGA EBANGHELYO SUMALA NI SAN MARKOS

Mk. 6:53-56

Mitabok sila sa lanaw ug midunggo sa Genesaret ug gihigot nila ang ilang sakayan. Sa pagkawas na nila nailhan dayon si Jesus sa mga tawo. Busa nanagan sila ngadto sa kasikbit nga mga balangay ug gidala ngadto kang Jesus ang mga masakiton nga naghigda sa ilang mga higdaanan. Bisan asa si Jesus moadto, sa kabalangayan, sa kalungsuran, sa kaumahan, dad-on sa mga tawo ang ilang mga masakiton ngadto sa mga tiyanggihan. Nagpakiluoy sila nga ang ilang masakiton pahikapon bisan lamang sa sidsid sa iyang bisti; ug nangaayo ang tanan nga nakahikap kaniya.