PAGBASA GIKAN SA BASAHON NI PROPETA ISAIAS
Is. 58:7-10
Ang Ginoo miingon: "Dili ba ang puasa nga akong gikinahanglan mao man nga hatagan ninyo'g pagkaon ang mga gigutom, ug papuy-on ninyo sa inyong balay ang mga kabus nga walay puloy-anan; ug nga bistihan ninyo ang hubo inay pasagdan ninyo ang inyong kaigsuonan? "Sa ingon, modan-ag ang inyong kahayag ingon sa banagbanag sa kabuntagon, ug mamaayo kamo pagdali; maggiya kaninyo ang inyong katarong, ug sa inyong luyo panalipdan kamo sa himaya sa Ginoo. Kon mosangpit kamo sa Ginoo, tubagon kamo niya; kon magpakitabang kamo, dili kamo niya balibaran. "Kon likayan ninyo ang pagdaogdaog, ang pagtulisok ug ang dautang pulong, ug pakan-on ninyo ang gigutom, ug hatagan ang mga kabus sa ilang gikinahanglan, mosidlak ang inyong kahayag diha sa kangitngit, ug ang inyong kangitngit mahisama sa kahayag sa udtong tutok."
ANG PULONG SA GINOO.
SALAMAT SA DIOS.
SALMO RESPONSORYO
Ps. 112:4-5, 6-7, 8-9
R. Ang matarong kahayag diha sa kangitngit alang sa buotan.
Ang Ginoo nagabanagbanag latas sa kangitngitan, usa ka kahayag alang sa buotan; mahigugmaon siya ug maluluy-on, ug matarong. Maayo siya alang sa tawo nga maluluyon ug manggihatagon, sa tawo nga nagadumala sa iyang patigayon uban sa katarong. (R)
Dili gayod siya mabalhin; ang matarong mahinumdoman kanunay hangtod sa kahangturan. Dili siya mahadlok sa dautang mga taho; malig-on ang iyang kasingkasing kay nagasalig siya sa Ginoo. (R)
Ang iyang kasingkasing makanunayon, dili gayod siya mahadlok. Kusog siyang mohatag sa mga kabus; ang iyang kaliwat molungtad hangtod sa kahangturan ang iyang gahom ibayaw diha sa himaya. (R)
PAGBASA GIKAN SA UNANG SULAT NI SAN PABLO NGADTO SA TAGA-CORINTO
1 Cor. 2:1-5
Mga igsuon, sa akong pag-anha aron pagwali sa tinago nga kamatuoran gikan sa Dios, wala ako maggamit og lawom nga mga pulong ug dakong kinaadman. Kay sa diha pa ako uban kaninyo gikalimtan ko ang tanang butang gawas kang JesuCristo, labi na gayod ang iyang kamatayon sa krus. Busa pag-anha ko kaninyo, huyang ako ug nagkurog sa kahadlok, ug ang akong pagpanudlo ug pagwali wala ko himoa sa hinashasang mga pulong sa tawhanong kaalam, kondili pinaagi sa dili malalis nga gahom sa Espiritu sa Dios. Busa ang inyong pagtoo wala magbarog diha sa kaalam sa tawo, kondili sa gahom sa Dios.
ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO
Mt. 4:4
Aleluya! Ang tawo dili mabuhi sa pan lamang, kondili sa tanang pulong nga nagagikan sa Dios. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5:13-16
Si Jesus miingon sa iyang mga tinunan, "Kamo ang asin sa katawhan. Kon ang asin kawad-an sa iyang kaparat, unsaon pa man pagpabalik sa kaparat niini? Kini wala nay kapuslanan ug angay na lamang isalibay ug tunobtunoban sa mga tawo." "Kamo ang kahayag sa katawhan. Ang siyudad nga nahimutang sa bungtod dili gayod matago. Walay magdagkot og suga aron lamang tagoan sa gantangan, kondili ibutang gayod sa tungtunganan aron makadan-ag sa tanan nga anaa sa balay. Busa ipadan-ag gayod ang inyong kahayag atubangan sa mga tawo, aron makita nila ang inyong mga maayong buhat ug magdayeg sila sa inyong Amahan nga atua sa langit."
ANG EBANGHELYO SA GINOO.
DAYGON IKAW, O KRISTO.
