PAGBASA GIKAN SA UNANG BASAHON SA MGA HARI
1 Kgs. 3:4-13
Usa ka adlaw niana miadto sa Gabaon si Solomon aron sa paghalad, kay didto man ang labing bantog nga halaran. Nabatasan ni Solomon ang paghalad og ginatos ka mga halad. Usa ka gabii niana, samtang didto siya sa Gabaon, mipakita kaniya ang Ginoo pinaagi sa usa ka damgo ug miingon kaniya, "Pangayo kanako bisag unsa." Ug si Solomon miingon, "Gipakita mo sa imong sulugoon nga si David nga akong amahan, ang gugma mong walay paglubad kay nagmasinugtanon man siya kanimo. Busa wala ka mohunong paghigugma kaniya, ug gihatagan mo siyag anak aron molingkod sa iyang trono niining adlawa. Ug karon, O Ginoo nga akong Dios, gihimo mong hari ang imong alagad ilis sa akong amahan nga si David, bisan tuod batan-on pa ako kaayo, ug walay hibangkaagan sa pagpangulo. Ug ang imong alagad ania sa taliwala sa katawhan nga imong gipili, usa ka dako nga katawhan nga dili maihap tungod sa kadaghan. Busa hatagi ang imong alagad ug kaalam aron mahibalo siya pagdumala sa imong katawhan, uban ang katarong; kay kinsa may makamando niining daghang katawhan?" Nahimuot ang Ginoo nga kini ang gipangayo ni Solomon. Ug giingnan siya Dios, "Tungod kay kini man ang imong gipangayo, ug wala ka mangayo ug taas nga kinabuhi o bahandi o sa kinabuhi sa imong kaaway, hatagan ko ikaw sa imong gipangayo. Hatagan ko ikawg kaalam nga wala pa maangkon ni bisan kinsa kaniadto ni sa umaabot nga panahon. Ihatag ko usab kanimo ang wala mo pangayoa: bahandi ug dungog sa tibuok mong kinabuhi sa pagkaagi nga walay laing hari nga ikatandi kanimo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 119:9, 10, 11, 13, 14
R. Ginoo, tudloi ako sa imong kasugoan.
Unsaon pagkadili masayop sa usa ka batan-on diha sa iyang dalan? Pinaagi sa pag-amping sa imong mga pulong. (R)
Sa tibuok kong kasingkasing gipangita ko ikaw; ayaw itugot nga mahisalaag ako sa imong mga kasugoan. (R)
Sulod sa akong kasingkasing gimahal ko ang imong saad aron dili ako makasala batok kanimo. (R)
Daygon ikaw, O Ginoo; tudloi ako sa imong mga gimbut-an. (R)
Sa akong mga ngabil akong gipahayag ang tanang mga kasugoan sa imong ba-ba. (R)
Diha sa dalan sa imong mga gimbut-an nalipay ako ingon og diha sa tanang mga bahandi. (R)
BERSO SA DILI PA ANG EBANGHELYO
Jn. 10:27
Aleluya! Ang akong mga karnero namati sa akong tingog; nakaila ako kanila ug sila nagsunod kanako. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 6:30-34
Namalik ang mga apostoles ug nakigkita sila kang Jesus, ug ilang gisugilon kaniya ang tanan nilang nahimo ug natudlo. Daghan kaayo ang mga tawo nga nagpulipuli pagpangabot ug pagpanlakaw; tungod niini si Jesus ug ang iyang mga tinun-an wala nay higayon bisan gani sa pagpangaon. Busa miingon si Jesus sa iyang mga tinun-an, "Mangadto kita sa dapit nga awaaw aron makapahulay kamog diyotay." Busa nanakay sila sa usa ka sakayan ug nangadto sa usa ka dapit nga awaaw. Apan daghang mga tawo ang nakakita sa ilang pagbiya ug nailhan sila dayon; busa ang mga tawo sa tanang lungsod miadto nga nagdagan ug nahiuna pa gani pag-abot sa dapit nga giadtoan ni Jesus ug sa iyang mga tinun-an. Sa pagkawas ni Jesus sa sakayan, nakita niya kining dakong panon sa katawhan ug naluoy siya pag-ayo kanila, kay sama man sila sa mga karnero nga walay magbalantay. Ug gitudloan niya sila og daghang mga butang.
ANG EBANGHELYO SA GINOO.
DAYGON IKAW, O KRISTO.
